1 Petulo 1 - UTESITAMENTI UMPYA

¹ Nene Petele ndili mwapositili va Jesu Kilisiti. Ndikuvavigila ńi mwipelile ukuva vahenza mwoni umwu muhambile namu-Ponti namu-Galatija namu-Kapadokija namu-Asija namu-Bitinija,

² ńi pakuvahala Unguluve pwu akongile avamańye ṅani, pwu avahalile mbuvalatse vwa Mepo uvwu avavalitse upwu atetsaga nuńe mukongage itsu ikuvavula UJesu Kilisiti, mumitsilwagwe munkisa gwa mwene. Ndikuvapembetsa ndita: Uluhungu luvetsage nuńe, nulunotsehetso luvalage sikutsoni mwane luve lwongosu vuvule.

³ Aginivwagwe Unguluve udadaje va nkuludeva UJesu Kilisiti uvi avujile ukutuhola ukuta tuve nuluhuvilo uluńavwumi vwu likelilwe ilikungwava lya mwene umwene, uvi atuholye umwu atsukilaga mbaswe UJesu Kilisiti.

⁴ Upwu akata vingilage pavuhale uvutsilakuvola lusiku uńe, uvutsilakatilisa, uvutsilakunyala, uvwu avavikye kukyańa.

⁵ Nditsova uvwińo ńi ulwidiko lwińo lukuvuvatila mmaka ga Nguluve, pwu ukuta nkasike mbupoki uvugahililwe ṅani ukuta vuvalaluke vwu lisike ilitsuva lya kunepo.

⁶ Tsu muhekela uńe ńi tango lino pwu nsusuvye padebe ndugelo lwoni umwu luvelye ulwu mugelwa angave anogilwe jujwa.

⁷ Ulugelo upwu lukuvavona, pwu lukuvavona ukuta ulwidiko lwińo lulutile uvutalamu nasahabu, uvi ivalalukila mumwoto upwu nihava ukusila, ndita lukuvavona ukuta ulwidiko lwińo luvapetsage nuluginyo nulwimiko nuvuvaha vwu ivoneka UJesu Kilisiti.

⁸ Uvi munganile vwu namumbweni mmiho, uvi mumwidike vwu namwaganili nave mmiho lino, uvi avapelye ukuhekela mumwene uluhekelo ulwu umunu nikulutambula, ululuti uvunnonu.

⁹ Ulwakuva mutolye ṅani pavusililo ulwidiko lwińo, Nditsova uvupoki vwa numbula.

¹⁰ Vwu vupoki uvu uvwu valondaga sitso avańamalago. Vakaliṅana vikuvukonga mmalunde upwu valagaga uluhungu ulwu vatetsaga lulavavonaga uńe.

¹¹ Vakatotela vakata: Ino gwu mwaka ugu, ugwu alagile UMepo va Kilisiti uvi vali nave. Mańa vi avutsovelaga ṅani uvukuvilwa uvwu alakuvilwagwa UKilisiti, avutsovelaga ṅani nuvuvaha uvulakongaga mumbele.

¹² Lola avene vakasaganya ukuta navikivombela vene. Bako vakasaganya tsitsakuta vikuvavombela uńe upwu vavonaga itsu mpulike lino, itsu mpulike kuvene avavavulile ilivangili, uvwu avatangile UMepo Umbalatse uvi ahumile kukyańa. Nditsova inongwa itsu navasuṅwa vinogwa sikutsoni ukuhungila.

¹³ Pwu ndita mwihudikage ingwamba nkivino kya lwisagilo lwińo, ndagalaga. Lwoni uluhuvilo lwińo mulotse kuluhungu ulukuvitsilaga luninye nu-Jesu Kilisiti upwu alavonekaga umwene.

¹⁴ Muvoneke ukuva ndi vana va kupulika itsu umunu ikuvavula. Mbandikage ndavetsaga nuvunogwe vwińo uvuvalesitse ululongotsi vwu namwale nuluhala.

¹⁵ Bako mbetsage ndumbalatse uvi avilangile. Nuńe mwipelage ukuva vavalatse ulugendo lwińo lwoni.

¹⁶ Mańa livigilwe ilita: Mwipelage ukuva vavalatse ulwakuva nune ndili mbalatse.

¹⁷ Mańa ngave mukuntsova ukuva vi dadajińo umwene uvi inongwa ihiga kitavahalila mbunnonu kumiho avanu, uvi ihigila umwu tsivelye imbombo tsa vanu uju itsa mwene uju itsa mwene, pwu upita imyaka gya vuhenza uwińo ngendelage nuludwado.

¹⁸ Mwimańage ukuta nambangilwi nutunu utwijaga ndi pesa nasahabu upwu mbangilwagwa kulugendo lwińo ulwale ludindule vuvule, ulwu vavakotsitse avadadajińo.

¹⁹ Bako mbangilwe nunkisa untalamu gwa Kilisiti uguli ndugwa kakolo katsilavulema uvunge, katsilavutilisa uvunge.

²⁰ Ukuhalwa kwu ahalililwe ṅani vwu kikanale ikilunga iki ukwalisivwa, ukwene ukuvoneka avonekye kumyaka gya kunepo igi ukuta munoge uńe,

²¹ ńi avapelye ukumwidika Unguluve uvi antsusitse mbaswe, uvi ampye nuvuvaha. Tsu avavulile ukuta nulwidiko lwińo nuluhuvilo lwińo lulotse kwa Nguluve.

²² Mutsivalatse inumbula tsińo ulwakuva mulotsitse kuvwajilweli, pwu ndutilile pakuganana ndugano lwa vanamunu ulutsilakulila isinu. Pwu nganane ulwa munumbula imbalatse ulwu nalwisila lusiku.

²³ Mańa upwu mwavujile nkaholwa pwu namuhumili mumbeju ijivola, bako pwu muhumile mumbeju ijyu najivola, muhumile mwimeńu lya Nguluve ilyumi iliva sikutsoni.

²⁴ Mańa: Voni avanu vali ndilińasi, vwoni uvuvaha vwa vene vuli nduvuluva vwa lińasi, Ilińasi lyumile, uvuluva vulagye.

²⁵ Ilimeńu lya nkuludeva lyu lilava nakuvutsilakusila lusiku. Lyu limeńu ilyu vavavulile mwivangili uńe lilili.