Markus 5 - Wa tii vwalla ge jin̰al

Zonna ge ndu ge no ge on̰om ge sone ne

¹ Zeso mage na nda ge ame hateya ma haa ge mangaɗam ga̰a̰l wa lee gene yà, àa deɗ-ɗa ge suwa ge Geraza ma way go.

² Sok ge Zeso ka̰a̰ na ko ge faa go gaw, ndu a̰me ge no ge on̰om ge sone ma na zì zuɗ ge sḭḭ ma buwal zì ya, mbo ge ne ndwa zì yà.

³ Ndu mbe sok kàɗɗa ge sḭḭ ma buwal zì. Koo ndu kaa ge zul puy ɗe, mbyaɗ feɗ ne se to.

⁴ Ago, kaa ge ɓyala ge walam pella ge na ko zì ɗaɗag, ne tok ma kaɗ vwalla se ge zul ma me. Ɗaŋɗe, ka hal zul mage ɓyala ge walam ma hal, ndu a̰me ge pool ge wan ne se be kaɗ to baɗ.

⁵ Ɗaal mage gyala, ka giwli anna ge sḭḭ ma buwal zì, ge njal ma pagal digi. Ka oyya, ka koɗ tene ge njal ma ta ɗiŋ seɗ jwaŋ ma.

⁶ Kuwa Zeso ge zum ya kaal day, ɗege soo ya, mbo ya guu na ko ge ne ndwa se.

^7-8 Oy digi ge ka̰a̰l ndaal, jan ne go: Mo Zeso ge Dok ge digi vyaw Van, mo ɓyare da mbi ta de? Ge dḭḭl ge Dok ne zì, mbi kaɗe mo go, mo iigi mbi to. Ago Zeso ka mḛḛre ne mḛḛre, ka jan ne no go: On̰om ge sone, wuwa zum ge ndu mbe zì.

⁹ Ele on̰om ge sone mbe go: A tol mo gyana de? Gwan ge ne janna go: Mbi dḭḭl «Vwag twam jan», ago i ɓase.

¹⁰ Àa kaɗe ne ge aa ta go, ne kaa ge ne yin̰a maa ge suwa mbe no go to.

¹¹ Zane no ɗe, kosoŋ ma vwag ɗu wa ya zam zam ge njal ta guwa.

¹² On̰om ge sone ma gwarge ta ge kaɗeya ge ne ta, àa jan ne go: Ge go i mbo sok ge ɗogle to ɗe, n̰a i wuwa ge kosoŋ mbe ma no zì.

¹³ Hon num vin̰a, on̰om ge sone ma ndage zum ge ndu mbe zì, àa mbo waɗ ge kosoŋ ma zì. Ge sok mbe go gaw, àa ɗege soo ge digi ya mbo kan ta ge mangaɗam ga̰a̰l ge Galile ne se yà. Àa njoɗ mam gezi. Gḛḛ ge num way kaa guwa ge dudubu zi go.

¹⁴ Nda ge ka koy num ma jay maa pe soo, àa mbo dasare fare mbe no ge suwal ga̰a̰l mage suwal ge jiyale ma diŋ. Nda ka mbo ya ndil kaŋ ge kê.

¹⁵ Àa mbo ge Zeso ta, àa kuwa ndu ge kaa ge on̰om ge sone ma ge na zì kàɗɗa angal eeya se cɔgwaɗ, ge ba̰a̰ kanna ge na ta. Ge sok mbe go, voo mbo ya wan num.

¹⁶ Num ge kuwa kaŋ ge kê mbe ge maa ndwa ma, ka wan maa ka̰a̰m fare ge zonna ge ndu mbe ge no ge on̰om ge sone ma na zì mbe ne me no, fare ge see vwag ge kosoŋ ma way pe me.

¹⁷ Ge sok mbe go, àa kaɗe Zeso ge aa ta, àa jan ne go: Ɗege zum ge i suwa go.

¹⁸ Sok ge ka gwan mbo ndee ge faa go, ndu ge on̰om ge sone ma ndage ge ne zì, ka kaɗe ne ge aa tene go, ne n̰a na mboya dagre ge na.

¹⁹ Zeso be vin ne to, jan ne go: Guwa̰ mbo ge mo yà, ge mo ka̰a̰m ma buwal zì yà, mo wan num fare ge Bagezok kê mo num ma pe peɗ. Ne ngay kuwa a̰se ge na ne ge mo ta pe gyana de?

²⁰ Ge sok mbe go, dol tene mboya, ka dasare fare ge Zeso kê na num ma peɗ ge nda ta ge Dekapol diŋ ndwa go suwal ga̰a̰l ge wol ma. Nda ge ka za̰a̰ ne ma peɗ ka kee ajab.

Tanna ge jayrus van ge gwale ne mage zonna ge gwale ne

²¹ Sok ge Zeso guwa̰ ge mam wa lee gene yà ge faa, ɓase ma nɔnɔg mbo ya twageya ge ne ta iya. Ne sḛ gaa kàɗɗa ge mangaɗam ga̰a̰l ge Galile ne wa go.

