2Ane 1 - NTETO INJEGA CIA MURUNGU KIRI ANTU BONTHE

Kîroria Elija na mûnene Ahazia

¹ Nyuma ya gûkua kwa mûnene Ahabu, nthîgûrû ya Moabu nî yaareganîre na waatho bwa nthîgûrû ya Israeli.

² Mûnene wa Israeli tawe Ahazia nî aagwîre nthî kuuma ndiricheene ya nyomba yaawe ya ngoroba kûu Samaria, araringwa mono. Nawe aratûma antû arabeera atîrî, “Îteeni kîrî Baali-zebubu, mûrungu jwa Ekironi bûkoorie këethîra nkaabua kaîrî.”

³ Îndî mûraîka wa MWATHANI nî eerîre Elija ûrîa wa kuuma Tishibe atîrî, “Îta ûtirimane na antû bau batûmi nî mûnene wa Samaria ûboorie atîrî, ‘Nîka gûtî Mûrungu ndeene ya Israeli tontû bweta kûûria mantû kîrî Baali-zebubu, mûrungu jwa Ekironi?’

⁴ Tontû bûû, nandî MWATHANI ariuga ûjû: ‘Ûtîûkîîra ûrûrî bûu ûmami, no gûkua ûgaakua.’” Elija nawe arathithia ûu mûraîka aamwîrîre.

⁵ Nabo atûmwa bau baracoka kîrî mûnene, nawe arabooria atîrî, “Nîmbi yaatûma bûcoka ntûti?”

⁶ Nabo baramwîra, “Tûtirimanîre na muntû atwîra tûcoke kîrî gwe tûkwîre MWATHANI arîûria atîrî, ‘Ka-gûtî Mûrungu ndeene ya Israeli tontû ûgûtûmana kûûrîrua mantû kîrî Baali-zebubu mûrungu jwa Ekironi? Tontû bûû, ûtîûkîîra ûrûrî bûu ûmami, no gûkua ûgaakua?’”

⁷ Ahazia arabooria atîrî, “Nî muntû wa mûthemba jûrîkû ûu ûtirimanîre naabuî abwîra mantû jau?”

⁸ Nabo baramwîra, “Agwîkîrîte nguû ya guee na nî agûciogeete mûcibi jwa mûgûûta kauna.” Nawe arabeera, “Ûu nî Elija ûrîa wa kuuma Tishibe!”

⁹ Mûnene aratûma mûtongeeria wa asikarî mîrongo îtaano amwe nabo. Areeta kîrî Elija arîa aakari nthî kîrîmeene îgûrû aramwîra atîrî, “Itû muntû wa Mûrungu, mûnene arîkwîra înama wîje.”

¹⁰ Îndî Elija areera mûtongeeria ûu wa asikarî atîrî, “Nkëethîrwa ndî muntû wa Mûrungu rî, mwanki nî jwîname kuuma îgûrû jûkûîîthie amwe na asikarî baaku mîrongo îtaano.” Naju mwanki jûreenama kuuma îgûrû jûramûîîthia amwe na asikarî baawe mîrongo îtaano baraakua.

¹¹ Ningî mûnene nî aatûmîre mûtongeeria ûngî wa asikarî mîrongo îtaano kîrî Elija. Mûtongeeria aramwîra atîrî, “Itû muntû wa Mûrungu, mûnene arîkwîra înama ntûti!”

¹² Îndî Elija aramwîra ûjû, “Nkëethîrwa ndî muntû wa Mûrungu rî, mwanki nî jwîname kuuma îgûrû jûkûîîthie amwe na asikarî baaku mîrongo îtaano!” Naju mwanki jwa Mûrungu jûreenama kuuma îgûrû, jûramûîîthia amwe na asikarî baawe mîrongo îtaano baraakua.

¹³ Mûnene Ahazia nî aatûmanîre rîa jathatû, aratûma mûtongeeria ûngî wa asikarî mîrongo îtaano amwe na asikarî baawe. Mûtongeeria ûu wa bathatû areeta araturia maru mbere ya Elija, aramwereenca akiugaga atîrî, “Itû muntû wa Mûrungu, ndakwerenca, mbigîîrua kîaao na wigîîrue asikarî baba baakwa mîrongo îtaano kîaao, ûkáreka tûkua!

¹⁴ Atîrî, mwanki nî jweenamîre kuuma îgûrû jûraîîthia atongeeria barîa baatûmi mbere baîrî, amwe na asikarî baao. Îndî itû nandî mbigîîrua kîaao.”

¹⁵ Mûraîka wa MWATHANI areera Elija atîrî, “Înama wîtanie nawe. Ûkámûkîra.” Tontû bûû, arookîîra, areetania nawe kîrî mûnene.

¹⁶ Elija areera mûnene atîrî, “MWATHANI ariuga ûju: ‘Nîkwîthîrwa nî ûtûmanîte kîrî Baali-zebubu mûrungu jwa Ekironi wîta kûûrîrua mantû rî, nîka gûtî Mûrungu ndeene ya Israeli ûrîrua mantû kîrî we? Tontû bûû, ûtîûkîîra ûrûrî bûu ûmami, no gûkua ûgaakua.’”

¹⁷ Ahazia nî aakuîre kûringana na nteto cia MWATHANI irîa Elija aarîîtie. Ahazia ataarî na mûtaana. Tontû bûû, mûtaana wa ng'ina Joramu nîwe waajûkîrie ûnene. Joramu aaere mûnene mwakeene jwa îîrî jwa waathani bwa mûnene wa Juda, tawe Jehoramu mûtaana wa Jehoshafati.

¹⁸ Najo mantû jangî jarîa Ahazia aathithîrie nî jaandîki Yukuune rîa ngono cia anene ba Israeli.