Markus 10 - Wa tii vwalla ge jin̰al

Hateya ge Zeso ne ge san ta mage saaya pagal

¹ Zeso ɗege ge sok mbe go, mbo ge suwa ge Jude ne yà, haa mbo mangaɗam Urdun wa lee gene yà. Ge sok mbe yà, ɓase ma gwan kwateya ge ne ta, ne sḛ ɗege hate num, ge na dana hate din go.

² Farisi a̰me ma mbo ya ge ne ta ndwa hee ne pe, àa ele ne go: Vin̰a a̰me hage go ge eeya ge Moyiz ne ma pagal ge ndu son pe go ne yin̰a na gwale de?

³ Gwan ge num janna go: Moyiz ho ḛ na wa ge fare mbe pagal gyana de?

⁴ Àa jan ne go: Moyiz ho̰ vin̰a go àa njaŋe lawayta ge saa sanna ne, kaɗɗa ndu ɓyare yan na gwale.

⁵ Ne sḛ jan num go iya: A ge dul wa ndaa ge ḛ ḛ ma pe, Moyiz njaŋe ḛ wa yuwaleya mbe no.

⁶ Ɗaŋɗe, ge pe dolla ge kaŋ ma way go, Dok kee ndu son mage ndu gwale.

⁷ A ge pe no, ndu son mbo n̰a na ba mage na na̰, mbo mbarge ge na gwale,

⁸ num sḛ ma jwàg mbo seŋe ge ndu ɗu go. Go mbe no, àa daa nda zi to, ɗaŋɗe, àa gaa ge ndu ɗu go.

⁹ Ne kaa ge ndu saa kaŋ ge Dok vuwa ne to.

¹⁰ Sok ge àa mbo ya ge zok diŋ, ne nda ge ame hateya ma gwan ele ne fare, ge fare mbe pagal.

¹¹ Jan num go: Ndu ge diige ge yan na gwale ya, gwan san ge ɗogle, kee zina.

¹² Kaɗɗa ndu gwale n̰a na obe ya mbo san ge ɗogle, kee zina waɗme.

Wa tare ge Zeso kê ge nda jabso pagal

¹³ Nda a̰me ma gene Zeso nda jabso a̰me ma ya ndwa go ne ee na tok ma ge num pagal kee num wa tare. Ɗaŋɗe, ne nda ge ame hateya ma ɗege mḛḛre num.

¹⁴ Sok ge Zeso kuwa num go, ne laa hoɗ, jan num go: Ḛ n̰a nda jabso, num mbo ya ge mbi ta, ḛ kaa ge be tele num to. Ago, muluk ge Dok ne, a ge num ge dḭḭ ta ge nda jabso mbe ge go ma pe.

¹⁵ Fareba mbi jan ḛ ne no: Ndu ge mbo gwan ge na pagal ya ge Dok pe se, dinna ge van jiyale go, ndwa go ne kee muluk na pagal, a ne sḛ ɗeŋew mbo waɗ ne muluk zì.

¹⁶ Guwa̰, wan nda jabso mbe ma ya ge na ta zì, ee na tok ma ge num pagal ɗu ge ɗu, kee num wa tare me.

Ndu ge pwal

¹⁷ Sok ge Zeso ɗege mboya, ndu a̰me ɗu chiya ya ne ndwa zì, mbo ya guu na ko ge ne ndwa se, ele ne go: Ba ge hateya ge kwaɗa, a ma̰ kaŋ ge mbiya mbi kee nee ne ndwa hon mbi vin̰a ge mbo kaɗ ge ndwa ge ɗiŋ ge din ge Dok de?

¹⁸ Zeso jan ne go: Ge dape, mo wa tol mbi ndu ge kwaɗa de? Ndu a̰me ge kwaɗa ɗu to, ɗeŋew Dok.

¹⁹ Mo kuwa wa yuwaleya ma kuwa: Hṵṵ swày to, ke zina to, chee kaŋ to, ke sayda ge hày ge ndu pagal to, lase ndu a̰me wa, mo wa ame ne kaŋ to, ho̰ mo ba mage mo na̰ hormo.

²⁰ Ndu mbe gwan ge ne janna go: Ba ge hateya, mbi mbo go num pagal peɗ ge mbi bogol ya day.

