Luka 1 - Wa tii vwalla ge jin̰al

Fare pagal hageya

¹ Ba ge hormo gḛḛ Tewofil, ajo̰o̰ nda gḛḛ ɗege ceme fare, ndwa njaŋe kaŋ ge ka kee ge nè buwal zì ma,

² dinna ge nda ge kuwa kaŋ mbe ma ge maa ndwa, ge pe eeya ya day, àa seŋe nda ge oy Fare ge Kwaɗa ma no, àa dee ya wan nè num pe no,

³ mbi vḭḭ tene no go, mbi sḛ waɗme, sok hale fare mbe ma pe kwaɗa hetel go, ge num pe eeya ya day, mbi nuusi mo num njaŋeya ge maa vin̰a go jeɗemer.

⁴ Mbi kee ne ndwa go mo dee ya kuwaya tyatyaɗ go, hateya ge mo see num mbe ma no, num hateya ge fareba ma ne.

Wuwageya ge tolla ge Yohana ba ge kee nda baptem ne

⁵ Ge zaman ge Heroɗ ne go, gan ga̰a̰l ge kaa ge suwa ge jude ne pagal, ba ge kee tuwaleya a̰me ɗu, ge àa ka tol ne Zakari, ge doŋ pe ge Abiya ne go, ne gwale wuwa ge rusu ge Aaro̰ ne zì me, àa ka tol ne Elizabeɗ.

⁶ Num sḛ ma jwàg kaa nda ge temel ma, ge Dok ndwa se, àa ka mboya jɔbɔl ge eeya mage wa yuwaleya ge Bagezok ne ma pagal.

⁷ Ɗaŋɗe, àa kaa be van ge dape, Elizabeɗ ba̰a̰ gisil, num sḛ ma jwàg sabe ya gḛḛ ge be tol van to.

⁸ Sok ge ga̰a̰l dee Zakari mage na ka̰a̰m ge gòŋ ma go, ne dwam kee tèmel tuwaleya a̰me go ɗu, ge zok ge Dok ne zì,

⁹ ge mojo̰o̰ nda ge kee tuwaleya ma ha̰a̰le keeya go, deɗ-ɗa go daŋ dee ne, ndwa waɗ ge sok ge harcal ge Bagezok ne ziya yà, mbo ɗusi ɔwara ge huu tii ma.

¹⁰ Sok ge àa ɗege ɗusi ɔwara ge huu tii mbe go, ɓase ma kaɗ tabeya zum didib, àa ka kee kaɗeya me.

¹¹ Ge sok mbe go waɗme ɗe, malayka ge Bagezok ne dyan tene ge ne ta, mḛḛya ge twal tuwaleya ge àa til ɔwara ge huu tii ma no ne pagal, lee ge matoson go.

¹² Sok ge Zakari ka̰a̰ na ndwa kuwa ne, iigi digi, voo mbo ya wan ne.

¹³ Ɗaŋɗe, malayka mbe jan ne go: Zakari, chiya voo to, ago Dok za̰a̰ mo kaɗeya ma ya go. Mo gwale Elizabeɗ mbo tol mo van son ɗu, mo mbo hon ne dḭḭl Yohana.

¹⁴ Mbo ee mo kee laa saal mage kàɗɗa fafan̰, nda gḛḛ mbo kee laa saal ge ne tolla pe.

¹⁵ Ago mbo kaɗ ndu ge ngaraŋ ne ge Bagezok pe, mbo njoɗ on̰or jìn̰al koo jìn̰al ge ɗogle a̰me ge fere nda to me, On̰om ge Harcal mbo biri ne iya ge na na̰ laa zì ya day.

¹⁶ Mbo gwan ge Izrayel van ma ya gḛḛ ge Bagezok Dok ge num way ta.

¹⁷ Mbo mbo ya ge mojo̰o̰ temeya ge Dok ne go, ge on̰om mage pool ge Eli kaa ge num ma, ndwa gwan ge ba mage van ma dwaɗɗa ma ya ge sok ge ɗu go, ee nda ge birtiŋ ma dwaɗɗa ge mojo̰o̰ nda ge temel ma dwaɗ go, ee ɓase nuusiya guwa ge ame Bagezok.

