እፊሰውንት እቂዝ 1 - ኽምጣጘ ኣይር ኪዳን

ፈወነ 1

¹ እደረት ፍቃድዝ ክርስቶስ እየሱስት ኻወርየ ኣቐው ባውሎስቲስ፦ ክርስቶስ እየሱስትውዝ ኣምንሽተቍ ኣቐቍ እፊሰውን ፅበቊ ቅዱሳኒዝ እፃሽተው እፃ።

² ይናኣይር እደረቲስ፣ ይናኣደረ እየሱስ ክርስቶስቲስም ፃገዝመ ዲግተዝ ክታጭስ ኣነ።

ክርስቶስት ኣመካይነትዝ ችጝሸው መንፈሳዊ በረከት

³ ሲመይቱ ስፍረል ፅበው መንፈሳዊ በረከቲዝቅ ይናት ክርስቶስት ኣመካይነትዝ በርከው ይናኣደረ እየሱስ ክርስቶስት ኣምላክ ኣይርም ኣቐው እደረ ሚዝየንሽትነ።

⁴ ጝበዊል ቅዱሳን፣ ነቐፈም እጅነቅ ኣናንስ ማጥን ኣልም ፋጥርሺጝቀ ክርስቶስት ኣመካይነትዝ በውግስ ጝፍቅሪዝ ማርፁ። ጝፍቅሪዝ

⁵ እየሱስ ክርስቶስት ኣመካይነትዝ ጝቝር ኣናንስ ማጥንም ጝቀሰው ፍቃዲዝ በውግስ ዊስኑ።

⁶ እኒንትም ፃቨውድ ቀንሸው ጝዅርት ኣመካይነትዝ ይናጭስ ኻርነይዝ ነይሽተው ኪብረው ጝፃገድ ሚዝየንሽታንስ ማጥን የጝ።

⁷ ጝዅርት ኣመካይነትዝም እቻቐው ጝፃገይዝቍዝ ጝዅርት ብሪዝ ኻርነይ ፍን ይናኽጥያቲስ ይቅርተ ችጝኑን።

⁸ ጝፃገድየንትም ጥቨቭዝመ ኣስክሰነውዝጅቅ ኒቒስ ነዩ።

⁹ ክርስቶስት ኣመካይነትዝ ፃቭጠ ኻልየው ጝፍቃዲዙ ምስጢርድየንትም፣ ጝደግነቲዝ ይናጭስ ኣርቕሱ።

¹⁰ ዚምኒዙ ኻትሸነይዝ ፃቭጠ በነው ጝኻሰቭድም ሲመይል ዝቨይል ፅበው ፍጥርትድየንትቅ ክርስቶስት ስልጣኒዝ ስሪል ጥቅልነው የጝ።

¹¹ እጝቅትቅ ጝፍቃዲዙ ምኽሪዝ ሚስርትዝ ሰራሸው ጝእቅዲዝጘ በውገ ዊስንሽነቅ ይን ቈሽ ክርስቶስት ኣመካይነትዝ ማርፅሽትኑን።

¹² እንም ኣቐውድ ክርስቶስት ቲስፈ ፃቨነውዝ በውጥ ኣነቅ ይን ጝክቭሪዝ ሚዝየነ ችጝስናንስ ማጥን የጝ።

¹³ ክትንም ቈሽ እማንተው ቃልድየንት የነትም ክታቐደነይዙ ወንጌልድየንት ወሽርንኵርኑ፤ ክርስቶስትም ኣምንድርንኵርኑ፤ ክታጭስ ነይሽትጠ ቲስፈ ጥውኑ መንፈስ ቅዱሲዝም ኻትምሽርንኵርኑ።

¹⁴ ጘጝም እደረትቍ ኣቐቍ እቅድቅ ኻርነይ ፍጥጚስቅ ይናእርስቲዙ ፃየነ የጝ፤ እንም ጝክቭርዝ ሚዝየነ ኣቓንስ ማጥን የጝ።

ባውሎስ እፊሰውንት ምመናኒዝ ፃልየጘ

¹⁵ እንዝ ማጥን ኣደረ እየሱስትል ፃይርነው ክታእምንቲዝመ እጝቅ ቅዱሳኒዝም ፃይርነው ክታፍቅሪዝ ወጨት ኪርም፣

¹⁶ ዊትርቅ ይፀለውቲዝ ክታት ትዝ ያⶔ እደረስ ሚዝየነ ኣልሰነው ቀቪቀርም።

¹⁷ ክብርዙ ኣይር፣ ይናኣደረ እየሱስ ክርስቶስት ኣምላክም ኣቐው እደረ፣ ጝት ቐናዝርን ኣርቕትርነ ማጥን ጥቨቭዝመ ጋልፀዙ መንፈስዝ ነያንስ ክታምጥን ቀቪጝቀ ፃልየኵን።

^18-19 እኒዝጘም ክትን ጝዝ ኣመካይነትዝ ጭጝሽርነው ቲስፈድየንት፣ ጝቅዱሳኒል ፅበው ኪብረው ጝእርስቲዙ ፃጀድየን ውር ቝጠ ኣቐጘ፣ ቈሽም ይን ኣምነቂዝ እጝቂስቅ ዲቈው ጝኻይሊዙ ኽየትነይድየንት ኣርቕትርነ ማጥን ክታእዘኒዝቍ እልጣንድ ቢትጛንስ ፃልየኵን።

²⁰ እኒን ኻይልድም ጝኽየው ብርታቲዙ ሰቪዝጘ፣ ክርስቶስት ክርጘይስ ጒሳንድ፣ ሲመይቱ ስፍረይልም ጝለዊል ጐይሳንድ ቓልሽተውድ የጝ።

²¹ ጘጝ ቅምትዝመ ስልጣንዝ፣ ኻይልዝመ ኣደርነይዝቅ ንየ የጝ፤ እኒዝጘም ነንት ዚምኒዝ ጭቝ ኣዪጝቀ ተረው ዚምኒዝቅ ጭጝሽጡ ሽⶔስቅ ኒየ ኣቐው ሽ ጝጭስ ይውሽትኩ።

²² እጝቅትቅ ጝልኰ ሳይል ፃቭ ቅምሱ፤ ምከንት ማጥን የውም እጝቅ ዊገይልቅ ኣውር ፃቭ ይሙ።

²³ ምከን እጝቅ ዊገድየንትቅ እጝቅዝቅ ረገድዝ እቻዘው ክርስቶስት እቻቐነ ኣረይይ ጝሰውነት ጚ።