²¹ Zeso ndil ne ɗer, ne fare deɗ ge ne laa zì, gwan jan ne go: A̰me ɗu hoɗege mo go gale iya: Yiya mo kaŋ gan ma gezi mɔɗwag, va a̰se ma num bware mbe, go mbe no, mo mbo seɗ kaŋ gan ge pḭḭ ma zì yà. Guwa̰, mbo ya, mo kàre mbi pe me.

²² Ɗaŋɗe, sok ge ndu mbe za̰a̰ fare mbe ma go, ne ndwa mbo ya suu se leɗeɗ, daa za̰a̰ tii to, dol tene mboya, ago kaa gan njonjon̰.

²³ Zeso ndil sok ge na ziya go, jan na nda ge ame hateya ma go. A haŋle ge go nda ge no ge kaŋ gan ma wuwa ge muluk ge Dok ne zì!

²⁴ Nda ge ame hateya ma kee ajab ge ne fare janna mbe ma pe. Ɗaŋɗe, gwan jan num go: Mbi van ma, a haŋle ge go ndu wuwa ge muluk ge Dok ne zì.

²⁵ A fogo waɗeya, ge jambal ge jujul zi waɗ ge libra ndwal zì, ge go ndu ge gan waɗ ge muluk ge Dok ne zì.

²⁶ Àa gwan kee ajab waɗeya, àa ka jan ta, ge ta buwal zì go: Kaɗɗa na mbe go, a huɗi ge pool seɗ monna ne ɗaŋ de?

²⁷ Zeso ndil num bàa, jan num go: Ano mbe ndil haŋle ge nda duwana ma ndwa zì, ɗaŋɗe, a haŋle ge Dok ta to, ge dape, a ge pool kee kaŋ ma peɗ.

²⁸ Piyer ɗege jan ne go: O̰o̰, i n̰a kaŋ ma ya ya peɗ, i kàre mo pe ya no.

²⁹ Zeso gwan ge ne janna go: Fareba mbi jan ḛ ne no, ndu a̰me ɗu ge mbo n̰a na zok, na na̰ van ge soɗob ma, ge zaab ma, na na̰, na ba, na van ma, koo na sok ma ya ge mbi pe, ge Fare ge Kwaɗa pe,

³⁰ ndu mbe mbo seɗ poɗɗa ndwa kis ge zaman ge màge no zì ndwa go zok ma, na̰ van ge soɗob ma, ge zaab ma, na̰ ma, van mage sok ma. Mbo za̰a̰ yal waɗme, ɗaŋɗe, mbo seɗ ndwa ge ɗiŋ ge din ge zaman ge mbo no ya go.

³¹ Ɗaŋɗe, nda gḛḛ ge no zḛḛ ge sego ma mbo gwan guwa̰, ge no guwa̰ ya ge sego ma gḛḛ mbo seŋe ya zḛḛ me.

Zeso wuwage swày mage tanna ge na ne ge ndwa taa

³² Guwa̰, Zeso mage na nda ge ka kàre na pe ma kan ta ge vin̰a go mbo Jerusalem. Ne sḛ ka mbo ge num ndwa zḛḛ, ne nda ge ame hateya ma kaa ge iigiya, ɓase ge ka kàre ne pe ma kaa ge voo me. Zeso gwan tol na nda ge ame hateya ge wol pɔgwa zi ma ya gezi iya, ɗege jan num fare ge mbo seɗ na ya ma.

³³ Ḛ kuwa ge sego, nè mbo go Jerusalem, àa mbo ɓyan mbi, Van ge Ndu ne, ge ga̰a̰l ge nda ge kee tuwaleya ma way mage nda ge hate eeya ge Moyiz ne ma tok go. Àa mbo wan ne ge sariya ge ee ne mbo swày, àa mbo ɓyan ne ge nda ge no rusu Yahuɗ zì to ma tok go me.

³⁴ Nda mbe ma mbo lasage ne, àa too watwa ge ne ta, àa keme ne ge bol, àa hun ne me. Ge dwam taa guwa̰, mbo tan digi.

Kaŋ ge Zebede van ge soɗob ma ele

³⁵ Zebede van ma, Jak mage Yohana gwan ta ya ge Zeso ta zì guwa, àa jan ne go: Ba ge hateya, i ɓyare go mo ke i kaŋ ge i mà ele mo ne ya.

