ፍልብስዩስት እቂዝ 1 - ኽምጣጘ ኣይር ኪዳን

ፈወነ 1

¹ እየሱስ ክርስቶስት ኣገልጋያን ባውሎስቲስመ ጢመቲወስቲስ፦ ፍልብስዩስ ፅበቍ እቢስቈበሳኒዝመ ዘቝንጢዝ ጅቅ ክርስቶስ እየሱስስ ኣቐቍ ቅዱሳኒዝቅ እፃሽተው እፃ።

² ይናኣይር እደረቲስ፣ ይናኣደረ እየሱስ ክርስቶስቲስም ፃገዝመ ዲግተዝ ክታጭስ ኣነ።

ሚዝየነዙ ፀለውት

³ ክታት ትዝ የው ጨቨቅ ይኣምላክት ሚዝየንዘኵን።

⁴ ዊትርቅ ክታእጝቅዝቅ ማጥን ፃልያንድ ዲስተዝ ፃልየኵን።

⁵ ምላሰንድም በውረ ግርየይስ ኪርም ነኳን ኣሽ ወንጌል ሲቭከነውዝ ይጅቅ ላብጠ ሰራሽርንኵርኑ።

⁶ ቀሰው ሰቭ ክታግዝ ኪርመው ኣምላክ፣ እየሱስ ክርስቶስ ዋጥር ተረው ግርየይል ኣሽ ፋፅምጠጘድ ተማምንጨኵን።

⁷ ነን እፁጭ ፅባም ኣነ ወንጌሊዝ ማጥን ጨቅጫንድ፣ ፀናዛንድም፣ ይጅቅ እደረት ፃገድ ኣድልሽርናንስቅ ዊትርቅ ይእዘኒል እኵርኑ፤ ኣቓንስቅም ያን ክታእጝቅዝቅ ማጥን ኻሰቨነውድ ጥውሸው የጝ።

⁸ ክርስቶስ እየሱስት ፍቅርዝ ክታእጝቅትቅ ኣወይ በነር ኣቐጘ እደረ ይሚዝር የጝ።

⁹ ክታፍቅርድ ኽየው ኣርቕትዝመ ኣስክሰነውዝቅ በውገት ሽⶖ ጭቕጘ ንቕፃⶖ ፊራንስ ማጥን ፃልየኵን።

¹⁰ እንም እጝቂስቅ ቺዘው ዊገድየንት ማርፅርን ኣርቕርናንስመ ክርስቶስ ዋጥር ተራንድ ንፁኻን ኣቕርናንስ፣ ኒውርም እጅርነቅ ኣቕርናንስ፣

¹¹ እደረስም ክቭርዝመ ሚዝየነዝ ኣቓንስ ማጥን እየሱስ ክርስቶስቲስ ችጝሸው ፅድቅዙ ፍረዝ እቻቕርናንስ ማጥን የጝ።

¹² ነንም ኣሽ ይፅንወ! ይግል ችጘው ሚከረድ ወንጌል ጭቕጘ ፈራቓንስ ምላሰን ኣቐጘ ኣርቕትርነ በነኵን።

¹³ ኣቓንስቅም ያን እፁጨውድ ክርስቶስትቍዝ ኣቐጘ በተምጝግስቲዝ ዘቨኝጢዝመ ላጥ እቅድም እጝቅቅ ኣርቕጝኵ።

¹⁴ ይእፁጨነዊዝ ምላሰንዝም ኣምነቍ ዚኒስ ንቕፀቍድ ኣደረት ተማምንሸቍ ኣቕጝኵ፤ እንዝም እደረት ቃልድየንት ጐውቲጝቀ ዊግትጛንስ ድፍርት ችጝጝኵ።

