Filemo̰ 1 - Wa tii vwalla ge jin̰al

Ngay ta zum mage wa sanna

¹ Mbi Pol, ndu ge no ge daŋay zì ge tèmel ge Zeso Krist ne pe, ɓanna ge na̰ van Timote, i njaŋe lawayta mbe no ne hon mo Filemo̰, i na̰ van ge laa wanna ge kee tèmel no dagre ge i, i sa̰a̰ mo wa.

² I njaŋe ne ge ɓase ge Krist ne ge kwate no ge mo diŋ ma pe, ge nè na̰ van ge gwale Afiya pe, ge Archib nè na̰ van ge mbal twam no go dagre ge nè pe waɗme.

³ Mbi kaɗeya go, Dok ge nè Ba mage nè Bagezok Zeso Krist ngay kwaɗa keeya ge maa way ge ḛ ta, num ee ḛ kàɗɗa halas me.

Mersi keeya hon Dok

⁴ Na̰ van Filemo̰, mbi gwan ge mersi keeya ɗaɗag hon Dok ge ambi ge mo pe, sok ge mbi kaɗ kee kaɗeya ma go.

⁵ Ge dape, mbi za̰a̰ fare ge kwaɗa ge mo kee num ma go, ndwa go laa wanna ge mo ngay ne no ge nda ge ho fareba ma ta, ge hoɗ fareba ge amo ge mo ho ne no ge nè Bagezok Zeso ta me.

⁶ Mbi kaɗe Dok go, hoɗ fareba ge amo, ge ɓa̰a̰ mo no ge i ge Zeso Krist ta, ne kaa hoɗ fareba ge kee tèmel. Go mbe no, ngay kaŋ ge kwaɗa ge nè no go ge num ma peɗ zum, ge ɓanna ge nè ɓa̰a̰ ge Zeso Krist pe.

⁷ Mbi kaa ge laa saal, mbi see laa eyalla no gḛḛ me, ge dape, na̰ van, laa wanna ge amo ee nda ge ho fareba ma ya seɗ pool.

Kaɗeya ge Pol ne ge Filemo̰ ta ge Onezim pe

⁸ Mbi Pol, mbi go ge kaŋ a̰me ɗu ge mbi ɓyare ele ne no ge mo ta. Ajo̰o̰ mbi see vin̰a mbe ge Krist ta ɗe, mbi ge pool ge hoɗ mo mbi wa go, mo ke kaŋ ge mo mbiya kee ne.

⁹ Ge go mbi jin̰a mo ne ge pool ɗe, ne nde-nde go mbi jan mo ne ge laa wanna ge nè no ge ne, ge Krist ta. Mbi ge sabe ya no paŋ, ge no daŋay zì ge tèmel ge Zeso Krist ne pe,

¹⁰ mbi kaɗe mo ge mbi van Onezim pe, ne ge mbi seŋe ya ne ba ge on̰om zì, ge sok kee daŋay no go.

¹¹ Dee wal, ne sḛ kaa ndu ge be mbaa mo ge fare ne. Ge sego, seŋe ya ndu ge mbaa fare ge nè ge mo pe.

¹² Ge sego, mbi gwan teme mo ne yà, ame ne ge mojo̰o̰ van ge wuwa ge mbi sḛ zì go.

¹³ Ajo̰o̰ mbi ge daŋay zì ge Fare ge Kwaɗa pe oyya ɗe, mbi duwa no go mbi daa mà koy Onezim ge mbi ta, ndwa go ne mba mbi ge mo byalam go dinna ge mo sḛ daa mà mbaa mbi ya go.

¹⁴ Ɗaŋɗe, mbi ɓyare go mbi kee a̰me ge mbi pagal to. Ne kaa ge mo duwa go mbi ee mo ne ge pool kee kaŋ ge kwaɗa mbe no to. Ɓyare go mo vḭḭ tene ne kee ne.

¹⁵ Dwam ma kee ya kwaɗa lag ge ḛ ge Onezim buwal vaa se go, ge sego, mo gaa seɗ ne kàɗɗa ge mo ta ɗiŋ ge din.

¹⁶ Ago ge sego, ge ameya ge ne ame Krist pe, seŋe ya nde-nde waɗe moor gegene ma, gaa na̰ van ge laa wanna ne ge Krist ta. Kaɗɗa ge mbi ɗe, mbi laa wa̰a̰ ne gḛḛ. Ɗaŋɗe, kaɗɗa ge mo, mo laa gwan wan ne mà gḛḛ waɗeya ge kon pagal ge dape, a ndu duwana ne, gwan kaɗ ge na̰ van go, ge Bagezok pe me.

¹⁷ Kaɗɗa mbi mo kondore ge laa ɗu ne, ɓyare go mo ame ne dinna ge mo daa mà ame mbi ya go.

¹⁸ Kaɗɗa ne tèmel keeya a̰me za̰a̰ mo yal go koo ne sḛ vḛḛne mo a̰me ge mbiya ne poɗ mo ne go ɗe, ee ne dṵṵl ge mbi pagal.

¹⁹ Mbi Pol, mbi njaŋe mo sok ano mbe ne ge mbi tok zì go, mbi sḛ gaa poɗ mo kaŋ mbe ne. Mbi jan ano mbe no puy ɗe, mo kuwa kuwa go mbi wul ge mo pagal, ge dape, ndwa ge mo see ne no, mo see ne ge mbi ta.

²⁰ Na̰ van, mbi kaɗe mo kaɗe go, mo ke mbi tèmel no ge laa wanna ge nè Bagezok ne pe, ndwa go mbi dul wa ee se, ge baan ge nè no ge ne ge Krist ta pe.

²¹ Mbi ge kuwaya tyatyaɗ go, sok njaŋe mo lawayta mbe no go, a fareba go, mo mbo kee kaŋ ge mbi kaɗe ne no ge mo ta. Ge mbi kuwa mo no go, mo mbo gwan kee ne ge kon pagal waɗeya zoo.

²² Ge fare mbe ma no zì waɗme, ɓyare go mo nuusi zok dwamma a̰me ɗu ge mbi pe. Ago, ge kaɗeya ge ḛ ḛ ma ta, mbi ge jobreya go Dok mbo hage vin̰a ge mbi pagal, àa mbo dol mbi zum, mbi wa mbo ge ḛ ta yà.

Wa sanna ma

²³ Epafras ge no daŋay zì ge mbi dagre, ge ɓanna ge nè ɓa̰a̰ dagre ge Zeso Krist pe sa̰a̰ ḛ wa.

²⁴ Mark, Aristark, Demas ɓanna ge Luk, mbi ka̰a̰m ge tèmel ma sa̰a̰ ḛ wa waɗme.

²⁵ Mbi kaɗeya go Bagezok Zeso Krist ngay kwaɗa keeya ge na ne ge ḛ ta peɗ. Mbi wa aa ne, mbi sa̰a̰ ḛ wa.