Mariko 1 - INDAGANO INYA:YA

Okusimura kwa Yoana Omubatija

¹ Obwambiro bwe Misango jo bwana eja Yesu Kristo Omwana wa Nyamuanga.

² Rwa kutyo jandikirwe no muragi Isaya ati, Rora entituma intumwa yani imbere yao,

³ Riraka rya unu ka:ikirira inguru mwibara ati, Nimucume injira ya Ratabugenyi, mwimye jinjira jae.

⁴ Yoana naja nabatija mwibara, nasimura ebyo kubatija kwo kuta okwo kwiswaririrwa ebibi:bi.

⁵ Eca:ro co:ne eca Buyaudi, na bende Yerusalemi bo:ne nibe:muka, nibaja anu ariga:ri, nababatija mu musima gwa Yorodani, nibe:gamba ebibi:bi byebwe.

⁶ Yoana afwaraga obwose bwa ingamira, no rukoba rwo rwai mu cibunu cae, naryaga jinsige no bu:ki bwa mwibara.

⁷ Nasimura na:ika ati, Ariwo Unu ka:ja inyuma yani, unu ankirire amanaga. Oyo anye nite:ire kwinama okugesya orukoba rwe bikwirya byae.

⁸ Anye enibabatija mu manji, nawe Oyo aribabatija mu Mwoyo Mweru.

Okubatijibwa no kusakwa kwa Yesu

⁹ Mu siku ijo Yesu naso:ka Najareti ya Galilaya, naja okubatijibwa na Yoana mu Yorodani.

¹⁰ Ejire asyoka mu manji, aonao narora orwire niruba:ruka, no Mwoyo Mweru namwikira mu rususo rwa injiba,

¹¹ Oburaka nibuso:ka mu rwire nibwaika ati, Na:we Omwana wani omwendwa, unu ounkondisya muno.

¹² Aonao Omwoyo namusira mwibara.

¹³ Nabe:yo mwibara siku makumi gana, nasakwa na Syetani. Naba aamwi na matyanyi amaruru. Bamaraika mbamufurubendera.

Yesu nabirikira abe:igisibwa

¹⁴ Yoana wejire amara okutu:rwa mwiboero, Yesu naja Galilaya, nasimura Emisango jo bwana eja Nyamuanga,

¹⁵ na:ika ati, Omwanya gweya. Obukama bwa Nyamuanga bwafugee. Nimute, mwikirisye Ebigambo byo bwana.

¹⁶ Nabarama ku nyanja ya Galilaya, narora Simoni na Andereya omumura wabo nibe:sa rigo:be mu nyanja, okuba bariga bategi.

¹⁷ Yesu nababwira ati, Muje mundu:be, anye ndibakora kuba bategi ba ba:nu.

¹⁸ Aonao nibasiga rigo:be ryebwe nibamuru:ba.

¹⁹ Wejire afugerayo imbere kuto:to narora Yakobo mwana wa Jebedayo, na Yoana owabo, bari mu bwato niba-sobo:ra rigo:be ryebwe.

²⁰ Aonao nababirikira. Nibasigao Jebedayo esemwene mu bwato aamwi na bakosi bo muye:ro, nibamuru:ba.

Yesu naosya ba:fu

²¹ Nibengira Kaperinaumu. Aonao nengira mu rikofyanyisyo ku rusiku rwa isabato, ne:igisya.

²² Niba-taŋaŋara kurwo kwiigisya kwae, okuba abe:igisyaga rwo niu:nu unu amenyere kata, tari rwa bandiki.

²³ Ari-ga:rimo mu:nu ano musambwa mujabi mu rikofyanyisyo, nakunga,

²⁴ na:ika ati, ?Ecifuno niki eswe na:we, Yesu wende Najareti? ?Wejire okusimagisya? Nikumenyere awe, uri Mweru wa Nyamuanga.

²⁵ Yesu nagugonya na:ika ati, Jibira, umuso:kemo.

²⁶ Omusambwa omujabi nigumugaragasya, nigukungira inguru, nigumuso:kamo.

²⁷ Nibataŋaŋara bo:ne, nibabu:syanya niba:ika ati, ?Niki cinu? Ni kwiigisya kuya:ya. Naragirira emisambwa emijabi na managa nijimungwa.

²⁸ Aonao orukuma rwae niruswira eca:ro eco co:ne ca Galilaya.

²⁹ Wejire bauruka mu rikofyanyisyo, nibengira aonao mu nyumba ya Simoni na Anderea aamwi na Yakobo na Yoana.

³⁰ Mbe nyabuko Simoni ariga ama:mire arwae ebiri. Aonao nibamubwira kutyo ari.

³¹ Naja namugwata okuboko namwimusya. Ribiri ndimuso:kako nabafurubendera.

³² Wejire kwaba ke:goro, risu:ba ryaguye, nibamure:tera abarwae na banu bariga baungirwe emisambwa.

³³ No musi gwone nigwikofyanyisya ku muryango.

³⁴ Nabaosya ba:fu banu bariga barwae jindwara jindi na jindi, nairisya emisambwa myafu. Najiingirira okwaika okuba jariga jimumenyere.

³⁵ Namweja katondo curicuri, nagenda mwibara, nasabirwa eyo.

³⁶ Simoni na be:ja:bo nibamuru:ba.

³⁷ Nibamubona nibamubwira ati, Bo:ne abakuyenja.

³⁸ Nababwira ati, Cigende na andi mu misi jinu jiri yei, korereki nisimure eyo one, okuba eco nico cande:tere.

³⁹ Nasimura mu mekofyanyisyo gebwe mu Galilaya yo:ne, nairisya emisambwa.

Yesu naosya omugenge

⁴⁰ Omugenge namu:jako, namuremberesya namufukamira, na:ika ati, Ukenda, outura okumosya.

⁴¹ Yesu namufwira ecigongo, nagorora okuboko kwae, namukuniako, namubwira ati, Enenda. Uore.

⁴² Aonao ebigenge nibimuso:kako, naora.

⁴³ Yesu namukomeresya muno, aonao namuku:ra,

⁴⁴ namubwira ati, Wikenge utabwirako mu:nu, nawe genda wiyeresye ku mugabisi, ugwate ebyo kwerera kwao, binu Musa aragiriye, rube rusingiro ku bene.

⁴⁵ Nawe nauruka, namba okusimura no kukumusya omusango ogwo, ndijei Yesu natamibwa okusuba okwingira mu musi ogwo abweru, nawe ariga:ri emwira mwibara. Nibamutako kuso:kerera mbara jo:ne.