Ruuka 1 - INDAGANO INYA:YA

¹ Okuba ba:nu ba:fu bateeo okuboko okutonda no kusombo:ra emisango jinu ce:kirisisye,

² Rwa kutyo bacisimuriye banu bariga mbarora na bakosi bo musango kuso:kerera ku bwambiro,

³ anye one narora ati ni kwa bwana okukwandikira jitondere kisi, awe Teofilo omurende, okuba anye nimenyere emisango je cimari eja byone kuso:ka ku bwambiro.

⁴ Korereki umenye okumosya kwe misango jinu we:igisibwe.

Okuraga kwo kwiburwa kwa Yoana Omubatija

⁵ Mbe mu siku ja Erode, omukama wa Buyaudi, ariga:rio mugabisi umwi, risi:na ryae Jakaria, wa mu bubaranwa bwa Abia. Oyo ariga no mugasi wae mu bayasya ba Aroni, risi:na ryae Elijabeti.

⁶ Abo ku bubiri bariga barenge:resi imbere ya Nyamuanga, nibaribatira mu biragiro byone na mu misango ja Ratabugenyi batariko esoro.

⁷ Nawe batariga na mwana, okuba Elijabeti ariga:ri mugumba, ku bubiri bwebwe bariga bakokoe.

⁸ Mbe anu ariga aca:kora omurimu gwo bugabisi imbere ya Nyamuanga mu kusijanya kwo kubaranwa kwae,

⁹ mbe obwitosi nibumugwira okwingira mu yekaru ya Ratabugenyi okwotera emigaju, rwa jintungwa jo bugabisi kutyo jariga.

¹⁰ Mbe ecise co:ne eca ba:nu cariga nicisabirwa aanja mu mwanya gwo kwotereramo.

¹¹ Mbe maraika wa Ratabugenyi namusoromokera e:mereguyu ku rubara rwe buryo orwe cigabiro co kwotererako.

¹² Jakaria wejire amurora nafwa cigutuko, no:baya.

¹³ Nawe maraika namubwira ati, Uto:baya, Jakaria, okuba okusabwa kwao kwongwibwe. Omugasi wao Elijabeti arikwiburira Omwana we cirume, numutoga risi:na ryae Yoana.

¹⁴ Urimukondererwa no kusandaba, Na ba:nu ba:fu barikondererwa okwiburwa kwae.

¹⁵ Okuba ariba mukuru imbere ya Ratabugenyi. Atarinywa manji ga mijabibu, amwi cinu ecikora. Arikusibwa Omwoyo Mweru kuso:ka munda ya nyiramwene.

¹⁶ Na ba:fu mu ba:na ba Israeli aribasubya ku Ratabugenyi Nyamuanga webwe.

¹⁷ Aritangata imbere yae mu mwoyo na mu managa ga Eliya, Korereki asubye emitima ja basaja wabo ku ba:na, Na banyantongwa abasubye okuribatira mu bwenge bwa barenge:resi, E:ra:bire Ratabugenyi aba:nu banu bacumacumirwe.

¹⁸ Jakaria nabu:sya maraika ati, ?Gunu enigumenya atiki? Okuba anye nakokoe, no mugasi wani one akwekuye mu myaka jae.

¹⁹ Maraika namuindura namubwira ati, Nanye Gaburieli, unu nimereguyu imbere ya Nyamuanga. Anye natumirwe okwaika na:we, no kukweresya ebigambo binu ebyo bwana.

²⁰ Mbe rora, ouba mujibi, utaca:tura kwaika, kukinga ku rusiku runu ariba ejo je:ya, okuba ute:kirisya misango jani jinu jiriku:misibwa mu siku jajo.

²¹ Mbe aba:nu bariga nibarindirira Jakaria, nibarugu:ra okuba ako:rere mu yekaru.

²² Mbe ejire auruka, ataturire kwaika nabo. Nibamenya ati, arora ciroro mu yekaru. Omwene nabaungisya no kuboko, naguma ari mujibi.

²³ Mbe jisiku jo kukora kwae wejire jawa, nasuba ika ewae.

