2ጢመቲወስስ 1 - ኽምጣጘ ኣይር ኪዳን

ፈወነ 1

¹ ክርስቶስ እየሱስት ኣመካይነትዝ ኣቐው ርዅየዙ ቲስፈይዝ ሚስርትዝ እደረት ፍቃድዝ ክርስቶስ እየሱስት ኻወርየ ኣቐው ባውሎስቲስ፦

² ይዅር ቀንሸው ጢመቲወስስ እፃሽተው እፃ። እደረ ኣይርቲስ፣ ይናኣደረ ክርስቶስ እየሱስቲስም ፃገ፣ ስቝርት፣ ዲግተም ክጭስ ኣነ።

ኣምንሽተነውዝ ማጥን ይውሽተው ምኽር

³ ዊትርቅ ኻር ጊርቅ ይፀለውቲዝ ክት ትዝ ያንድ ኽፅምትቍ ይኣቅልድ ፃቭጘጘ ንፅዅ ኽሊነዝ ኣምልከው እደረት ሚዝየንዘኵን።

⁴ ዲስተዝ ጭቕጘ ዲስ ያንስ ማጥን ክእርድ ትዝ ያ ክት ቓልጨ በነኵን።

⁵ ክግል ፅበው እማንተው ክእምንትድየንት ትዝ የኵን፤ እኒን እምንትድም እንዝ ሚቅ ክጣን ሉይድትል ክኘ ይውንቂትልም ዊኑ፤ ነን ቈሽ ክግል ፅበጘ ተረድጭኩን።

⁶ እንዝ ማጥን ይናንጣድዛት ክዲጊል ፃቫንድ ክጭስ ነይሽተው እደረት ይውትድየንት ልየ ቃጥልጥልሻንትጘ እንደ ገነ ቃጥልጥልዝራንስ ኻስብዘኵን።

⁷ ምላሰንድም እደረ ይናጭስ ኻይልዙ መንፈስ፣ ፍቅርዙ መንፈስ፣ ጛቕምት ቅመነውዙ መንፈስ፣ ነዩጚ ጐውትዙ መንፈስም ነዪየው።

⁸ ነስየ ይናኣደረ እየሱስ ክርስቶስትቍዝ ሚዝርደነውድ ኣይቭተ፤ ጝማጥን እፁጨር ይቍዝም ኣይቭተ፤ ዊገድ ግን እደረ ክጭስ ነየው ኻይሊዝ ወንጌልዝቍዝ ይጅቅ ሚከረ ለምጭ።

⁹ ጘጝ ይን ሰራሽነው ሰቭዝ ኣዪጝቀ፣ በገዘ ጝእቅዲዝመ ጝፃገይዝ ቓዝ ቅድስነዝ ፅብናንስ ጭጙ፤ እኒን ፃገድም ኣልም ፋጥርሺጝቀ ክርስቶስ እየሱስት ኣመካይነትዝ ይናጭስ ነይሽቱ።

¹⁰ ነን ግን ይናቓዘተ ክርስቶስ እየሱስ ተራንስቅ ጋልፅሽትኩ፤ ጘጝ ክርጘዙ ኻይልድየንት ዲምስስ ወንጌሊዝ ኣማካይነትዝ ድዛው ዘላልምዙ ርዅየ ይናጭስ ጋልፅኩ።

¹¹ ያንም እኒን ወንጌሊዝ ኣቭዝርሰተ፣ ኻወርየ፣ ክንሰተም ኣቕ ይምጭኩን።

¹² እኒን ሚከረድየንት ለምጠውድም እንዝ ማጥን የጝ፤ ኣነጚ ያን ኣውት ኣምነጘ ኣርቐር ኣቓንስቅ ኣይቭጠቅም፤ ያን ጝጭስ ይወው ኽድርድየንት እቸን ግርየየንትል ኣሽ ሊሚደነው ቸልጠጘ ተረድጭኩን።

¹³ ይጊስ ወሽረውድየንት፣ ትኽኑ ክንድጝዝ ተከ ፃቭር ፃጭ፤ እኒንትም ክርስቶስ እየሱስቲስ ችጝሸው እምንትዝመ ፍቅርዝ ኣመካይነትዝ ፃቭ።

¹⁴ ክጭስ ነይሽተው ቀሰው ኽድርድየንት ይናግል ፅበው መንፈስ ቅዱስት ኻይልዝ ፃቭር ሊምጭ።

¹⁵ እስየ ፅበቍድቅ ይት ማልጝ ፊርጘጘ ኣርቕረኵ፤ እንዛይ እቂዝ ማኽሊስም ፊለጐስስመ ኸርዋገንስስ ችጝሽጘኵ።

¹⁶ ኣደረ ኸነሲፈሩት በተሰቪዝ ስቝርት ይውነ፤ ጘጝ ይት ንቕፀቍ ግርቅ ዲብስኩ፤ ይእፁሸነዊዝም ኣይቭቲየውም።

¹⁷ እንዲያውም ጘጝ ረውምየ ተራንድ ይት ደምዝ ደምዝ ችጙ።

¹⁸ እድ ኻትሸነይዙ ግርየይዝ ኣደረ ጝጭስ ስቝርት ይውነ፤ ያን እፊሰውን ዊናንድ ኣወሽ ኣግልግለጘ ክቕም ቐናዝር ኣርቕረኵ።