¹⁵ ላው ላውድ ቅንየዝመ ክርክርዝ ክርስቶስት ሲቭክጘኵ፤ ላጥድ ግን ቅንነትዝ የጝ ሲቭክጘውድ።

¹⁶ እንዛይ፣ ያን ወንጌሊዝ ማጥን ጨቅጨ እንል ፅበጘ ኣርቕጝ ፍቅርዝ ሲቭክጘኵ።

¹⁷ እዛይ ግን ያን እፁጭ ፅባ ጝዝ ዲጊል ሚከረ ቈሽጥጘ በንጝ ቅንነትዝ ኣዪጝቀ ጝታቕምቱ ኣርወዝ ይጝ ክርስቶስት ሲቭክጘኵ።

¹⁸ ውርም እኩ? ተክዘነውዝም ኣነ እማንዝ እጝቅዝቅ ክርስቶስ ሲቭክሸኵ፤ እንዝም ዲስ የኵን፤ ነሰየይስቅም ዲስ ይጭር።

¹⁹ ይግል ችጘው ሚከረድ ክታፀለውቲዝመ እየሱስ ክርስቶስት መንፈሲዝ ኣመካይነትዝ ችጝሸው ከቨዝ ይቓደነዝ ምላሰን ኣጠጘ ኣርቐኵን።

²⁰ ውረውረዝቅ ኣይቭጠር ኣቕ ችጝጫይቀጘ ኽየው ቲስፈ ፃቀር የጝ፤ ዊገድ ግን ዊትርቅ ፃቫንትጘ ነንም ርዅየዝ ፅብሽ ዊንም ክጥሽ ክርስቶስ ይሰውነቲዝ ኪብራንስ ማጥን ምሉ ድፍርትዝ ዊግጭር።

²¹ ኣቓንስቅም ይጭስ ርዅየ የነውድ ክርስቶስስ ፅበነው የጝ፤ ክርጘም ኣቕሽ ዲቈው ኣርወ የጝ።

²² ችብርጝዝ ዊናን ኽየው ሰቭ ሰራጭር፤ ኣነጚ ኣውየንት ማርፅጨጘ ኣርቐቅም።

²³ እንዛይ ሊጘ ኻለይዝ ፃይጭ ጨጝቅጨኵን፤ ፊጨ፣ ክርስቶስ ጅቅም ፅብጨ በነኵን፤ ምላሰንድም ክርስቶስ ጅቅ ፅበነውድ እጝቂስቅ ዲቈው ኣቓንስቅ የጝ።

²⁴ ኣነጚ ችብርጝዝ ዊነነውድ ቈሽ ክታጭስ ጭቕጘ ቀሰው የጝ።

²⁵ እኒንት ኣርቓንስቅም፣ እምንትዝ ሊግዝርናንስ፣ ጭቕጘም ዲስ ይርናንስ ማጥን፣ ክታጅቅ ፅብጨጘ ተረድጭኩን።

²⁶ እንደ ገነ ክታጐ ተጥ ክታእጝቅ ጅቅ ዲምቅጫንድ ይማጥን ክርስቶስ እየሱስስ ፃይርነው ዲስተድ ንቕፅጡ።

²⁷ ውርም ኣነ ውርቅ ክርስቶስት ወንጌሊዝ ጥውሸዊዝጘ ፅብጥን፤ እንዝም ክታጐ ተጥ ክታት ቓላንድ፣ ዊንም እክሊል ኣቕ ክታጂጘድ ወጫንድ፣ ወንጌሊዙ እምንትዝ ማጥን ላው ኣቕርን ተጋድልሽርና ላው መንፈስዝ ፀናቕርን ችብትጥን።

²⁸ ክታት ተቃውምሸቍድዛት ውረውረዝቅ ጐውትርነ፤ እኒን ክታድፍርትድ ጛይ ድዝጛንስ፣ ክትን ግን ቓድርናንስ እደረቲስ ኣቐው ምልክት የጝ።

²⁹ እኒን ፃገድ ክታጭስ ነይሽተውድ ክርስቶስት ኣምንድርናንስ ጭቝ ኣዪጝቀ ጝቍዝ ሚከረ ለምትርናንስም የጝ።

³⁰ እንዝ ሚቅ ይግል ችጘው ሚከረድ ቓልድርነጘ፣ ነንም ይግል ፅበጘ ወሽርናንትጘ ክትንም ጘጝ ሚከረድየንት ችጝርንኵርኑ።