2ቈረንተውስት እቂዝ 1 - ኽምጣጘ ኣይር ኪዳን

ፈወነ 1

¹ እደረት ፍቃድዝ ክርስቶስ እየሱስት ኻወርየ ኣቐው ባውሎስቲስ፣ ይናዝን ጢመቲወስቲስም፦ ቈረንተውስ ፅብረይ እደረት ምከንሸንስ፣ እኒዝጘም ድፍን ኣካይየ ፅበቍ ቅዱሳኒዝቅ፣ እፃሽተው እፃ።

² ይናኣይር እደረቲስ፣ ይናኣደረ እየሱስ ክርስቶስቲስም ፃገዝመ ዲግተዝ ክታጅቅ ኣነ።

ዲብሽተነውዙ ኣምላክ

³ ርኽርኸነዙ ኣይር፣ ዲብስተሸነውዝም ኣምላክ ኣቐው ይናኣደረ እየሱስ ክርስቶስት ኣምላክ ኣይርም ኣቐው እደረ ሚዝየንሽትነ።

⁴ ይን ይናቕም እደረቲስ ለምርነው ድብሽተነይዝ፣ ሚከረል ፅበቍድዛት ዲብሰነው ቸልናንስ ማጥን ጘጝ ይናሚከረይዝቅ ይናት ዲብሰኵ።

⁵ ክርስቶስት ስቃይድ ይናግል ንቕፀጘ፣ እኒዝጘም ይናዲብሽተነውድ ቈሽ ክርስቶስትውዝ ይናጭስ ንቕፀኵ።

⁶ ይን ሚከረ ለምርነውድ ክትን ዲብሽተነውዝመ ቓደነውዝ ችጝርናንስ ማጥን የጝ፤ ይን ዲብሽትናንድ ቈሽ ክትንም ይን ለምርነው ሚከረድየንት ኣቕልዝ ለምትርን ዲብሽትርነኵ።

⁷ ክታማጥን ፃይነው ቲስፈድ ፀናቐው የጝ፤ ምላሰንድም ይናሚከረድ ኣድልሽርነጘ፣ ይናዲብሽተነውድም ኣድልሽትርነጘ ኣርቕነኵን።

⁸ ይፅንወ! እስየስ ይናግል ችጘው ሚከረድየንት ኣርቕትርነ በንነኵን፤ ይናኣቅሚዝ ንየ ኣቐው ኽየው ሚከረ ችጝን ዊናንስቅ ይናርዅየይዝ እኳ ቲስፈ ቀቭን ዊኑን።

⁹ እርግጥዝም ክርጘዙ ፍርድ ይናግል ፊርድሸጘ ፃቭን እግዝን ዊኑን፤ እንም ኣቐውድ ክረቍድ ጒሰው እደረትውዝጚ ይናቕምትውዝ ተማምንሻይነጘ የጝ።

¹⁰ ጘጝ እነየው ክርጘዙ ኻደገይስ ይናት ቓዝኩ፤ ነስየስቅም ቓዝጡ፤ ቈሽም ይናት ቓዝጠጘ ይናቲስፈድ ጝቍዝ የጝ።

¹¹ ክትንም ይናት ክታፀለውቲዝ ከቭጥን፤ ንቕፀቍ እቅዙ ፀለውትዝ ይናጭስ ነይሽተው ይውቲዝቍዝ ንቕፀቍ እቅ ይናማጥን እደረት ሚዝየንዝጘኵ።

ባውሎስ ቈረንተውስ ፊረነው ኻለይድ ላውጠጘ

¹² ነስየ ይናምክኸድ እኒን የጝ፤ እን ኣልሚስ፣ ቲተዝም ክታጅቅ ፃይነው ዲምቅኒዝ፣ እደረቲስ ኣቐው ቅድስነዝመ ቅንነትዝ ፅብነጘ፣ ይናኽሊነድ ሚዝርደኵ፤ እንም እቀ ጥቨቭዝ ኣይጝቀ እደረት ፃገይዝ የጝ።

¹³ ኣንቭቭትርነ፣ ዊንም ተረድሽትትርነ ቸላይርነው ዊገድየንት ክታጭስ ፃፋይነቅም፤ እጝቅትቅም ተረድሽትትርነጘ ቲስፈ ፃቨኵን።

¹⁴ ክትን ይናቍዝ ማክኽሽርናንትጘ ይንም ክታቍዝ ማክኽሽነጘ ነን ይናት ተረድሽትርነውድ ግቨርዝ ኣቕሽም፣ ኣደረ እየሱስት ግርየይዝ እጝቅትቅ ተረድሽትትርንቅ።

¹⁵ እንዝም ተማምንጨር ኣቓንስቅ ሊን ጣቅምሽርናንስ የር በውግስ ክታት ገቭስጨ ኻሊ ዊኑን።

¹⁶ መቀደውንየ ፊጣንድ ክታት ጝዝ ጝዝ ገቭስጨ፣ ዋጥራንድም ክታግዝ ፃቭ ዋጥር ይዅዳትጐ ፊጣንድ ይጒደነይዝ ከቭርናስ ኻስቭ ዊኑን።

¹⁷ ያን እኒንት ኻልያንድ ሰራጨውድየንት ኣርቓው ኣቕመ ይርንኵርኑ? ዊንስ ኣልሚዙ ልምዲዝጘ ሊን፦ «የይ የይ» ዊስ ቈሽ፦ «ኣየውም ኣየውም» የርመ ተከኵን?

¹⁸ እደረ ኣምንሽተው ኣቐጘ ክታጭስም ኣልስነው ይናቃልድ፦ «የይ» ዊንም፦ «ኣየውም» ኣጠ ቸላውም።

¹⁹ ምላሰንድም ያንም ኣቑን ሲላስስመ ጢመቲወስስ፣ ይን ሲቭክነው እደረት ዅር እየሱስ ክርስቶስ፦ «የይ» ዊንም፦ «ኣየውምም» ዊኒየው፤ ዊገድ ግን ጘጝ ዊትርቅ፦ «የይ» የጝ።

²⁰ ምላሰንድም እደረ ነየው ቲስፈድቅ እጝቅ፦ «የይ» ኣቐውድ ጝቍዝ የጝ፤ ይንም ጝቍዝ እደረስ ክቭር ኣቓንስ ማጥን፦ «ኣሚን» ይነውድ እንዝ ምላሰንዝ የጝ።

²¹ ነስየ ይናትም ክታትም ክርስቶስትውዝ ፀናቕን ችብርነ ፃቨውድ እደረ የጝ፤ ይናት ይመውድም ጘጝ የጝ።

²² ይን ጝቍ ኣነጘ ደደደድሰው ጝማኽተምድየንት ይናግል ኻትመውድ፣ ቈሽም ነስየይስ ችጝነው ዊገይዝቅ ጝመንፈሲዙ ፃየነድ ይናዘኒል እቝረውድ ጘጝ የጝ።

²³ ቈረንተውስ ትጐ ዋጥር ተጢቀውድ ክታት ኻዝንሳይቀጘ የር የጝ፤ እኒን እማን ኣቒየውዝየ እደረ ሚዝርድነ።

²⁴ ፀናቕርን ችብትርነውድ እምንትዝ ኣቓንስቅ ክትን ዲስ ይርናንስ ክታጅቅ ሰራሽነኵንጚ ክታእምንቲል ሳልጥነም ኣየው።