ረውምየት እቂዝ 1 - ኽምጣጘ ኣይር ኪዳን

ፈወነ 1

¹ ክርስቶስ እየሱስት ኣገልጋይ፣ ኻወርየም ኣጠ ጭጝሸው፣ እደረት ወንጌልድየንትም ክንስጠ ማርፅሽተው ባውሎስቲስ።

² እኒን ወንጌሊዝቍዝም እደረ በውርስ ጝነቭያታኒዝ ኣመካይነትዝ ቅዱሳን መፃፋኒዝ ቲስፈ ይው ዊኑ።

^3-4 እኒን ወንጌልድም ጝዅር ይናኣደረ እየሱስ ክርስቶስት ማጥን ዊግተው የጝ፤ ጘጝ ጝስየይዝ ዳዊትት ዚረይስ እዅርሹ፤ ጝቅድስነይዙ መንፈሲዝ ቈሽ ክርጘይስ ጐነውዝ እደረት ዅር ኣቐነውድ ኻይልዝ ጋልፅሽቱ።

⁵ ክርስቶስት ሽⶔዝቍዝ እጝቅ ኣኽዛቫኒዝ ማኽሊስ ኣምንጝ ኣዚተቍ ችጝሽጛንስ ማጥን ጝቍዝ ፃገዝመ ኻወርየነትዝ ለምርኑን።

⁶ ክትን ክታቕምም እየሱስ ክርስቶስትቍ ኣጥጘ ጭጝሸቊዝ ማኽሊስ ችጝሽርነቅ የጝ።

⁷ እደረስ ቀንሽርነቅ፣ ቅዱሳንም ኣትርነ ጭጝሽርነቅ፣ ረውምየ ፅብርነቂዝቅ እፃሽተው እፃ። ይናኣይር እደረቲስ፣ ኣደረ እየሱስ ክርስቶስቲስም ፃገዝመ ዲግተዝ ክታጭስ ኣነ።

ባውሎስ ረውምየት ምመናንድዛት ቓልጠ በና ዊነጘ

⁸ ክታእምንትድ ኣልሚሊቅ ወይሽታንስቅ እጝቂስቅ በውርስ ክታእጝቅት ማጥን ይኣምላክት እየሱስ ክርስቶስትውዝ ሚዝየንዘኵን።

⁹ ዊትርቅ ይፀለውቲዝ ክታት ትዝ የር ኣቐጘ ወንጌልድየንት ሲቭከነውዝ ምሉ ይእዘኒዝ ኣግልግለው እደረ ይሚዝር የጝ።

¹⁰ ነን ኻትሸነይዝ ቈሽ እደረ ጝፍቃድ ኣቕ ክታጐ ተጨ ይጒደነድ ጭቅሻንስ ማጥን ዊትርቅ ፃልየኵን።

¹¹ እምንትዝ ፀናትርነ ፃቨው መንፈሳዊ ይውት ነቃንስ ማጥንም ክታት ቓልጨ በነኵን።

¹² እኒንት የውድም ያን ክታእምንቲዝ፣ ክትንም ይምንቲዝ ይናስ ይናይ ዲበዲብሽትናንስ ማጥን የጝ።

¹³ ይፅንወ! ላጥ ኣኽዛቫኒስ ኣቐጘ ክታጊስም ፍር ችጛንስ ማጥን ክታጐ ተጨ እክሰው ግርየ ኻሊ ዊነጘ ኣርቕትርነ በነኵን፤ ዊገድ ግን ነኳን ኣሽ ሩዲየውም።

¹⁴ ግሪካኒዝም ኣነ ግሪካን ኣየቊዝ፣ ጥቨቭኝጢዝም ኣነ ኣስክሳቊዝቅ እጝቅዝቅ ግድየተ ፃቀር የጝ።

¹⁵ ረውምየ ፅብርነቅ ክታጭስም ወንጌልድ ሲቭክጨ በነውድ እንዝ ምላሰንዝ የጝ።

¹⁶ ወንጌልዝ ኣይቭጠቅም፤ ምላሰንድም ወንጌል በዊል ኣይዅዳኒዝ፣ ጝዝግረ ቈሽ ኣኽዛቫኒዝ ጝት ኣምነቍድዛትቅ ቓዘው እደረት ኻይል የጝ።

¹⁷ ጝዝ እደረት ፅድቅድ ጋልፅሽትኩ፤ «ፃድቅ እምንትዝ ርዅየዝ ፅብጡ» ይሽት ፃፍሸጘ፣ እኒን ፅድቅድ ችጝሸውድ ጐነይስ ኪርም ኻትሸነይል ኣሽ እምንትዝ የጝ።