²² Ge sok mbe go, ɗu ge ga̰a̰l ge zok kee kaɗeya ge Yahuɗ ma way ne ma buwal zì, ge àa tol ne Jayrus, kuwa ne, mbo ya guu na ko ge ne ndwa se,

²³ kaɗe ne ge aa tene, jan ne go: Mbi van ge gwale ge jiyale wa ɓyare yà dibiya, mbo ya mo kee kaɗeya ge ne pagal nde, ndwa go ne see zonna, ne kaa ge ne suu to.

²⁴ Zeso mage ne ɗege ya dagre, ɓase ge nɔnɔg ma ka kàre ne pe ya, gḛḛ ge num way kaa ge go ne seɗ vin̰a ge daa mboya kwaɗa ge num buwal zì to me.

²⁵ Ge sok mbe go, gwale a̰me ɗu waɗme ge kee ya del wol pɔgwa zi ge swàm na ta,

²⁶ ge njoɗ yal ya gḛḛ ge nda ge kee jiyam ma tok go pe hini-hini, ban kaŋ ge na tok go ma ya kakaɗag, be seɗ zonna to. Go no puy ɗe, ne yal mbe ka zam zḛḛ zḛḛ.

^27-28 Sok ge mbo ya za̰a̰ fare ge Zeso ne go, ago ka dwaɗ ge na dul wa zì go: Daa no go mbi see vin̰a ge taɗ ne ba̰a̰ ɗeŋew puy ɗe, mbi mà seɗ zonna. Ɓirsi ge ɓase ma buwal zì yà, ɗiŋ mbo taɗ ne ba̰a̰ ge guwa̰.

²⁹ Ge sok mbe go gaw, swàm ge ka kan ne ta mbe ɔwabe, kuwa ge na duul ta go na seɗ zonna ya go ge na yal mbe zì.

³⁰ Zeso kuwa ge na sḛ zì gaw go, pool a̰me ndage ya zum ge na zì. Seŋe tene se ge nda buwal zì, ele sok go: A huɗi taa mbi ba̰a̰ ne de?

³¹ Ne nda ge ame hateya ma gwan ge ne janna go: Mo gwan ele go a huɗi taa mo ne de no, mo kuwa kuwa go sok yagle nè go yagle to de?

³² Ndil sok ge na ziya ndwa kuwa ndu ge kê kaŋ mbe.

³³ Sok ge gwale kuwa go ne ndil sok ge na ziya go, voo wan ne, ka ndaɗɗa ririg me. Ajo̰o̰ na kuwa go na zon-na go, mbo ya guu na ko ge ne ndwa se, wan ne fare ge fareba ge yal ge na see pagal mɔɗwag.

³⁴ Ɗaŋɗe, Zeso jan ne go: Mbi van, hoɗ fareba ge amo zon mo ya go. Mbo ge halas, mo seɗ zonna ya go ge yal ge amo zì.

³⁵ Gale sok faaya go, nda a̰me ma waɗ ge ga̰a̰l ge zok kee kaɗeya ge Yahuɗ ma way Jayrus diŋ ya, àa mbo ya jan ne go: Mo van ge gwale wa dibiya yà, kaa ge mo lwage Ba ge hateya daa to.

³⁶ Ɗaŋɗe, Zeso be ee na tɔgwa ge num fare janna mbe ma ta to. Jan ga̰a̰l ge zok kee kaɗeya ge Yahuɗ ma way go: Iigi tene to, ɗeŋew go mo kaa ge hoɗ fareba.

³⁷ Ge sok mbe go, be vin go ndu a̰me mbo ya ge na pe go to, ɗeŋew Piyer ɓanna ge Jak mage na na̰ van Yohana.

³⁸ Sok ge Zeso yin̰a ya guwa ge ga̰a̰l ge zok kee kaɗeya ge Yahuɗ ma way zok ɗe, kuwa nda ɔwabe ya mḛḛya digi ge maa ko cim, àa ka lomen̰a, àa ka fyalla.

³⁹ Sok ge wuwa ya diŋ, jan num go: Ge dape, ḛ wa ka kee kṵwa̰ mage fyalla gḛḛ go de? Van kale mbe be suu suu to, ɗaŋɗe, fii go dwam.

⁴⁰ Ge ne fare janna mbe ma no pagal, àa ka coɗ ne. Ge sok mbe go, yan nda zum peɗ, tol van ba mage ne na̰ ɓanna ge na nda ge ame hateya ge taa ge maa ge num mbo ya dagre ma, àa waɗ mbo ge zok ge àa doo van no ne zì.

⁴¹ Wan van kale tok, jan ne go: Talita kumi! Ne pe wanna go: Van kale, mbi jan mo go mo ɗege digi!

⁴² Ge sok mbe go gaw, van kale za̰a̰me digi, ɗege gaa mboya, ago kaa ge del wol pɔgwa zi. Sok ge àa kuwa ano mbe no go, àa daa gwan kuwa fare ge janna to, àa gaa kee ajab.

⁴³ Zeso hoɗ num na wa ndaa kaka go, ne kaa ge ndu a̰me ɗu za̰a̰ fare mbe to. Gwan jan num go, num ho̰ van kale mbe kaŋ zam.