ኻወርየታኒዙ ሰቭ 1 - ኽምጣጘ ኣይር ኪዳን

ፈወነ 1 እየሱስ ኣርገጘ

¹ ቲወፍለውስወ! እየሱስ ሰራሽጠዝመ ክንስጠዝ ኪርመው ጝሰቭድቅ በውረ ይመፃፊዝ ፃፍኩን።

² እንም ሲመይ ኣርገው ግርየይል ኣሽ ጝቕም ማርፀቍ ኻወርየታኒዝ መንፈስ ቅዱስት ኣመካይነትዝ ይወው ጝትዛዝድ የጝ።

³ ቈሽም ንቕፀው ሚከረ ለምር ክረት ግረ፣ ፅበው ኣቐጘ ንቕፀው ማስረጀዝ ጛጭስ እትሉ፤ ኣርቨ ግርቅም ጛጭስ እትላ እደረት ምጝግስትድየንት ክንሱ።

⁴ ጛጅቅም መድል ጐይ ፅባ፦ «እየሩሳልየምስ ፍርነቅ! ያን ድቋንድ ወሽርነው ኣይር ነየው ቲስፈድየንት ሊሚድጥን።

⁵ ይዃንስ ኣቝዝ ጣምቃ ዊኑ፤ ክትን ግን ዊትቍ ግርቅዝ ግረ መንፈስ ቅዱስዝ ጣምቅሽትርንቅ» የው ኣዙ።

⁶ ጛይም ሊንስ ኣኽቭሽጝ ፅብጛ፦ «ኣደረወ! እስራየልት ምጝግስትየንት ዊስቱ ግርየድ ንጭመ?» ይጝ ዋቕር።

⁷ ጘጝም፦ «ኣይር በገዘ ጝስልጣኒዝ ዊስነው ዚምኒዝመ ግርየይዝ ኣርቐነው ክታጭስ ነይሽቲየውም።

⁸ ዊገድ ግን መንፈስ ቅዱስ ክታግል ጊማንድ፣ ኻይል ለምርትርንቅ፤ ኣይንድም እየሩሳልየምስ፣ እጝቅ ይዅዳስ፣ ሰማርየስመ ዝቨት ደርቸይልቅ ኣሽ ይሚዝረጫን ኣትርንቅ» ዩ።

⁹ እኒንት ዊግት በር ጛይ ቓልጛ ንየ ትጐ ንየስ ንየስ ያ ሲመይ ኣርጉ፤ ድምነም ለምር ጝታእልጣኒስ ሲውሩ።

¹⁰ ጛይም ጘጝ ፊራንድ ሲመይ ትጐ ትክ ይጝ ቓልጛ ሲጝቀ ፃረቍ ኣልብ ሲረቍ ሊጘ እቅ ተርጝ ጝታባጊል ችብርጝ፦

¹¹ «እፈ ገሊለት እቅ ክታትርነ! ውር ቃጥ የጝ ሲመይ ሲመይ ቓልድርና ችብትርን ፅብርነውድ? እኒን ሲመይ ኣርጋንድ ቓልድርነው እየሱስ ኣቕሽ ሲመይ ፊራንድ ቓልድርነጘ ዊስ ሲመይስ ዋጥር ተርጡ» ይ።

ይዅዳት ፊንተዝ ማትያስ ማርፅሽተጘ

¹² እንዝ ግረ ደቭረ ዘይት ኣበይስ እየሩሳልየም ትጐ ዋጥር፤ ደቭረ ዘይት ኣበድ እየሩሳልየምስ እክልደውድ ቅዳምሲንቭት ጒደነይዝ ቝጠ የጝ።

¹³ እየሩሳልየምም ዋጥርጝ ጝታፅብጘው ዲቭሪል ጥው፤ እንዛይም፦ ቢጥሮስ፣ ይዃንስ፣ ያይቈቭ፣ እንድርያስ፣ ፊልበውስ፣ ተውማስ፣ በርተለሚወስ፣ ማቲወስ፣ እልፊወስት ዅር ያይቈቭ፣ ቀንየተ ይሽተው ስሙንስመ ያይቈቭት ዅር ይዅዳስ ጛይ።

