2ይዃንስት እፃ 1 - ኽምጣጘ ኣይር ኪዳን

ፈወነ 1

¹ እማንዝ ቀነይ፣ ያን ጭቝ ኣቒጝቀ እማንት ኣርቐቍድቅ ቀንጘይ ማርፅሽትረይ እመቭየትሸንስመ ጝርቝርስ፣ ያን ሽሚሪስ እፃሽተው እፃ።

² እን እማንድም ይናግል ፅበው ዘላልም ይናጅቅ ኣቐው ኣቓንስቅ፦

³ እደረ ኣይርቲስመ ጝዅር እየሱስ ክርስቶስቲስ ፃገ፣ ስቝርት፣ ዲግተም እማንዝመ ፍቅርዝ ይናጅቅ ኣጥቍ።

⁴ ክቝሪስ ላው ላውድ ኣይርቲስ ይናጭስ ነይሽተው ትዛዚዝ ሚስርትዝ እማንዝ ፀናቕጝ ችጛንስቅ ጭቕጘ ዲስ የርኩን።

⁵ ነንም እመቭየትወ! በውገ ዊነውድየንትጚ ላየ ኣይር ትዛዝ ፃፈቅም፤ እንም ይናንስ ይናይ ቀነቀንሽናንስ ማጥን የጝ።

⁶ እን ፍቅርድም ጝትዛዛኒዙ ሚስርቲዝጘ ዋጥርጥርናንስ የጝ፤ እን ትዛዝድም በውገ ወሽርነጘ፦ «ፍቅርዝ ፅብጥን» የው የጝ።

⁷ እየሱስ ክርስቶስ ስየ ሲር ተረጘ ኣምናቍ ንቕፀቍ ቀሰጥ እቅ ኣልሚል ጕጝኵ፤ እነየው ኣውማው እጅርድቅ ኻሽወረ፣ ክርስቶስት ተቃዋሚም የጝ።

⁸ ክትን ግን ዝላቕርነው ክታወየድየንት ባይርነጘ፣ ምሉ ሽልማት ችጝርናንስ ማጥን ክታቕምስ ጣጝቅቅጭጥን።

⁹ ክርስቶስት ክንድጚዝ ፀናቕ ፅባዊዝመ ጝጊስም እክልድ ፊረዊዝ፣ እደረ ጝጅቅ እጀውም፤ ክርስቶስት ክንድጚዝ ፀናቕ ፅበው እጅር ግን ኣይርስመ ዅርስ ጝጅቅ እኵ።

¹⁰ ኣውማውቅ ክታግል ተር እን ክንድጝድየንት ነሲይሽ፣ ክታጝኒል ለምርትርነ፤ ዲግተም እኳ ይውትርነ።

¹¹ ምላሰንድም ጝጭስ ዲግተ ይወው እጅርድቅ ጝጭቓ ሰቪዝ ተቫቭርሸኵ።

¹² ፃፍጨ በነቍ ንቕየቍ ዊቅ ዊን፤ ኣነጚ ወረቀትዝመ ቀለምዝ ጭቝ ኣቕ እዳጠ ግን በነቅም፤ ምላሰንድም ይናዲስተድ ፍፅም ኣቓንስ ማጥን ክታጐ ተጥ ጋፅዝ ጋፅ ዲምቅሽነ ቲስፈ ፃቨኵን።

¹³ ማርፅሽትረይ ክስንት ቝር ዲግተ ኣልስጘኵ።