ማቲወስት ወንጌል 1 - ኽምጣጘ ኣይር ኪዳን

ፈወነ 1 እየሱስት ዚረይዙ ኻረግድ

¹ ዳዊትት ዅር፣ ኣቭርኻምት ዅር እየሱስ ክርስቶስት ዚረይዙ ኻረግድ እኒን የጝ፦

² ኣቭርኻም ይሳቅት እዅሩ፤ ይሳቅ ያይቈቭት እዅሩ፤ ያይቈቭ ይዅዳስመ ጝፅንስ እዅሩ።

³ ይዅዳ ትማርቲስ ፋሪስስመ ዛረስ እዅሩ፤ ፋሪስ የስረምት እዅሩ፤ የስረም ኣራምት እዅሩ።

⁴ ኣራም ኣሚናዳቭት እዅሩ፤ ኣሚናዳቭ ናሰንት እዅሩ፤ ናሰን ሰልሙንት እዅሩ።

⁵ ሰልሙን ረኣቭቲስ በዊዝት እዅሩ፤ በዊዝ ሩትቲስ እየቪድት እዅሩ፤ እየቪድ እስየይት እዅሩ።

⁶ እስየይ ንጕስ ዳዊትት እዅሩ። ንጕስ ዳዊት ወርየውት እውነቲስ ሰለሙንት እዅሩ።

⁷ ሰለሙን ረቫምት እዅሩ፤ ረቫም ኣቭየት እዅሩ፤ ኣቭየ ኣሳፍት እዅሩ።

⁸ ኣሳፍ እየሳፍጥት እዅሩ፤ እየሳፍጥ እየራምት እዅሩ፤ እየራም ወዝያንት እዅሩ።

⁹ ወዝያን እየዋታምት እዅሩ፤ እየዋታም ኣካዝት እዅሩ፤ ኣካዝ ኽዝቅያስት እዅሩ።

¹⁰ ኽዝቅያስ ምናስየት እዅሩ፤ ምናስየ ኣሙፅት እዅሩ፤ ኣሙፅ እየስያስት እዅሩ።

¹¹ እየስያስ እስራየላንድ ባቪለውን መራሽጝ ፊርጘው ዚምኒዝ እኰንያንስመ ጝፅኒዝ እዅሩ።

¹² ባቪለውን መራሽጝ ፊርጘት ግረ፦ እኰንያን ሰላትያልት እዅሩ፤ ሰላትያል ዘሩቫቪልት እዅሩ።

¹³ ዘሩቫቪል ኣቭዩድት እዅሩ፤ ኣቭዩድ እልያቂምት እዅሩ፤ እልያቂም ኣዛርት እዅሩ።

¹⁴ ኣዛር ሳዱቅት እዅሩ፤ ሳዱቅ ኣኪምት እዅሩ፤ ኣኪም እልዩድት እዅሩ።

¹⁵ እልዩድ ኣላዛርት እዅሩ፤ ኣላዛር ማታንት እዅሩ፤ ማታን ያይቈቭት እዅሩ።

¹⁶ ያይቈቭ ዮሴፍት እዅሩ፤ ዮሴፍም ክርስቶስ ይሽተው እየሱስት እዅርደይ ማርያምት ወገነ ዊኑ።

¹⁷ ነስየ እጝቅ ዅለድቅ ኣቭርኻምቲስ ኪርም ዳዊትትል ኣሽ ፅጭ ሲዘ፣ ዳዊትቲስ ኪርም ባቪለውን ምራይል ኣሽ ፅጭ ሲዘ፣ ባቪለውን ምራይስ ኪርም ክርስቶስትል ኣሽ ፅጭ ሲዘ የጝ።

ይናኣደረ እየሱስ ክርስቶስት እዅርሸነይዙ ታሪክድ

¹⁸ እየሱስ ክርስቶስት እዅርሸነይዙ ታሪክድ እኒን የጝ። ጝኘ ማርያም ዮሴፍስ ወግሽትር ፅብራ ጝርጅቅ ዲምቅሺጝቀ መንፈስ ቅዱስት ኣመካይነትዝ ጊዙትር ችጝሽች።

¹⁹ ጝርወገነ ዮሴፍ ግን ፃድቅ እጅር ዊናንስቅ ጝርት እቀ በዊል ኣጋልፅዝጠ በኒየውም፤ ኣቓንስቅም ጝርት ስውርዝ በርጠ ጝእዘኒዝ ኻስቩ።

²⁰ ዊገድ ግን እኒንት ጝእዘኒዝ ጕያ ማላ ሲጝቀ ኣደረት መላክ ኒቪዝ ጝጭስ እትል፦ «ዳዊትት ዅር ዮሴፍወ! ክወገነ ማርያምት ክጝን ፊሰነውድ ጐውተ! ምላሰንድም ጚ ጊዝውትረውድ መንፈስ ቅዱስት ኣመካይነትዝ የጝ።

²¹ ግልወ ዅር እዅርቲ፤ ጘጝም ጝኽዝቭድ ጝኽጥያቲስ ቓዝጡ፤ እንዝ ማጥን ጝሽድ እየሱስ ይትር» ዩ።

^22-23 እንም ኣቐውድ ነቭይዝ ኣደረቲስ፦ «እንወ ድጝግል ጊዝውርቲ፤ ግልወ ዅርም እዅርቲ፤ ጝሽድም፦ ‹ኣማኑየል› ይሽት ጭጝሽጡ» ይሽት ዊግሸውድ ፋፅምሻንስ የጝ፤ ኣማኑየል የነውድ፦ «እደረ ይናጅቅ የጝ» የነት የጝ።

²⁴ ዮሴፍም ጝዝመዊስ ነቃቓንድ ኣደረት መላክድ ኣዘጘ ጝወገነ ማርያምት ጝጝን ፊሱ።

²⁵ ኣነጚ ጝርባር ዅርድየንት እዅርቲስቅ ጝርት ኣርቒየውም፤ ጝሽድም፦ «እየሱስ» የው ፊሱ።