እቭራውያኒዝ 1 - ኽምጣጘ ኣይር ኪዳን

ፈወነ 1 እደረት ዅር መላካኒዝ ኒየ ኣቐነውድ

¹ እደረ ኽፅምስ ኪርም ንቕፀው ዚምን ጝሉ ጝሉ ጒደነዝ ነቭያታኒዝ ኣመካይነትዝ ይናኣቅሊዝ ዊግት ዊኑ።

² እኒን ኻትሸነይዙ ዚምኒዝ ግን እጝቅትቅ ዊርሰተ ፃቨው ጝዅርት ኣመካይነትዝ ይናጭስ ዊግቱ፤ ኣልማንድቅ ፋጥረውድም ጝዝ የጝ።

³ ጘጝም እደረት ክቭሪዝ ምርቐ የጝ፤ ጘጝ ጝባኽሪዪዝ እደረ ጅቅ ፍፅም እኵለ የጝ፤ ጝኻይሉ ቃሊዝ ኣልምድየንት እጝቅትቅ ዲግፍ ፃይኩ፤ ይናኽጥያድየንት ጝቕም ዊርሸት ግረ ሲመይ ኻይሉ እደረት ለዊል ጐይኩ።

⁴ እንዝ ማጥን ጘጝ ዊርሰው ሽድ መላካኒዙ ሽⶔስ ኒየ ኣቐጘ፣ ጘጝ ጝቕምም መላካኒስ ዲቈው የጝ።

⁵ እደረ መላካኒዝ ማኽሊስ፦ «ክት ይዅር የጝ፤ ያን ክት ንጭ እዅርኩን» ዊንም ቈሽ፦ «ያን ጝጭስ ኣይር ኣጭር፤ ጘጝም ይዅር ኣጡ» የው ዊግተውድ ኣውስ የጝ?

⁶ ቈሽም እደረ ጝባር ዅርድየንት ኣልሚል በርሳንድ፦ «እደረት መላካንድ እጝቅቅ ጝጭስ ሲግድጝነ» የኵ።

⁷ መላካኒዝቍዝ ዊግታንድ ግን፦ «ጝመላካንድዛት ፊግይጥ፣ ጝኣገልጋያንድዛትም ልየዝቍ ነቨልቫላን ፃቨኵ» የኵ።

⁸ ጝዅርትቍዝ ዊግታንድ ግን፦ «ኣምላክወ! ክዙፋንድ ዘላልም ኣልም ፀናቕ ፅብጡ፤

⁹ ክኽዝቭድም ጭቅተዝ ቅምትር። ፅድቅድ ቀንዱ፤ ኣመፅድም ሽክትሩ፤ እንዝ ማጥን ክኣምላክ እደረ ክት ክፃምጢስ ኒየ ጐይሱ፤ ዲስተዙ ዘይትዝም እቓሱ» የኵ።

¹⁰ እኒዝጘም፦ «ኣደረወ! ክት በውገ ዝቨት ሚስርትድ ሚስርትሩ፤ ሲመያንድም ክናኒዝ ሰራሽተቍ ጛይ።

¹¹ ጛይ ድዝጥቍ፤ ክት ግን ፀናቕር ፅብትር፤ እጝቅቅም ኣልቨይዝጘ ኣቢትጥቍ።

¹² ኵተይዝጘም ጛት ጥቅልትር፤ ጛይም ኣልቨይዝጘ ላውጥሽጥቍ፤ ክት ግን ያው ክት የጝ፤ ክዚምኒዝም ኻትሸነ እጀውም» የኵ።

¹³ እደረ መላካኒዝ ማኽሊስ፦ «ክፃለታንድዛት ክሊኲዝ ደደነ ፃቭጪስቅ ይለዊል ጐይ» የው ዊግተውድ ኣውስ የጝ?

¹⁴ መላካንድ እጝቅቅ ቓድትድ ዊርሰቍ እቅድዛት ኣግልግልጥጘ እፃሸቍ መንፈሳን ኣየቋ?