ቈላስይስት እቂዝ 1 - ኽምጣጘ ኣይር ኪዳን

ፈወነ 1

¹ እደረት ፍቃድዝ እየሱስ ክርስቶስት ኻወርየ ኣቐው ባውሎስቲስ፣ ይናዝን ጢመቲወስቲስም፦

² ቈላሲስ ፅበቍ ክርስቶስት ኣምነቍ ቅዱሳን ይናፅኒዝ እፃሽተው እፃ። ይናኣይር እደረቲስ ይናኣደረ እየሱስ ክርስቶስቲስም ፃገዝመ ዲግተዝ ክታጭስ ኣነ።

ባውሎስ ቈላሲስትቍ ምመናኒዝቍዝ ፃቨው ሚዝየነዝመ ፀለውትዝ

³ ክታጭስ ፃልይነው ጨቨቅ ይናኣደረ እየሱስ ክርስቶስቲር እደረት ዊትርቅ ሚዝየንዝነኵን።

⁴ ምላሰንድም ክርስቶስ እየሱስትል ፃይርነው እምንቲዝመ ቅዱሳኒዝቅ ፃይርነው ፍቅሪዝ ወሽንኵኑን።

⁵ እንም ኣቐውድ ሲመይስ ክታጭስ ኣስልሸው ቲሰፈይዝቍዝ የጝ፤ እን ቲስፈድየንትም ወንጌሊዙ እማንተው ቃሊዝ በውግስርን ወሽርንኵርኑ።

⁶ እኒን ክታግል ችጘው ወንጌልድየን ክትን ወሽርነት ኪርም፣ እደረት ፃገድየን እማን ኣቐነውድም ኣርቕርነት ኪርም፣ ኣልሚልቅ ሰራሻ ኣቐጘ ክታግልም ፍር ፍርዛ፣ ሊግዛም የጝ።

⁷ እኒንትም ይናማጥን ክርስቶስቱ ኣምንሽተው ኣገልጋይ ኣቐው፣ ይናጅቅም ኣግልግለውትዝ ፃምርሸው ቀንሸው ይናዝን ይባፍረ ክታጭስ ክንስኩ።

⁸ ቈሽም መንፈስዝ ክታስ ክታይ ቀንሽርነቅ ኣቕርነጘ ይናጭስ ድቍኩ።

⁹ እንዝ ማጥን እኒንት ወሽነት ኪርምን ክትን መንፈሳዊ ጥበቭዝመ ኣስክሰነውዝቅ እደረት ፍቃድድየንት ኣርቐነው ኣርቕት ችጝርናንስ፣ ክታማጥን ፃልየነውዝመ ጨወነውዝ ቀቪነቅም።

¹⁰ ፃልይነውድም ኣደረስ ጥውሻንትጘ ፅብርናንስ፣ እጝቅ ዊገይዝቅ ጝት ዲስ ሽርናንስ፣ ኣውማው ቀሰው ሰቭዝቅ ፍር ፍርዝርና፣ እደረት ኣርቐነውዝም ሊግዝርና ፊትርናንስ ማጥን የጝ።

¹¹ እኒዝጘም ኽየው ፅናትዝመ ኣቕልዝ ፃይርነቅ ኣቕርናንስ ማጥን፣ ኪብረው ጝኽየው ኻይሊዝ በርታቕርና ዲስም ይርና፣

¹² ይናት ብርኻንዙ ምጝግስቲል ቅዱሳኒጅ ርስት ኣድልሸነውል ኣቭቃዘው ኣይርት ሚዝየንዝርናንስ ማጥን ፃልይነኵን።

¹³ ጘጝ ይናት ጥመይዙ ቅምቲስ ቓዙ፤ ጝቀነው ጝዅርት ምጝግስቲልም ጥውነ ፃቩ።

¹⁴ ጝቍዝም ኻርነይ ፍን ይናኽጥያቲስ ስቝርት ችጝኑን።

ክርስቶስ እጝቅት ንየቱ ኣቐጘ

¹⁵ ክርስቶስ እትላው ኣምላክስ እትለው ተከ የጝ፤ ጘጝ እጝቅ ፍጥርቲስቅ ኒየቱ ባር የጝ።

¹⁶ እጝቅ ዊገድቅ ጝኣመካይነትዝ ፋጥርሹ፤ ሲመይልም ኣነ ዝቨይል ፅበቍድቅ፣ እትለቍድም ኣጝነ እትላቊድ፣ ዙፋናንድም ኣጝነ ኻይላንድ፣ ቅመትድም ኣጝነ ስልጣንጒጥድቅ፣ እጝቅ ዊቅድቅ ጝኣመካይነትዝ ጝጭስ ፋጥርሽጝኵ።

