1ተሰለቅየት እቂዝ 1 - ኽምጣጘ ኣይር ኪዳን

ፈወነ 1

¹ ባውሎስቲስ፣ ስልዋነስቲስ፣ ጢመቲወስቲስም፦ እደረ ኣይርስመ ኣደረ እየሱስ ክርስቶስትወ ኣረይ ተሰለቅየ ፅብረይ ምከንሸንስ እፃሽተው እፃ። ይናኣይር እደረቲስ፣ ኣደረ እየሱስ ክርስቶስቲስም ፃገዝመ ዲግተዝ ክታጭስ ኣነ።

ተሰለቅየት እቂዙ እምንትድ

² ይናፀለውቲዝ ክታት ጕስናⶖ እደረት ዊትርቅ ክታቍዝ ሚዝየንዝነኵን።

³ እምንቲስ ችጝሸው ክታሰቭድየንት፣ ፍቅርዝ ኣቐው ክታልቕረድየንት፣ ይናኣደረ እየሱስ ክርስቶስትል ፃይርነው ቲስፈይስ ችጝሸው ክታፅናትድየንት፣ ይናኣይር፣ ይናኣምላክም ኣቐው እደረት በዊል ቀቪጝቀ ኻስቭነኵን።

⁴ እደረስ ቀንሽርነቅ ይናፅን ክታችወ! እደረ ክታት ማርፀጘ ኣርቕንኵኑን።

⁵ ምላሰንድም ይን ክታጭስ ሲቭክነው ወንጌልድ፣ ኻይልዝመ መንፈስ ቅዱስዝ፣ እኒን ወንጌልድም እማን ኣቐጘ እርግጥኝጥ ኣቐነውዝ የጝጚ፣ ቃላን ዊግተነውዝ ጭቝም ኣየው፤ ቈሽም ክታማኽሊል ፅብናንድ ክታት ጣቅምነ ይን ኣወይን ፅብነጘ ክታቕም ኣርቕርነኵ።

⁶ ውርም እኳ ኽየው ሚከረ ችጝርንሽም፣ እደረት ቃልድየንት መንፈስ ቅዱስቲስ ችጝሸው ዲስተዝ ለምትርን ይናስመ ኣደረ እየሱስስ ተክርንኵርኑ።

⁷ እንዝም መቀደውንየስመ ኣካይየስ ፅበቍ ምእመናኒዝቅ ቀሰው ተከ ኣቕርንኵርኑ።

⁸ ኣደረት ቃልድየን ክታጊስ ፍ ወይሽተውድ መቀደውንየስመ ኣካይየስ ጭቝ ኣቒጝቀ፣ እደረትል ፃይርነው ክታእምንትድ እጝቅ ስፍረይልቅ ኣርቕሽትኩ፤ ኣቓንስቅም ይን እን ዊገይዝቍዝ ውርቅ ዊግትነ በንዛውም።

⁹ ጛይ ጝታቕም ክትን ይናት ኣወሽርን ለምትርነጘ፣ እማንተው፣ ፅበውም ኣቐው ኣምላክድየንት ኣግልግልድርናንስ ማጥን ኣወይርን ጣወታኒስ እደረ ትጐ ዋጥርድርነጘ፣ ሚዝርድጘኵ።

¹⁰ ቈሽም እደረ ክርጘይስ ጕይሰው፣ ይናትም ተረው ቍጠይስ ቓዘው ጝዅር እየሱስት ሲመይስ ተረነድ፣ ኣርውድርነኵ ኣቕርነጘ ዊግትጘኵ።