Йуда 1 - Хальмг келнд орчулсн Әрүн Бичлһс

Мендллһн

¹ Би, Йуда, Исус Христосин зарц, Яковин дү, Бурхн Эцкәр дуудгдсн, хәәрлгдсн, Исус Христосар хадһлгддг таднд бичҗәнәв.

² Бурхн өршәлһән, амулң җирһлән болн хәәрлтән таднд элвгәр өгтхә!

Худл ном заадг багшнрин тускар

³ Күндтә үүрмүд мини! Маднд өггдсн аврлһна тускар би таднд бичхәр икәр седвәртә биләв. Зуг ода Бурхна улст оньдиндән даалһгдсн итклиг харстн гиҗ таднд урмд өгх кергтәһинь тоолад бичҗәнәв.

⁴ Яһад гихлә, Бурхиг соңсдго зәрм улс тадн заагт медмҗән угаһар орсн бәәнә. Эдн аля, бузр йовдлан кехд бийдән зөв өгхәр Мана Бурхна хәәрлтин туск номиг хаҗилһнә. Эн улс мана ор һанцхн Нойн болн Деед Эзн Исус Христост иткдго улс. Эдн цааҗла харһх гиҗ Бурхна Бичгт эднә тускар кезәнәс авн бичәтә бәәнә.

⁵ Деед Эзн Египетәс Эврәннь келн-улсан һарһҗ аврла. Зуг эс иткдг улсиг хөөннь уга кеҗ. Тадн энүнә тускар цуһар меддг болвчн тодлтха гиҗ келҗәнәв.

⁶ Бурхна өгсн сән чинриг юмнд тооллго, бәәсн орман үлдәсн Бурхна элчнрин тускар бас тодлтн. Бурхн эдниг мөңк цевәр күлҗ алдр өдр күртл таг харңһуд бәрҗәнә. Тер өдрт тедн цааҗлгдх.

⁷ Содом, Гомора болн өөрк балһсдын залус эн элчнрлә әдл аля йовдл кеһәд, нег-негнләһән унтсн учрас мөңк һалар цааҗлгдсмн. Энүг бас тодлтн. Эн әмтнд сагллһна үлгүр болҗана.

⁸ Тедү мет эн улс онц зүүд зүүдләд, цогцан бузрдаһад, Бурхна йосиг һолад, Бурхна элчнриг му келнә.

⁹ Бурхна ах элч Михаил бийнь чигн эрлгтә марһлдад, Мошен цогцин тускар зүткҗәсн цагт терүг му келх, гемшәх зөв бийдән өгсн уга. Тер: – Деед Эзн Бийнь чамаг хөртхә! – гиҗ келсн билә.

¹⁰ Эн улс эврән чигн эс меддго юмиг му келҗәнә. Эдн ухан уга малмуд кевтәһәр төрхәрә медсн йовдл һарһна. Эн йовдлмудар бийән үрәнә.

¹¹ Эдн басл зовлңган эдлх. Яһад гихлә, эдн Кәнлә әдл бәәнә. Икәр байҗхар седәд, Баламла әдл хаҗһр йовдл кеһәд, Корла әдл буцад үкцхәх.

¹² Тиим улс тана хургт хот эдлсн цагт ичр угаһар икәр хот идәд, хар толвс мет тадниг бузрдана. Эдн эврәннь арһан хәәнә. Эн улс салькнд көөгдсн хур асхдго үүлн мет. Эдн намрт темс өгдго модд мет. Эн модд уңгарнь суһлад таслгдсн учрас кевтән хагсҗ одҗ.

¹³ Далан дольган көөсрсн мет эдн олна нүднд ичр уга йовдл һарһҗана. Эдн хаҗисн одд мет. Бурхн эднд таг харңһуд бәәдг мөңк орм белдҗ.

¹⁴ Аадмин зурһадгч үйд бәәсн Ханок эднә тускар иигҗ әәлдҗ: – Хәләтн! Бурхна миңһн, миңһн элчнртә Деед Эзн йовҗ йовна.

¹⁵ Учрнь эн: Орчлңгин әмтнә зарһинь кех, Бурхиг соңсдго улсиг хар йовдл кеснәс көлтә, Терүнә өмнәс хорта үг келснәс көлтә Тер цааҗлх.

¹⁶ Эн улс Бурхна өмнәс үг келәд оньдин хүвдән өөлнә. Бийдән олз авхар талдан улст зуһудна, дәкәд болхла көөрнә. Эврәннь хар сансн санаһан оньдин күцәнә.

Сагллһн болн зокалмуд

¹⁷ Зуг тадн, хәәртә үүрмүд мини! Деед Эзн Исус Христосин апостолмудын урдын келсиг бичә марттн.

¹⁸ Тедн иигҗ келсн бәәнә: Сүл цагт эврәннь хар сансн санаһан күцәдг, таднар наад бәрдг улс һарч ирх.

¹⁹ Эн улс иткдг улсиг баг-багар салһх. Эдн төрхәрә бәәсн му седвәртән авлгдад, Бурхна Сәкүсн угаһар бәәнә.

²⁰ Болв тадн, хәәртә үүрмүд мини! Хамгин әрүн итклән олзлад, нег-негән сурһтн. Әрүн Сәкүснә күчәр зальвртн.

²¹ Бурхн таднд хәәртә болдгиг улм гүүнәр медҗ йовтн. Мана Деед Эзн Исус Христос эврәннь хәәрлтәр таднд мөңк җирһл өгхиг күләтн.

²² Итклдән маһдлдг улсла өршәңгү бәәтн.

²³ Зәрмнь һалас һарһҗ авртн. Зәрмстнь цаһан санаһан күргтн, зуг бийән саглтн. Эднә килнцтә седвәрмүдәр бузрдсн хувцнднь дурго болтн.

^24-25 Ор һанцхн Бурхн Мана Аврач килнцәс әрвлҗ, Эврәннь туурмҗин өмн тадниг буру уга бәәдлтә байр өгч зогсах арһта. Исус Христосар дамҗад, әмтн Бурхиг магтад күндлтхә! Эклцәс авн өдгә цагт болн мөңкиндән Бурхн хамгин күчтә болн йоста болдгиг әмтн медтхә! Тиигтхә!