2 Petulo 1 - UTESITAMENTI UMPYA

¹ Nene Simoni Petele ndili nkivaga ndili mwapositili va Jesu Kilisiti. Ndikuvavigila ńi mwupilye ulwidiko ululi ndu lwitu uvutalamu, ulwu avapelye mbugolosu vwa mwene Unguluve vitu, ndikuntsova jyu mpoki UJesu Kilisiti,

² Ndikuvapembetsa ndita: Uluhungu nulunotsehetso ludige mwańe upwu mukummańa vunnonu nu-Nguluve nu-Jesu unkuludeva vitu.

³ Mańa amaka ga mwene ga vunguluve vwa mwene gatupye syoni nisya vwumi nisya kundwada Unguluve, ulwakuva gatupelye umwu tummańile uvi atwilangaga. Uvi atwilangile nuvuvaha vwa mwene namaka ga mwene ga vunguluve.

⁴ Umwu twidiṅine nuvwe ulwidiṅano ululuti nuvuvaha nululuti nuvutalamu ulwu atukungye ulwa kuvatanga uńe ukuta muhwane nave uvunguluve, lino upwu ndukimbye uluvejangiko ulwihuma mbunogwe vwa nkilunga.

⁵ Pwu mwijumilitsage nulwijumilitso lwoni. Palwidiko mugeleke nuvunnonu uvuvoneka. Pavunnonu uvu pwu mugeleke nuvumańi.

⁶ Pavumańi pwu mugeleke nulwijumilitso. Palwijumilitso pwu mugeleke ukusiha uluvipo. Pakusiha uluvipo pwu mugeleke nukundwada Unguluve.

⁷ Pakundwada Unguluvepwu mugeleke nukuvagana avajińo, Pakuvagana avajińo pwu mugeleke nulugano vuvule.

⁸ Mańa ngave ndi natso tsitsitsi, tsingave tsikwoloka nukwoloka pwu natsikuvapelela uvwolo nukuṅata ukuhupa iseke vwu mwita tummańe unkuludeva vitu UJesu Kilisiti.

⁹ Mańa uvi nali natso tsitsitsi tsoni vi iva mbosu, vi ivulavula, vi isamwa nukwivalatsa inongwa tsa mwene itsa katale.

¹⁰ Pwu lino ńi vajitu mwijumilitse ukwikangatsa umwu mwilangilwe umwu muhalilwe. Mańa ngave mwigaha tsitsitsi, pwu vwu nanditove lusiku ikilunde.

¹¹ Pwu ndavona alavapa sitso uvwingililo vwa kwingilila kuludeva lwa sikutsoni lwa nkuludeva vitu UJesu Kilisiti.

¹² Pwu nandilasamwe ukuvakumbuhitsa tsitsitsi, napene nupwu ngave ntsimańile, nupwu ngave ndulwike mbwajilweli uvwu ndi navwo.

¹³ Mańa ndita vwu ndigolwise ndingave ndikuvasukila ulwa kuvakumbuhitsa sikutsoni vwu tango ndikanale ndili muhema jyango iji,

¹⁴ nduvwu ambulile unkuludeva vitu UJesu Kilisiti.

¹⁵ Kwu ndikijumilitsaga ukuta sikutsoni mbe nako akange aka kuvakumbuhitsa tsitsitsi nupwu ndingave ndilutile.

¹⁶ Ulwakuva upwu twavavulaga namaka nukwitsila kwa nkuludeva vitu UJesu Kilisiti, pwu natukongili ntugano utwu vagulye nduhala lwa vene avanu, Bako mańa twipelile ukuva vakuvulolela mbwipi uvuvaha vwa mwene uvudwadwa.

¹⁷ Ulwakuva umwene akupilila ulwimiko nuvuvaha kwa Nguluve udadaje, upwu ilimeńu likahuma mbuvaha uvuluti uvunnonu, upwu likasika pamwene likata: Uju vi vi nswambango ungane kwane uvi aṅelye jilweli.

¹⁸ Ilimeńu ili lyu tukapulika nuvwe vwu likahuma kukyańa upwu twale twivoni nave pakidugala ikivalatse.

¹⁹ Vuvule-vule tuli nilimeńu lya vańamalago ililutile ukwitoteka, lyu vwu mugolwise ngave mukulibadama lilyo ukuta ńale ijivika kuvutitu, ngave mutsisika nalyo baho gwikya umuni, baho ihumila munumbula tsińo jyu Litondwe.

²⁰ Tsu upita tsive mbulongolo ukutsimańa uńe tsitsitsi: Goni amameńu ga vańamalago mwa kalata gwu umunu nikijagulila mwene.

²¹ Mańa nalihumili ilimeńu ilinge lya vuńamalago umwu anogilwe mwene umunu. Bako avanu avavalatse va Nguluve vagatsovaga vwu avakulye ju Mepo umbalatse.