ገላትየት እቂዝ 1 - ኽምጣጘ ኣይር ኪዳንፈወነ 1 1 እቅዝ ዊንም እጅርዝ ኣመካይነትዝ ኣይጝቀ እየሱስ ክርስቶስትውዝ፣ ጝት ክርጘይስ ጒሰው እደረ ኣይርትውዝም ኻወርየ ኣቕ እፃጨር ያን ባውሎስቲስ፣ 2 ይጅቅ ፅበቍ እጝቅ ዚኒስም፦ ገላትየ ፅበቍ ምመናኒ እፃሽተው እፃ። 3 ይናኣይር እደረቲስ፣ ይናኣደረ እየሱስ ክርስቶስቲስም ፃገዝመ ዲግተዝ ክታጭስ ኣነ። 4 እኒን ጭቓ ዚምኒስ ይናት ቓዝጠ ይናኣምላክ ይናኣይርት ፍቃድዝ ክርስቶስ ይናኽጥያቲዝቍዝ ጝቕምት ዲቍስ ነዩ። 5 ዘላለምስ ኪርም ዘላልም ኣሽ እደረስ ክቭር ኣነ! ኣሚን። እማንተው ወንጌልድየን ላው ጭቝ የጝ 6 ክታት ክርስቶስት ፃገይዝ ኣመካይነትዝ ጭጘው እደረት በትርን ላየ ቲተው ወንጌልዝጐ በውዝ ዋጥረነውድ ይት ጭቕጘ ጊርምሰኩ። 7 እኒንትም የውድ ክታት ግራ ድውሰቍ፣ ክርስቶስት ወንጌልድየንት ጣምዝጥጘ በነቍ፣ ላው ላው እቅ ፅብጛንስቅ የጝጚ ወንጌልድመ ላው ጭቝ የጝ። 8 ዊገድ ግን ይን ዊንም ሲመይቱ መላክም እኳ ኣቕሽ፣ ይን ክታጭስ ሲቭክነው ወንጌሊስ ቲተው ላየ ወንጌል ሲቭክሽ ዘላልም እፂተው ኣነ። 9 እንዝ ሚቅ ይነጘ ነንም ደግም የኵን፤ ኣውማው ክትን ለምትርነዊስ ቲተው ላየ ወንጌል ሲቭክሽ ዘላልም እፂተው ኣነ። 10 ያን ነን በነውድ እቅዝ ሚዝየንጨመ? ዊንስ እደረስ ሚዝየንጨ የጝ? ዊንስ እቅ ዲስ ሽጨ ልቕርጠርመ ተከኵን? እቅ ዲስ ሽጨ ልቕርጠር ኣቓንመ ክርስቶስት ኣገልጋይ ኣጨም ዊኒቀር። ባውሎስ ኻወርየ ኣጠ ኣወይ ጭጝሸጘ 11 ይፅንወ! ያን ክታጭስ ሲቭከው ወንጌልድየን እጅሪስ ችጝሸው ኣየው ኣቐነውድ ኣርቕትርነ በነኵን። 12 እኒን ወንጌልድየንት እየሱስ ክርስቶስ ይጭስ ጋልፁጚ ኣውማውቲስም ለምጢቀር፤ ኣውማው እጅርም ይት ክንሲየውም። 13 በውገ ኣይዅዳነ ኻይማነውቲዝ ኣወይ ፅበጘ፣ እደረት ምከንሸንት ኣወሽ ጭቕጘ ሲድሳ ዊነጘ፣ ድስጨም ኣወይ ልቕርጠጘ፣ ወሽርንኵርኑ። 14 ይዚምኒዝ ዊነቍ ንቕፀቍ ይዊግኒስቅ ኣይዅዳኒዙ ኻይማነውትድ ሊሚደነውዝ ይት ችጘው ኣውማውም ዊኒየው፤ ይኣቅለ ወጊዝቊዝም ኣሽ ጭቕጘ ቀንየር ዊኑን። 15 ዊገድ ግን ይኘት ማፅኒል ፅባ ይት ቲዘው፣ ጝፃገይዝም ጭጘው እደረ፣ 16 ኣኽዛቫኒዝ ማኽሊል ጝማጥን ስቪካንስ ማጥን ጝዅርት ይጭስ ጋልፅጠ በናንድ፣ ያን ኣውማው ጅቅም ማኽርጪቀር። 17 ዊንም ይበውገ ኻወርየታን ዊነቍድዛት ዲምቅጨ እየሩሳልየም ፊጢቀርም፤ ዊገድ ግን በዊል ኣረቭ ኻግሪዝጐ ፊጡን፤ ጝዝግረ ቈሽ ደማስቈ ትጐ ዋጥሩን። 18 ሻቘ እምትዝ ግረም ቢጥሮስት ዲምቅጨ እየሩሳልየም ፉን፤ ጝጅቅም ፅጭ ኣኰ ግርቅ ጐዩን። 19 ዊገድ ግን ኣደረት ዝን ያይቈቭትለ ላጥ ኻወርየታኒስ ኣውማውትም ቓሊቀር። 20 እኒን ክታጭስ ፃፈው ዊገድየን ኻሽት ኣየው ኣቐጘ እደረት በዊል ደደደድሰኵን። 21 ጝዝ ግረም ሰውርየ፣ ኪልቅየም የነቍ ኻግራኒዝጐ ፊጡን። 22 ይዅዳ ኻግሪል ፅበቍ ክርስቶስት ምመናንድ ይጋፅድ ቓልጝ ኣርቓቍም ዊን። 23 ዊገድ ግን፦ «በውገ ይናት ሲድሳ ዊነው እጅርድየን፣ እንዝ ሚቅም ድስጠ ደምዛⶔ ዊነው ኻይማነውትድየንት ነን ሲቭከኵ» የው ጂጘ ጭቝ ወሽጝ ዊን። 24 ይቍዝም እደረት ሚዝየንዝጛ ዊን። |