¹⁷ ጘጝ እጝቅት በውገ ዊኑ፤ እጝቅ ዊገድም ላው ኣቕ ፃየፃይሽት ፀናቐውድ ጝዝ የጝ።

¹⁸ ጘጝ ጝሰውነት ኣረይ ምከንሸንስ ኣውር የጝ፤ እጝቅ ዊገይዝቅም ኒየቱ ኣቓንስ ማጥን እጝቅት በውረ፣ ክርጘይስ ጐነውዝም ባር የጝ።

¹⁹ እደረ እጝቅ ጝእቻቕንድቅ ጝግል ኣቓንስ ዊድኩ።

²⁰ ጝዅርት ኣመካይነትዝም ሲመይልም ኣነ ዝቨይል ፅበውድየንት ጝቕም ጅቅ ኣርቅስጠ ሚስቅልል ቅብረው ጝዅርት ብሪዝ ዲግተ ፃቩ።

²¹ ክትን በውገ ክታጭቓ ባኽርይስ ጐው እደረቲስ ቲትርነቅ፣ ክታኻሰቪዝም ጝፃለታን ዊንድርኑ።

²² ነን ግን ክታት ኒውር፣ ነቐፈም እጅርነቅ ቅዱሳን ፃቭ ጝበዊል ኣልስጠ፣ ጝዅር ስየዝ ክረነውዝ ክታት ጝቕም ጅቅ ኣርቅሱ።

²³ እንም ኣቐውድ ክታእምንቲዝ ሚስርትሽርን፣ ዲልድልሽርንም ችብረነውዝ፣ ወሸርነው ወንጌልዙ ቲስፈይስ ናውጥሺጝቀ ፀናቕርን ፅብርናን የጝ፤ ክትን ወሽርነውድ፣ ሲመይት ሳይል ፅበው ፍጥርቲዝቅም ሲቭክሸውድ፣ እኒን ወንጌልድ የጝ፤ ያን ባውሎስም እኒን ወንጌሊዙ ኣገልጋይ ኣቑን።

ኻወርየ ባውሎስት ኣግልግለውትድ

²⁴ ክታማጥን ለምጠው ሚከረይዝቍዝ ነንም ዲስ የኵን፤ ክርስቶስ ጝሰውነት ኣረይ ምከንትቍዝ ለምረው ሚከረይስ ጒድለውድየንት ይስየይዝ እቻዘኵን።

²⁵ እደረት ቃልድየንት ቐናዝ ክታጭስ ሲቭክጨ ማጥን እደረ ይጭስ ነየው ኽድሪዝ ሚስረትዝ፣ ምመናኒዝ ኣገልጋይ ኣቑን።

²⁶ እኒን ቃልድም ዚምናኒስ፣ ዅለይስም ሲውርሽ ምስጢር ኣቕ ዊኑ፤ ነን ግን ጝቅዱሳኒዝ ጋልፅሽትኩ።

²⁷ ጛጭስም እደረ እን ምስጢሪዙ ክቭሪዝ ፃጅትድ ኣኽዛቫነ ማኽሊል ውርቝጠ ኣቐጘ ኣርቕሰናንስ ማጥን ማርፁ፤ ምስጢርድም ቲስፈዝ ኣርውድነው ክቭር ችጝሸው ክርስቶስ ክታጅቅ ኣቐነውድ የጝ።

²⁸ ይንም ኣውማው እጅርድየንትቅ ክርስቶስት ኣመካይነትዝ ፍፅም ፃቭን ኣልስናንስ ማጥን፣ እጅርድየንትቅ እጝቅ ጥቨቭዝ ማኽርናⶔ፣ ክንስናም ክርስቶስት ሲቭክነኵን።

²⁹ ያንም ይግል ኣቕ ሰራሸው ጝኻይሊዝ ኣመካይነትዝ እን ኣለመይዝ ታግልጫ ኽየው ኻይልዝ ልቕርጠኵን።