እቀ ዚረይዙ ጭቕቲዚመ ተርጡ እደረት ቍጠይዝ

¹⁸ እማንድየንት ጝታጭቕቲዝ ኣብልጝ ፃየቊ እቂዝ፣ ጝታኣመፂልቅ ጝታጭቕቲልቅም እደረት ቍጠድ ሲመይስ ጋልፅሽትጡ።

¹⁹ ምላሰንድም እደረ ጝቕም ጛጭስ ጋልፃንስቅ እደረት ኣርቕጥነ ጥውሸውድቅ ጛጭስ ግልፅ የጝ።

²⁰ ኣልም ፋጥርሸት ኪርም እትላው እደረት ባኽሪድ የነትም ዘላልምዙ ጝኻይሊዝመ ጝኣምላክነቲዝ፣ ጝቕም ፋጥረው ፍጥርቲዝ ኣመካይነትዝ ግልፅ ኣቕ እትልኩ፤ ኣቓንስቅም እቅ ጝታጭቕቲዝቍዝ ኣልሰነው ምላሰነም እጀቍ።

²¹ እደረት ኣርቕጝሽም እኳ ጝኣምላክነቲዝ ጥውሸው ክቭርድየንት ጝጭስ ይዊየቍም፤ ሚዝየነም ኣልሲየቍም፤ ዊገድ ግን ጝታኸሰቪዝ ጊነትቍ ኣቕ፤ ኣስክሰነ እጀው ጝታእዘንድም ጥምቱ።

²² «ይን ጥቨቭኝጥ የጝ» ይጛ ኻጘፃን ኣቕ።

²³ ክራው እደረት ኪብርዘነው በርጝ ድዘው እጅርዙ ምስልመ ዚለዙ ምስልዝ፣ ሲዘ ልኵጣን ፃየው እንሰሰዙ ምስልዝመ ዝቨዝዝቨ ኻሲተው እንሰሰዙ ምስልዝ ኪብርዝ።

²⁴ እንዝ ማጥን በገዘ ጝታሰውነትድየንት ጛስ ጛይ ኣርክስዝጛንስ ማጥን እደረ ጛት ኽጥያትዝ እቻቐው ጝታእዘኒዙ ምርቕፀይዝ ዲቍስ ይዉ።

²⁵ እደረት እማንድየንት ኻሽትዝ ላውጥ፤ ፈጣሪት ፊንተም ፍጥርትድየንት ኣምልክ፤ ኣግልግልም፤ እደረ ግን ዘላልም ሚዝየንሽተው የጝ፤ ኣሚን።

²⁶ እንዝ ምላሰንዝ እደረ ጛት ኣይቭሰው ምርቕፀዝ ዲቍስ ይዉ፤ ጝታእቍንድ እኳ ጝታተፈጥረዊዝ ጥውሸው ግልቍ ጅቅ ኽርየነውድየንት በርጝ ጝታተፈጥረዊዝ ጥውሻዊዝ ላውጥ።

²⁷ እኒዝጘም ግልቍድ ጝታተፈጥረዊዝ ጥውሸው እቍን ጅቅ ኽርየነውድየንት በርጝ ጛስ ጛይ ሽኵነነውዝ ቃጥልሽ፤ ግልቍድ ግልቊጅቅ ኒውርሰው ዊገ ፋፅም፤ ጝታጭቓ ሰቪዝ ጥውሸው ቕፃርድየንት በገዘ ጝታቕምትል ነስ።

²⁸ እንዝ ንየም እደረት ኣርቐነውድ ጣቅማውም ይጝ ኻስቭጛንስቅ፣ ጘጝም ጥውሻው ዊገድየንት ፃቭጛንስ ማጥን ጨቅሸው ኣይምረውዝ ዲቍስ ይዉ።

²⁹ እጝቅት ኣይንት ኣመፅዝ፣ ግፍዝ፣ ሲቭርቭረዝ፣ ጭቕትዝ፣ እቻቐቍ ኣቕ፤ ቅንየዝ፣ ኒፍስ ቍወነዝ፣ ክርክርዝ፣ ተኰልዝ፣ ጭቓ ኣምልዝ፣ እቻቐቍ ጛይ፤ እርየቍ፣

³⁰ እቀ ሽ ጨቀቍ፣ እደረት ሽክተቍ፣ እጅር ኣዋርደቍ፣ ትቪትኝጥ፣ ምክኽኝጥ፣ ጛይ፤ ጭቕት ሰራሸነው መለ ደምዝጘኵ፤ ጝታኣቅሊዝ ኣዚታቍም።

³¹ ኣስክሰነ እጀቍ፣ ውል ፋዘቍ፣ ፍቅር እጀቍ፣ ስቝርት እጀቍ፣ ጛይ።

³² ውርም እኳ፦ «እኒንት ፃቨቊዝቅ ክርጘ ጥውሸኵ» የው እደረት ኽግድየንት ኣርቕጝሽም እኒንትቅ ፃቭጘኵ፤ ፃቨነው ጭቝም ኣዪጝቀ እኒንት ፃቨቍድዛትም በርታዝጘኵ።