Kîam 1 - NTETO INJEGA CIA MURUNGU KIRI ANTU BONTHE

Kûûmbwa kwa îgûrû na nthî na birîa birî ku

¹ Kîambîrîrieene Mûrungu nî oombîre îgûrû na nthî.

² Nayo nthî îtaarî na mûûmbîre kinya jûrîkû na yaarî întheri, na îria rîakunîki nî muundu. Roho wa Mûrungu nî eetaîtaga îgûrû rîa rûûjî.

³ Mûrungu arauga, “Nî kûgîe weerû.” Nakû kûragîa weerû.

⁴ Mûrungu aroona weerû bûrî bûbwega na araathûrana weerû kuuma kîrî muundu.

⁵ Mûrungu areeta weerû mûthenya, na muundu arajwîta ûtukû. Naku nî gwaatukîre na kûrakea, îîu îraa ntukû ya mbere.

⁶ Mûrungu arauga, “Nî kûgîe îgûrû rîriirû rîathûrane rûûjî rûrîa rûrî îgûrû mono na rûrîa rûrî bwa nthî.”

⁷ Mûrungu arathithia îgûrû rîu riirû narîo rîraathûrana rûûjî rûrîa rwaarî îgûrû rîaarîo na rûrîa rwaarî rungu rwarîo. Naku kûrakara o ûu.

⁸ Mûrungu ararîaa riîtwa “îgûrû rîriirû.” Nî gwaatukîre na kûrakea, îîu îraa ntukû ya ijîîrî.

⁹ Mûrungu arauga, “Rûûjî rûrîa rûrî rungu rwa îgûrû rîriirû nî rûûthûrane antû amwe, nthî înjûmo yumîre.” Naku kûrakara o ûu.

¹⁰ Mûrungu areeta kûu kwaarî gûkûûmo, “Nthî” na rûûjî rûrîa rwothûranîre amwe ararwîta “Îria.” Mûrungu aroona bûu nî bûbwega.

¹¹ Mûrungu arauga, “Nthî nî yume imera; yume imera birîa biciaraga mpîndî, na yume mîtî ya matuunda ya mîthemba yonthe îrîa îciaraga matuunda jarî na mpîndî ndeene.” Naku kûrakara o ûu.

¹² Nthî îrauma imera; imera bia mîthemba yonthe birîa biciaraga mpîndî, na mîtî ya matuunda ya mîthemba yonthe îrîa îciaraga matuunda jarî na mpîndî ndeene. Mûrungu aroona bûu nî bûbwega.

¹³ Naku nî gwatukîre na kûrakea, îîu îraa ntukû ya ithatû.

¹⁴ Mûrungu arauga, “Nî kûgîe into bikûthaara îgûrû rîrîa riirû nîkenda biathûrana mûthenya na ûtukû. Nabio biîthîrwe birî bia kwonanagia ndwano cia biingo, na cia matukû na mîaka.

¹⁵ Ningî biîthîrwe birî bia kûthaaraga birî kûu îgûrû rîriirû biîkagîre nthîgûrû weerû.” Naku kûrakara o ûu.

¹⁶ Mûrungu arathithia imûrî biîrî birî na weerû bûbwingî. Kîmwe kîmûrikage mûthenya na kîngî kîmûrîkage ûtukû. Ningî nî aathithîrie njota kinya cio.

¹⁷ Mûrungu areeka imûrî biu kûu îgûrû nîkenda bithaaragîra nthîgûrû,

¹⁸ na bimûrîkaga mûthenya na ûtukû. Ningî biathûranaga weerû na muundu. Mûrungu aroona bûu nî bûbwega.

¹⁹ Naku nî gwatukîre, na kûrakea, îîu îraa ntukû ya inya.

²⁰ Mûrungu arauga, “Ndûûjî nî ciûjûre biûmbe birîa birî mwoyo na nyoni nacio nî ibuurûûke îgûrû.”

²¹ Mûrungu aroomba nyamû irîa nene ikaraga îrieene, na biûmbe birî mwoyo bia mîthemba yonthe birîa biîtaîtaga rûûjîîne. Aaroomba nyoni cia mîthemba yonthe. Mûrungu aroona bûu nî bûbwega.

²² Mûrungu aratharima biûmbe biu akiugaga, “Ciaraneni na bûthegee, bûûjûre marieene. Nyoni nacio nî ithegee nthîgûrûûne.”

²³ Naku nî gwaatukîre na kûrakea, îîu îraa ntukû ya ithaano.

²⁴ Mûrungu arauga atîrî, “Nthî nî îgîte biûmbe birî mwoyo bia mîthemba yonthe; kûgîe nyomoo, na nyamû irîa ciikuuragia na kîu, na nyamû cia kîthaka cia mîthemba yonthe.” Naku kûrakara o ûu.

²⁵ Mûrungu aroomba nyamû cia mîthemba yonthe. Aroomba nyomoo cia mîthemba yonthe na birîa bionthe bikuaga na nthî. Mûrungu aroona bûu nî bûbwega.

²⁶ Mûrungu arauga, “Ga-tûûmbe muntû arî mûng'uanano jweetû, akari ta baatuî. Nabo baathage makûyû ja îria na baathage nyoni, na baathage nyomoo na baathage nthî yonthe, na baathage bionthe birîa biikururagia na kîu.”

²⁷ Tontû bûû, Mûrungu aroomba muntû ûng'uaneene nawe; aroomba ntomûrûme na mûka.

²⁸ Mûrungu arabatharima na arabeera atîrî, “Ciaraneni na bûthegee, bûûjûre nthîgûrûûne. Ningî bwathage makûyû ja îria na bwathage nyoni na bwathage gîntû kîonthe kîrî mwoyo kîrîa gîîtaîtaga nthîgûrû.”

²⁹ Mûrungu arauga, “Atîrî, ndîkubwaa o kîmera kîonthe kîrîa gîciaraga mpîndî kîrîa kîrî nthîgûrûûne kunthe, na mîtî yonthe îrîa îciaraga matuunda jarî na mpîndî. Nabio bikethagîrwa birî biakûrîa bieenu.

³⁰ Ningî ndîkûbwaa nyamû cionthe cia nthîgûrû na nyoni cionthe na bionthe birîa biikururagia; o gîntû kîonthe kîrîa kîrî mwoyo. Ningî ndîkûbwaa kinya îmera bionthe biee biakûrîa bieenu.” Naku kûrakara o ûu.

³¹ Mûrungu aaraithîria into bionthe birîa oombîte, aroona birî bibiega mono. Naku nî gwatukîre, na kûrakea, îîu îraa ntukû ya ithanthatû.