²⁴ Jisiku ejo wejire jaturao, omugasi wae Elijabeti najira inda, ne:ibisa me:si gata:nu, na:ika ati,

²⁵ Nikwo kutyo Ratabugenyi amankorera mu siku jinu amando-reramo okunso:syako amaswaro gani mu ba:nu.

Okuraga kwo kwiburwa kwa Yesu

²⁶ Mu kwesi kwa kata:nu na kumwi Nyamuanga namutuma maraika Gaburieli mu musi gwa Galilaya risi:na ryagwo Najareti,

²⁷ Namutuma ku muyarajuma unu asandwaga omurume risi:na ryae Yusufu, wa mu nyumba ya Daudi. Na risi:na ryo muyara ariga:ri Maryamu.

²⁸ Maraika namu:jako na:ika ati, Murembe, awe unu wayabirwe ribando. Ratabugenyi ari aamwi na:we.

²⁹ Nawe omwene nawa Omwoyo kurwo musango ogwo, neganirisya ati, ?ni buke:sya ki bunu?

³⁰ Mbe maraika namubwira ati, Uto:baya, Maryamu, okuba wabwene ribando ku Nyamuanga.

³¹ Rora, urijira inda, uri:bura Omwana we cirume, numutoga risi:na ryae Yesu.

³² Omwene ariba mukuru. Aritogwa Mwana wa Unu ari inguru muno Na Ratabugenyi Nyamuanga arimuyana ecitebe co bukama eca saja wabo Daudi.

³³ Aritunga inyumba ya Yakobo kajanende, No bukama bwae butariwao.

³⁴ Maryamu nabu:sya maraika ati, ?Omusango gunu guriba kutiki, okuba nitana murume?

³⁵ Maraika naindura namubwira ati, Mwoyo Mweru arikwijira, na managa ga Unu ari inguru muno garikusirigisya rwa rirengesi, na unu ari:burwa aritogwa Mweru, no Mwana wa Nyamuanga.

³⁶ Rora, Elijabeti omuiri wanyu one ana inda yo mwana we cirume, mu bukwekuru bwae. Kunu nikwo okwesi kwae okwa kata:nu no kumwi, unu atogwaga omugumba.

³⁷ Okuba omusango gwone gunu oguso:ka ku Nyamuanga gutakuburwa managa.

³⁸ Maryamu na:ika ati, Rora, anye ndi mugayagasi wa Ratabugenyi. Jibe kwanye rwa kutyo wa:ikire. Mbe maraika namuso:kako.

Maryamu nake:sya Elijabeti

³⁹ Mbe mu siku ijo, Maryamu nagenda bwangu mu ca:ro ce bi:ma, mu musi gwa mu Buyaudi.

⁴⁰ Nengira mu nyumba ya Jakaria, nake:sya Elijabeti.

⁴¹ Elijabeti wejire ongwa obuke:sya bwa Maryamu, Omwana nagoma munda yae. Elijabeti ne:jura Omwoyo Mweru.

⁴² Na:ikirira inguru na buraka bunene na:ika ati, Awe una ribando mu bagasi no rwiburo rwa munda yao ruri na ribando.

⁴³ ?Gwaso:ka a:ki omusango gunu gwambona, ati, nyiramwene Ratabugenyi anyijira anye?

⁴⁴ Okuba oburaka bwo buke:sya bwao wejire bwakinga mu matwi gani, Omwana nagoma munda yani kurwo kukonderwa.

⁴⁵ Ana ribando unu ke:kirisya, okuba jiriku:misibwa ejo Ratabugenyi amubwiriye.

Okusi:ma kwa Maryamu

⁴⁶ Maryamu na:ika ati, Omutima gwani ogumukusya Ratabugenyi

⁴⁷ No mwoyo gwani ogumusandabira Nyamuanga Omukisya wani.

⁴⁸ Okuba ama:rora obwororo bwo mugayagasi wae, Okuba kuso:kerera rero amaimbo go:ne garintoga owa ribando.

⁴⁹ Okuba Owa managa a:mankorera emikuru Na risi:na ryae ni ryeru.

⁵⁰ Ne cigongo cae ecikinga ku maimbo na maimbo ga banu abamu:baya.