¹⁴ እንዛይም ላጥ እቍን ጅቅ፣ እየሱስትኘ ማርያምስመ ጝፅንስ ጅቅም ኣቕጝ ላብጠ ቲግይጝ ፃልይጛ ዊን።

¹⁵ ኣይንት ግርቂዝም፣ ቢጥሮስ ላዝ ለርን ኣቐቍ ጝፃምጢዝ ማኽሊስ ጕ ችብር እንት ዩ፦

¹⁶ «ይፅንወ! እየሱስት ፃየቍ እቂዝ ቃወተ ኣቐው ይዅዳት ማጥን መንፈስ ቅዱስ በውገ ዳዊትት ምቸይዝ ዊግተው መፃፊዙ ቃልድ ፋፅምሽጠ ጥውሸው ዊኑ።

¹⁷ ጘጝ እጅርድ ይናጅቅ ላው ኣቕ እጊት እኒን ኣግልግለውትድ ኣግልግለነው እድል ችጝ ዊኑ።

¹⁸ ኣነጚ እን እጅርድ ጝሰራሸው ጭቓ ሰቪዝ ቃጥ ወየ ፃቭን ይውንቍ ቍርሻኒዝ ቺዝጝ ጅቩ፤ ጘጝም ጝግል ጝግምባሪዝ ደፋሽ ሊቭ ጝሰውነትድ ሊጘትል ብጥቕ ዩ፤ ጝዝለማጠድም ዚርግፍሹ።

¹⁹ እን ዊገድም እየሩሳልየም ፅበቊዝቅ ኣርቕሽቱ፤ ኣቓንስቅም እድ ዝቨድ ጝታቋቈይዝ፦ ‹ኣኪልዳመ› ይሽት ጭጝሹ፤ ጝትርጕምድም፦ ‹ብረዙ ዝቨ› የነት የጝ።

²⁰ እንም ኣቐውድ መዝሙርዙ መፃፊዝ፦ «ጝፅብጘድ ድር ኣነ፣ ጐየው እጅርም ችጝሺነ፤ ጝይምትድየንትም ላየ እጅር ፊስነ» ይሽት ፃፍሽ ዊናንስቅ የጝ።

²¹ ኣቓንስቅም ኣደረ እየሱስ ይናማኽሊል ዋጥርጥራንድቅ ይናጅቅ ዊነቊስ፣

²² ቈሽም ጣምቀተ ይዃንስቲስ ኪርምጝ ኣደረ እየሱስ ሲመይ ኣርግጢስቅ ኣሽ ይናጅቅ ዊነቊ እንዛይ እቂስ ላውድ ይናጅቅ ኣደረት ክርጘይስ ጐነይዝ ሚዝር ኣጠ ጥውሸኵ።»

²³ እንዝ ግረ ኢየስጠውስ ይጘው በርስያን የነው ዮሴፍመ ማትያስስ ኣልስ።

²⁴ ጝዝለም፦ «ኣደረወ! ክት እጅርዝ እዘንድቅ ኣርቕረር የጝ፤ እንዛይ ሊጘ እቂስ ክት ማርፅረውድየንት ይናጭስ ቓሊሽ።

²⁵ ይዅዳ በገዘ ጝስፍረይል ፊራንድ ማል በረው እኒን ኣግልግለውቲዝመ ኻወርየነቲዝ ለምረው እጅርድየንት ክት ክቕም ይም» ይጝ ፃልይ።

²⁶ እነይጝ ፃልይጘት ግረ እፀ ማል፤ እፀድም ማትያስትል ችጙ፤ ጘጝም ፅጭ ለው ኻወርየታኒጅቅ እጊቱ።