3ይዃንስት እፃ 1 - ኽምጣጘ ኣይር ኪዳን

ፈወነ 1

¹ እማንዝ ይቀነው ይናዝን ጋይወስስ፣ ያን ሽሚሪስ እፃሽተው እፃ።

² ወደጅወ! ክኒፍስሸን ቀሰው ኣቕንዝ ፅብራንትጘ፣ ትኽነም ፃይረር ኣራንስ፣ እጝቅ ዊገድቅም ክጭስ እርውዳንስ ማጥን ፃልየኵን።

³ እማንዝ ኣምንሽትረር፣ እማንዝም ፅብረር ኣረጘ ላው ላው ይናፅንድ ተርጝ ሚዝርድጛንድ ጭቕጘ ዲስ ዩን።

⁴ ይቝርድ እማንዝ ዋጥርጥረቍ ኣጘጘ ወሸነዊስ ዲቈው ላየ ዲስተም እጀር።

⁵ ወደጅወ! ክጭስ ኣብን ኣጛንም እኳ ይናፅኒዝ ፃቭረው ዊገይዝቅ ኣምንሽትረር የጝ።

⁶ ጛይ ክት ፃይረው ቀሰው ፍቅሪዝቍዝ ምመናኒዝ በዊል ሚዝርድጝኵ፤ ነንም እደረት ዲስ ሸው ኣቕንዝ ጝታጒደነይዝ ከቭራን ቀሰው የጝ።

⁷ ጛይ ክርስቶስት ኣግልግልጥጘ ፍጘውድ ኣኽዛቫኒስ ውረውረቅ ለምሪጝቀ የጝ።

⁸ ነስየ እማንስ ሰራሽናንስ ማጥን እነየቍ እቅድዛት ኣቭንውዝነ ጥውሸኵ።

⁹ እንዝ ሚቅ ምከንሸንስ ፃፍ ዊኑን፤ ዊገድ ግን ቃወተ ኣጠ በነው ዲወጥራጢስ ይኻሰቭድየንት ለምርየውም።

¹⁰ እንዝ ማጥን ክታጐ ተጥሽ ጘጝ ይናት ዛሻⶖ ኣዋርዛⶖ ፃቨው ጭቓ ሰቭድየንትቅ እጝቅዝቅ ድቍጭር፤ እንም ኣቐቅ የው ቈሽ ጘጝ ጝቕም ይናፅንድዛት ለምራውም፤ ላጥድም ለምራይጘጘ ኪልክለኵ፤ ምከኒስም ቲትጝ ፍጥጘ ፃቨኵ።

¹¹ ወደጅወ! ቀሰው ኣቐውድየንትጚ ጭቓድየንት ተክተ፤ ቀሰው ኣቐውድየንትቅ ፃቨው እጝቅ እደረቲስ የጝ፤ ጭቓ ፃቨው ግን እደረት ቓሊየውም።

¹² ድሚጥረውስስ እጅር እጝቅ ቀሰውዝ ሚዝርደኵ፤ እማን ጝርቕምም ሚዝርደች፤ ይንም ቈሽ ጝቍዝ ሚዝርድነኵን፤ ክትንም ይናሚዝርነይድ እማን ኣቐጘ ኣርቕርነኵ።

¹³ ፃፍጨ በነቍ ንቕፀቍ ዊቅ ዊን፤ ኣነጚ ወረቂትዝመ ቀለምዝ ጭቝ ኣቕ እዳጠ ግን በነቅም።

¹⁴ ነን ጣቅዝም ክት ቓልጭር የር ቲስፈ ፃቨኵን፤ ጋፅዝ ጋፅ ዲምቅሽንም ዊግትነቅ።

¹⁵ ዲግተ ክጭስ ኣነ፤ ወደጃንድ ክጭስ ዲግተ ኣልስጘኵ፤ ወደጃኒዝም ጝታሽⶖድ ጭጝራⶖ ዲግተ ኣልሽ።