⁵¹ E:resisye amanaga no kuboko kwae, Anyarambuye abe cigundu mu kwiganirisya kwe myoyo jebwe.

⁵² Aso:sisye abakuru ku bitebe byebwe bya iŋoma, Nawe akusisye abo:roro.

⁵³ Abo mweko abe:gusisye ebyo bwana, Na bani:bi abairisisye hatari na ci:nu.

⁵⁴ Asaki:ye omukosi wae Israeli, ne:cuka ecigongo cae.

⁵⁵ Rwa kutyo ababwiriye basaja, Niwe Iburaimu no rwiburo rwae kajanende ko:ne.

⁵⁶ Maryamu namarayo uti me:si gesatu, nasuba ike:wabo.

Yoana Omubatija ne:burwa

⁵⁷ Mbe jisiku ja Elijabeti ejo kwibura jejire je:ya, ne:bura omwana we cirume.

⁵⁸ Abe:kasyanya bae na bo ruganda rwabo nibongwa ati, Ratabugenyi amwongesisye ecigongo cae. Nibakonderwa aamwi nage.

⁵⁹ Mbe ku rusiku rwa kata:nu na kasatu, nibaja okutenda omwana. Bariga nibenda okumutoga risi:na rya Jakaria esemwene.

⁶⁰ Nyiramwene naindura ati, Uri, nawe katogwa Yoana.

⁶¹ Nibamubwira ati, Atario wa mu ruganda rwanyu unu katogwa risi:na eryo.

⁶² Nibamujekekanyisya esemwene na maboko okumubu:sya ati, ?Owenda kumutoga esi:na ki?

⁶³ Nasabwa orubao rwo kwandikako, nandika ati, Risi:na ryae Yoana. Nibarugu:ra bo:ne.

⁶⁴ Aonao omunwa gwae nigwiguka, no rurimi rwae nirusurumuka, na:ika nasi:ma Nyamuanga.

⁶⁵ Bo:ne banu be:kasyanyisye yei nibo:baya. Ne misango ejo jo:ne nijiswira mu ca:ro co:ne ece bi:mabi:ma bya Buyaudi.

⁶⁶ Na bo:ne banu bajunguywe nibajitu:ra mu mitima jebwe, niba:ika ati, ?Omwana oyo ariba atiki? Okuba okuboko kwa Ratabugenyi kwariga kuri aamwi nage.

⁶⁷ Jakaria esemwene ne:jura Omwoyo Mweru, naraga na:ika ati,

⁶⁸ Akusibwe Ratabugenyi Nyamuanga wa Israeli, Okuba abe:jiye aba:nu bae no kubacungura.

⁶⁹ Aci:namusisye riyembe ryo mweruro mu nyumba yo mukosi wae Daudi,

⁷⁰ Rwa kutyo a:ikiriye mu kanwa ka baragi bae abe:ru kuso:kerera ku bwambiro, ati,

⁷¹ Kacionya mu baremo beswe na mu maboko ga bo:ne banu bacisokere.

⁷² Kaku:misya ecigongo cinu abaragire basaja, Ne:cuka indagano yae inyeru.

⁷³ Nico ecirairo cinu e:raisisisye saja Iburaimu ati,

⁷⁴ Kaciyana eswe okuonyibwa mu maboko ga baremo beswe, Korereki cimukorere citana bu:ba,

⁷⁵ Mu bweru na mu burengeresi imbere yae siku jeswe jo:ne.

⁷⁶ Na:we, Omwana, uritogwa muragi wa Unu ar inguru muno, Okuba uritangatira Ratabugenyi okucuma jinjira jae.

⁷⁷ No kubamenyesya aba:nu bae omweruro Mu kube:swaririra ebibi:bi byebwe.

⁷⁸ Kurwe cigongo ca Nyamuanga weswe, Ariba oruguru rwacitemera eswe kuso:ka inguru,

⁷⁹ Korereki rwakirega banu be:kae mu cisu:te na mwirengesi ryo rufu, Okurongo:ra ebigere byeswe mu njira yo murembe.

⁸⁰ Omwana nakura, nongesibwa amanaga mu mwoyo. Naba mwibara kukinga ku rusiku runu abu:risibwe ku Baisraeli.