¹⁸ Zakari jan malayka go: A ge ma̰ kaŋ ta ɗoo, mbi wa mbo kuwaya go fare ge mo jan ne fare ge fareba ne de? Ago mbi haɗ-ɗa sabar iya, mbi gwale puy ne del ma kee ya gḛḛ me.

¹⁹ Malayka gwan ne fare janna go: A mbi Gabriyel, gorpol ge Dok nee ne. Ne sḛ teme mbi ya jan mo fare, ndwa wuwage mo Fare ge Kwaɗa mbe no.

²⁰ Ajo̰o̰ mo be hoɗ fareba ge fare janna ge ambi mbe ge Dok mbo huy num wa ya ge maa sok ma go tem ma pagal to ɗe, za̰a̰ gale: Mo ɗel mbo taɗ, mo mbo ɗege faa wa ge sok ge fare mbe ma wa mbo huyya ne mbḛḛ.

²¹ Ɓase ma sok da̰a̰re Zakari go, àa ka kee ajab ge ne pagal wanna ge wa̰a̰ kaal ge sok ge harcal zì yà pe.

²² Ɗaŋɗe, sok ge wuwa ya zum go, seɗ wa ge faaya to, gaa kaa num na tok, ne ɗel gaa se taɗɗa baba, num sḛ ma kuwa go ne see fare taaya a̰me ge zok ge Dok ne zì ya.

²³ Dwam ge ne tèmel keeya ma wa huy go ɗe, gwan mbo na diŋ yà,

²⁴ Guwa̰ ge fare mbe ma way go, ne gwale Elizabeɗ hee emel. Ka way tene ge na emel mbe ɗiŋ saba nuwan̰, ka jan na laa zì go:

²⁵ Ḛ ndi kaŋ ge Bagezok kee ya ge mbi ɗoo me, ge sok ge na vḭḭ tene ndage mbi ge daŋso zì go tem, ge nda duwana ma buwal zì ba!

Wuwageya ge tolla ge Zeso ne

²⁶ Elizabeɗ waɗ ja na saba ge menengal zì, Dok teme malayka Gabriyel ya ge suwa ge Galile ne go, ge suwal ga̰a̰l ge àa tol ne Nazareɗ diŋ.

²⁷ Teme ne ge van gwale ge na na̰ tok jan ta, ne ge ndu son a̰me ge àa ka tol ne Jozef, ge no rusu ge Daviɗ ne zì ka dwam ne. Van gwale ge na̰ tok jan mbe dḭḭl kaa Mari.

²⁸ Waɗ-ɗa ge ne ta diŋ, jan ne go: Wa sanna mo ta, Bagezok ngay kwaɗa keeya ge na ne ya mo ta, a ɓanna dagre ge mo.

²⁹ Fare mbe ma iigi ne digi giliw, ka ele tene go wa sanna ge go mbe ma pe wanna gyana de?

³⁰ Malayka gwan jan ne go: Chiya voo to, Mari, ago Dok ngay kwaɗa keeya ge na ne ya go mo ta.

³¹ Kuwa go, mo mbo hee emel, mo mbo tol van son ɗu, mo mbo hon ne dḭḭl go Zeso.

³² Mbo kaɗ ndu ge ciciliŋ ne, Dok ge no pḭḭ ma zì yà mbo tol ne na van. Bagezok Dok, mbo hon ne pool ge kee muluk ge ne baŋ Daviɗ kaa go.

³³ Mbo kee muluk ge rusu ge Jakob ne pagal ɗiŋ ge din, ne muluk mbe mbo aa to baɗ.

³⁴ Mari gwan ge Malayka janna go: Ano mbe mà deɗ-ɗa keeya pe gyana de? Ago mbi be kuwa ndu son ɗu to me ɗe!

³⁵ Malayka gwan ne fare janna go: On̰om ge Harcal mbo kee na tèmel ma mo zì, Dok ge pool ge no pḭḭ ma zì yà mbo kulbi mo se ge mojo̰o̰ soŋon̰ go. A ge pe, mbo ee nda tol ne Dok Van, sok ge van ge harcal mbe mbo tol-la go.

³⁶ Kuwa go Elizabeɗ ge mo pe rusu waɗme, a sabe ya no puy ɗe, a go ge emel, van son ge na laa zì, ne mbe ge nda ka dwaɗɗa go ne ba̰ gisil, wuwa ya ge na saba ge menengal zì no.