³⁶ Gwan ge num janna go: Ḛ ɓyare go mbi ke ḛ da de?

³⁷ Àa gwan ge ne janna go: Sok ge mo mbo kaɗ-ɗa ge muluk pateya ge amo pagal, vḭḭ i go, ndu ge ɗu kaa ge mo tok matoson pagal go, gegene mo tok magul pagal me.

³⁸ Zeso gwan ge num janna go: Ḛ wan kaŋ ge ḛ ele mbi ne pe to. Ḛ ge pool ge njoɗ kob ge yal za̰a̰ya ne ge mbi mbo njoɗ ne ya, koo kee baptem ge njon̰n̰a ne ge mbi mbo kee ne ya de? Àa gwan ge ne janna go: I ge pool ge kee num.

³⁹ Gwan ge num janna go: A fareba go, ḛ mbo njoɗ kob ge mbi mbo njoɗ ne ya, kee baptem ge mbi mbo kee ne ya me.

⁴⁰ Ɗaŋɗe, kaɗɗa ge fare ge kaɗ ge mbi tok matoson mage mbi tok magul pagal ne ɗe, a be mbi fare ne to. Ɗeŋew Dok tal nda ge sok mbe ee ge num pe ma ne.

⁴¹ Sok ge nda ge ame hateya gegene ge wol ma za̰a̰ fare mbe go, num laa ɗege hoɗɗa ge Jak mage Yohana ta.

⁴² Zeso tol num ya mɔɗwag ge na ta, jan num go: Ḛ kuwa kuwa go ɓase ge no rusu Yahuɗ zì to ma, num gan ga̰a̰l ma kee num liliɗ, num ga̰a̰l ma ka luguy num me.

⁴³ Ɓyare go ge ḛ buwal zì ne kaa go to. Ɗaŋɗe, ndu ge diige ge ɓyare kaɗ ga̰a̰l ge ḛ buwal zì, ne seŋe ndu ge kee tèmel hon ḛ.

⁴⁴ Ɗaŋɗe, ndu ge diige ge ɓyare go na kaɗ ḛ ndwa zḛḛ, mbo seŋe ge ḛ moor sḛ go.

⁴⁵ Ago mbi, Van ge Ndu ne, mbi be mbo ya go nda ke tèmel hon mbi to, ɗaŋɗe, mbi sḛ ke tèmel hon nda ne, mbi hon tene gezi ndwa zuu nda gḛḛ ge num sone ma go me.

Zonna ge ɓaal Bartime ne

⁴⁶ Zeso mage na nda ge ame hateya ma, ɓanna ge ɓase ma ge na pe go nɔnɔg deɗ-ɗa ge suwal Jeriko diŋ. Sok kale mbo waɗ zum yà go, ndu ge ɓaal a̰me ɗu ge àa tol ne Bartime, ge Time van, wa ya kàɗɗa ge vin̰a kin̰a go kaɗe kaŋ.

⁴⁷ Sok ge za̰a̰ go ne Zeso ge suwal Nazareɗ ne kale ne, ɗege oyya ge ka̰a̰l ndaal go: Zeso ge Daviɗ Baŋ, kuwa mbi a̰se!

⁴⁸ Nda gḛḛ ka mḛḛre ne go ne dibi na wa, ɗaŋɗe, gwan ka aa na pe oyya digi ndaal waɗeya go: Gan ga̰a̰l Daviɗ Baŋ, kuwa mbi a̰se nde no de!

⁴⁹ Zeso mḛḛ se jan go: Ḛ too mbi ne ya. Àa tol ndu ge ɓaal mbe ya, àa jan ne go: Ee mo dul wa se, ɗege digi, tol mo go.

⁵⁰ Ɓaal fwage na ba̰a̰ ga̰a̰l kapoɗ, cigi ne gezi yà, za̰a̰me digi avun cab, mbo ge ne ta yà.

⁵¹ Zeso ele ne go: Mo ɓyare go mbi ke mo da de? Ndu ge ɓaal gwan ge ne janna go: Ba ge hateya, n̰a go mbi kuwa sok.

⁵² Zeso jan ne go: Mo ge pool mboya, hoɗ fareba ge amo, mon mo ya go. Avun cab ne ndwa hage, gaa anna ge Zeso pe go.