ፊልሙነስ 1 - ኽምጣጘ ኣይር ኪዳን

ፈወነ 1

¹ ክርስቶስ እየሱስትቍዝ እፁጨር ያን ባውሎስቲስ፣ ይናዝን ጢመቲወስቲስም፦ ቀንሸው ይናዝን ይናጅቅም ላብጠ ሰራሸው ፊልሙነስ፣

² ይናስን ኣፍብየስ፣ ክጝኒል ፅብረይ ምከንሸንስ፣ ይናጅቅ ክርስቶስት ዊተድረ ኣቐው ኣርኪባስም እፃሽተው እፃ።

³ ይናኣይር እደረቲስ፣ ይናኣደረ እየሱስ ክርስቶስቲስም ፃገዝመ ዲግተይዝ ክታጅቅ ኣነ።

⁴ ይፀለውቲዝ ክት ትዝያⶖ ዊትርቅ ይኣምላክት ሚዝየንዘኵን።

⁵ ምላሰንድም ኣደረ እየሱስትል ፃይረው እምንትድ፣ ምመናንዚም ፃይረው ፍቅርድ ወጭኩን።

⁶ ክርስቶስትውዝ ፃይነው ቀሰው ዊገድቅ ቐናዝር ተረድሽትራንስ፣ ክእምንትድየንትም ላጢዝ ሚዝርድራ ቲጊራንስ ፃልየኵን።

⁷ ይዝንወ! ቅዱሳነ እዘንድ ክቍዝ ታድሽታንስቅ፣ ክፍቅርድ ይጭስ ኽየው ዲስተዝመ ዲብሰዝ ነይኩ።

⁸ እንዝ ማጥን ፃቭተ ጥውሸውድየንትቅ ፃቭራንስ ኣዝጨ ክርስቶስትውዝ ድፍረት ፃቀር ኣቓንም እኳ፣

⁹ ያን ግን ፍቅርዝ ዋቕረኵን፤ ነስየ ያን ሽሚር፣ ነን ቈሽ እየሱስ ክርስቶስት እፁሸተ ኣቐር ባውሎስ፣

¹⁰ ወኽኒ ጝንል ፅባⶖ መንፈስዝ እዅረው ይዅር ኣናሲመስት ማጥን ጨወኵን።

¹¹ እንዝ ሚቅ ጣቅማው ዊኑ፤ ነን ግን ክግስም ኣነ ይግስ ጣቅመው ኣቕኩ።

¹² ኣቓንስቅም ይእዘነው ኣቐው ኣናሲመስት ክጐ ዊስ እፃቕኩን።

¹³ ወንጌልዝቊዝ እንል እፁጭ ፅባⶖ፣ ክምትክ ኣቕ ይት ኣግልግላንስ ማጥን ይቕምስ እዳዝጨ በን ዊኑን።

¹⁴ ዊገድ ግን ክት ፃቭረው ቀሰው ሰቭድቅ፣ ውድየተዝጚ ግድየተዝ ኣቓየጘ ክት ማኽርዚጝቀ ውረውረም ፃቨቅ።

¹⁵ ምናልቫች ኣናሲመስ ክጊስ ዊቱ ግርየ ቲተውድ ነስየ ዊትርቅ ክጅቅ ፅባንስ ኣጠት።

¹⁶ ነስየ ኣገልጋይዝጘ ኣዪጝቀ ኣገልጋይዝ ኒየ ኣቐው ቀንሸው ክዝን የጝ፤ ይግስ ቀንሸው የጝ፤ ኽሽ ክግስ ቈሽ እኒስ ዲቈው ስየዝም ኣነ ኣደረትውዝ ጭቕጘ ቀንሸው ክዝን የጝ።

¹⁷ ነስየ ይት ክዝንትጘ ፃቭር እግዝረውዝየ ይት ለምትራንትጘ ፃቭር ጝትም ለምጭ።

¹⁸ ጘጝ ክት ቢድለው ዊገ ፅብሽ፣ ዊንም ክጊስ ቢን ፃይ ፅብሽ እኳ ጝቢንድ ይዲጊል ማል።

¹⁹ ያን ባውሎስ «ጝቢንድዛትም ያን ይቕም ኪፍጭር» ይር ይናኒዝ ፃፍኩን፤ ክት ክቕም እኳ ይቢኑ ኣረጘ ያን ኣጅስጨ በነቅም።

²⁰ ይዝንወ! ይት ኣደረትውዝ ጣቅምራንስ በነኵን፤ ኣለቀይ ይዘንድየንትም ክርስቶስትውዝ ዲስ ሽ።

²¹ ኣዚትረር ኣረጘ ተማምንጭ፣ ዋቕረዊስ ዲቈውም ፃቭረር ኣረጘ ኣርቕ ፃፈኵን።

²² እኒስም ላየ፣ ክታፀለውትድ ዊሰ ችጝ ክታጐ ተጨ ቲስፈ ፃቫንስቅ ይፈወነ ጝን ኣስልጥን።

²³ ይጅቅ ክርስቶስ እየሱስት እፁሸተ ኣቐው ይባፍረ ዲግተ ኣልሰኵ።

²⁴ ቈሽም ይጅቅ ላብጠ ሰራሸቍ ማርቈስ፣ ኣርስጥረኰስ፣ ዲማስ፣ ሉቃስ ዲግተ ኣልስጘኵ።

²⁵ ኣደረ እየሱስ ክርስቶስት ፃገድ ክታመንፈሲጅቅ ኣነ፤ ኣሚን።