Левит 6 - Хальмг келнд орчулсн Әрүн Бичлһс

¹ Деед Эзн Мошед келнә:

² – Кемр кен чигн Деед Эзнә өмнәс му йовдл һарһад килнцд орсн болхла, кемр терүнд даалһад нег юм хадһлтха гиһәд өггдсн болхла, эс гиҗ хулхалсан нууһад, эс гиҗ өөрхн күүнәсн йосн бишәр нег юминь булаҗ авад гөрдсн болхла, –

³ эс гиҗ өөрхн күүнәннь геесн юмиг олҗ авчкад гөрдәд бәәсн болхла, тегәд тер әмтнә һарһдг килнцин негинь һарһв. Тиигхлә худл андһарар килнцән икдүлв.

⁴ Тиим йовдл һарһсн күн бурута болхла, түрүләд хулхалҗ эс гиҗ булаҗ, эс гиҗ хадһлтха гиһәд өгсиг хәрү өглго бәәхлә, аль кен-негнь геесиг тер олҗ авсн болхла;

⁵ худлахар өгсн андһарар авсн тоотан хәрү өгтхә. Һарһсн һаруһинь кевтнь хәрүлтхә, деернь нег тавн хүвинь немҗ өгтхә. Тер тоотыг цугтаһинь эзнднь һаруһинь даах бәрц бәрх өдр өгх йоста.

⁶ Деед Эзнд һару даалһна бәрцд гелң тал сүргәс эрмдг уга хуц авч иртхә. Тернь келсн үнәрн әдл болх зөвтә.

⁷ Деед Эзнә өмн гелң терүн деер гемән хәрүллһнә авъяс күцәх. Тегәд эн күн гемшәгдсн йовдласн цеврлгдх.

Бәрц шаталһна закан

⁸ Деед Эзн Мошед келнә:

⁹ – Ахаронд болн терүнә көвүдт иим заавр өг: «Кевтнь шаталһна закан эн. Кевтнь шаталһна бәрц шатагдсн ормдан сөөни дуусн өрүн күртл тәклин бәәрнд үлдх йоста. Тәкл тәксн бәәрнд һал шатх йоста.

¹⁰ Гелң олсар уйсн хувц болн нүцкн махмуднь үзгддгоһар олсн шалвр өмсәд, шаталһна хөөн тәклин ормд үлдсн үмс цуглулҗ авад тәклин ормин хаҗуд асхтха.

¹¹ Дәкәд хувцан сольҗ өмсәд, үмсиг бәәрнәс һарһад цевр һазрт асхтха.

¹² Тәклин һал шатхларн бичә унтртха. Гелң өрүн болһн терүн деер модн түлә немәд бәәтхә, шатагдх тоотыг делгәд, теднлә хамдан эвин бәрцд орулҗах өөкиг бас шататха.

¹³ Тәкл тәкҗәх ормд һал унтрлго шатад бәәх йоста».

Өдмгәр бәрц бәрлһнә закан

¹⁴ «Өдмгин бәрцин закан эн. Ахарона көвүд эн бәрциг Деед Эзнә өмн тәклин ормин өөр тәвх йоста.

¹⁵ Авч ирсн бәрцәс олив тоста нег атхм һуйр, бас ладаниг кевтнь авад тәклин ормд дееҗинь гиһәд шататха. Эннь каңкнсн үнр болх, Деед Эзнд таасгдх.

¹⁶ Наадкинь Ахарон көвүдтәһән идтхә. Эс искәсн һуйрар болһсн өдмгин бәрц әрүн ормд – Харһлтын Шатрин һаза идтхә.

¹⁷ Тер өдмгиг искәсн экәр болһдмн биш. Нанд авч ирҗәх һалын тәклин бәрцәс эн әңгинь Би Ахаронд болн терүнә көвүдт өгчәнәв. Эн әңгнь әрүнәс әрүн, килнцәс цеврллһнә болн һаруһинь даалһна бәрцлә әдл болҗана.

¹⁸ Ахарона хөөт үйнрин залу киистәнь терүг идҗ чадх. Деед Эзнд авч ирәд бәәсн һалын тәклин бәрцәс үйәс үйд, мөңкинд теднә болад күртҗәнә. Эн бәрцлә харһулгдсн тоотнь әрүн болхмн болҗана».

¹⁹ Деед Эзн Мошед келнә:

²⁰ – Ахарон болн терүнә көвүд Деед Эзнд эврәннь тос түркүлснә өдрәс авн таслвр угаһар буудян цаһан һуйрин ефән нег арвнаһар болһсн өдмгәр бәрц бәрх йоста. Терүнә өрәлинь өрүһәр, өрәлинь асхар авч иртхә.

²¹ Тиим өдмг олив тостаһар дөрвлҗн таавад болһх кергтә. Эн тадна авч ирх өдмг сәәнәр элдсн һуйрас болһгдх; терүг әңгләд үүлтн. Эннь каңкнсн үнр болх. Деед Эзнд таасгдх.

²² Тиигҗ гелң болһн кетхә – Ахарона хөөт үй. Терүнд Ахарона үлдл болад тос түркгдх. Тиим өдмг Деед Эзнд мөңкинд нерәдгдәд бүклдән шатагдмн.

²³ Гелңгин авч ирсн ямаран чигн өдмг бүклдән шатагдх бәрц – терүг идҗ болшго.

Килнцәс цеврллһнә бәрцин закан

²⁴ Деед Эзн Мошед келнә:

²⁵ – Ахаронд болн терүнә көвүдт кел: килнцәс цеврллһнә бәрц бәрлһнә диг-даран эн. Килнцәс цеврллһнә бәрц Деед Эзнә өмн шаталһна бәрц алдг ормд алгдх йоста. Эннь әрүнәс әрүн.

²⁶ Цеврллһнә бәрц кеҗәх гелң терүгән идхмн болҗана; терүг әрүн ормд Харһлтын Шатрин хашад идх кергтә.

²⁷ Эн махнд күргсн юн чигн әрүн болх. Кемр бәрцин цусн хувцнд тусхлаг, тиигхлә хувцна киртсн ормиг әрүн ормд уһах кергтә.

²⁸ Тиим бәрцин мах болһсн шавр буһш хамхлгдх йоста. Кемр бәрцин махиг улан мөңгн савд болһсмн болхла, тиигхлә тер савиг хусад усар уһах кергтә.

²⁹ Гелңгүдин отгин залус цугтан тиим бәрциг идҗ чадҗана: эннь әрүнәс әрүн юмн.

³⁰ Гемән хәрүллһнә авъяс әрүн бәәрнд күцәхәр Харһлтын Шатрт цеврллһнә бәрцин цус орулна. Терүнә хөөн махиг идҗ болшго, шатах кергтә.