³⁷ Ago, kaŋ a̰me ge haŋle ge Dok ta to.

³⁸ Sok mbe go Mari jan ne go: Moor kale ge Bagezok ne no, mbi vin go go Dok kee na laa ɓyareya ge mbi ta ge mojo̰o̰ mo jan mbi ne no go. Malayka n̰a ne, mbo.

Ndilla ge Mari mbo ndil Elizabeɗ

³⁹ Ge dwam mbe ma guwa̰ swag, Mari haa tene vun cab, ndwa mbo suwal ga̰a̰l a̰me yà, ge no suwa ge Juda ne sok a̰me ge njal ma no ne go.

⁴⁰ Sok ge dee yà, waɗ-ɗa ge Zakari zok diŋ, hon Elizabeɗ na wa sanna ma.

⁴¹ Ɗeɗ-ɗa go, sok ge Elizabeɗ za̰a̰ Mari ka̰a̰l san na wa, van ɗege n̰aɗe tene ne laa zì. On̰om ge Harcal mbo ya biri Elizabeɗ.

⁴² Sok mbe go, oy digi ge ka̰a̰l ndaal go: Mo go ge wa tare ge nda zaab buwal zì, wa tare go ge van ge mo laa zige pagal me.

⁴³ Mbi daa huɗi ne ge go, mbi Bagezok na̰ wa mbo waɗɗa ge mbi ɗiŋ de?

⁴⁴ Kuwa gale, sok ge mo ka̰a̰l dee ya mbi tɔgwa zì, sok san mbi wa go, van ɗege n̰aɗe tene ge mbi laa zì no ndwa kee laa saal.

⁴⁵ Laa saal ge mo pe, ge dape, mo hoɗ fareba go go, Bagezok Dok huy fare ge na wuwage mo num ma wa huy.

Gagso mballa ge Mari ne

⁴⁶ Sok mbe go, Mari jan go: Mbi sḛ uware Bagezok.

⁴⁷ Mbi ge laa saal fafan̰ ge mbi on̰om zì, Ge Dok, mbi Ba ge monna pe,

⁴⁸ Ge dape, ndii hoɗegeya ge na moor kale ne. Kuwa go, ge sego nda duwana ma ge doŋ pe ma go peɗ Mbo gaa janna go, mbi gwale ge see wa tare ne.

⁴⁹ Ge dape Ba ge pool waɗe-waɗe Kê kaŋ ge ɓaŋlaŋ ma ge mbi pe. Ne dḭḭl Ba ge Harcal.

⁵⁰ Ngay kuwa a̰se ge na ne ge nda ge chiya na voo ma ta, Doŋ pe ma ge doŋ pe ma.

⁵¹ Ge tok pool ge na ne ta, Nda ge no ge dwaɗɗa ge pagal ga̰a̰l Ge maa dul wa zì ma be seɗ sok ge ee maa ko se to.

⁵² Yin̰a gan ga̰a̰l ma gezi Ge maa hòol muluk ma pagal ge tok pool ge na ne no, Ɗaŋɗe, hê nda ge suul lɔlɔgwaɗ ma pagal digi no.

⁵³ Ge camal ma, Ee num an̰n̰a ge kaŋ kwaɗa ma, Num ge gan ma me ɗe, N̰a num no tok bam-bam me.

⁵⁴ Chiya Izrayel na ndu ge tèmel kṵwa̰ no, Ge kuwa a̰se ge na ne pe, Be vyale ge ne to.

⁵⁵ Ano a wa tii ge ke nè baŋ Abraham Mage na rusu ma nee ne, Ge ndwa ɗiŋ ge din.

⁵⁶ Mari kaɗ ge Elizabeɗ, guwa ge saba taa, guwa̰, gwan mbo na sok kàɗɗa yà.

Tolla ge Yohana ne

⁵⁷ Sok ge Elizabeɗ dwam kee twàl mbiya go, mbo ya tol van son.

⁵⁸ Ne nda ge zok pe mage ne rusu ma za̰a̰ go, Bagezok ngay kuwa a̰se ge na ne ya ne ta, àa kee laa saal ɓanna ge ne.

⁵⁹ Ɗeɗ-ɗa dwam ge wa gezi zi, ne tolla guwa̰, àa mbo ya vyan van bḛḛ, àa ɓyare hon ne dḭḭl ge ne ba ta, ndwa go Zakari.

⁶⁰ Ɗaŋɗe, ne na̰ hee fare, jan num go: To, ɓyare nè too ne Yohana.

⁶¹ Àa gwan ge ne janna go: Ge ḛ rusu zì, a huɗi ge àa ka tol ne ge dḭḭl mbe no ne de?

⁶² Àa ɗege kaa ne ba tok ele ne ndwa kuwaya go, ne ɓyare tol ne gyana de?

⁶³ Zakari ele byalga van ɗu, njaŋe ya ne go go: Ne dḭḭl Yohana. Nda peɗ mbo ya kee ajab.

⁶⁴ Ge sok mbe go gaw, ne wa hage, ne ɗel fen digi, ɗege faa wa, ee pe sale Dok.

⁶⁵ Voo mbo ya wan nda ge num zok pe ma peɗ. Nda ge kaa no njal kin̰a ge Jude ne go ma peɗ gaa ge fare mbe siɗigiya.

⁶⁶ Nda peɗ ge fare mbe ma dee num tɔgwa zì ma koy num ge maa dul wa ma zì. Àa ka ele ta go: Van jiyale mbe mbo kaɗ de gyana de? Ago, pool ge Bagezok ne kaa dagre ge ne.

Kaŋ mballa ge Zakari ne

⁶⁷ On̰om ge Harcal mbo ya huy van kaare ba Zakari, sok mbe go, ɗege jan fare ge ka̰a̰l ge nda ge zwagre Dok wa ma way go:

⁶⁸ Bagezok, Dok ge Izrayel van ma way Dḭḭl see uwareya, Ge dape duwa ge nè, Ɓase ge na ne ma, zû nè no.

⁶⁹ Ho̰ ne Ndu ge mon nda ge mbyaɗɗa tab, Ge na ndu ge tèmel Daviɗ rusu zì,

⁷⁰ Dinna ge dee jin̰a fare mbe ge zḛḛ ya day Ge na nda ge zwagre na wa ge harcal ma wa zì go:

⁷¹ Na mbo mon nè ge nè nda ge ho̰o̰l ma tok zì ya, Ge nè nda ge kone nè ma tok ya peɗ me.

⁷² A go mbe no, ngay kuwa a̰se ge na ne ge nè baŋ ma ta no. Be vyale ge na wa tii ge harcal ge na vuwa to,

⁷³ Ajo̰o̰ na guni tene ge nè baŋ Abraham ta,

⁷⁴ A go mbe no, guwa̰ ge mo̰o̰ nè ge nè nda ge ho̰o̰l ma tok zì ya, Hon nè pool ndwa kee na tèmel be voo no,

⁷⁵ Ge harcal zì, ge temel pagal me, ge na ndwa se, Ge dwam kàɗɗa ge nè ne ma zì peɗ.

⁷⁶ Kaɗɗa ge mo ɗe, van jiyale, Mo mbo kaɗ ndu ge zwagre Dok ge no pḭḭ ma zì yà wa, Ago mo mbo mbo ya nè Bagezok ndwa zḛḛ, Ndwa nuusi ne vin̰a ma.

⁷⁷ Ndwa tyan ɓase ma pagal gezi go, Bagezok mbe ge pool mon num, Sok pore num num sone ma go.

⁷⁸ Ano mbe dee ya keeya ge kuwa a̰se Ge be walape ge Dok ge nè ne ta. Mbo ee kɔn̰al zen ge pḭḭ zì ya nè pagal, Dinna ge gyala ge ndaa ge mbii ya go,

⁷⁹ Tyan kɔn̰al ya, Ge num ge kaa no ge tṵṵ ge ɗeɗeg ge swày ne zì ma ta, Ndwa ee nè ko ma mboya ge vin̰a pul ge halas ne go.

⁸⁰ Kaɗɗa ge van jiyale ɗe, ka donna, ka haɗ pool ge na on̰om zì. Ka walla ge babur pul yà, ɗiŋ ge dwam ge dee ya ngay tene ge ɓase ge Izrayel ne ma ta.