MARK 1 - ASIO THSAMLAI C.L. Bible (BSI)

Alimkiutsün Yohanüh Chimtsün

¹ Goa Thso Yisu Khrista thaiutha Ngem Amei ayalou.

² E-po Isaiaüh sattaimli: “Goa nou ngiom, ‘Athaiutha ayam khemtaiu kiuao ngü jü hongthon akhako hongji.’

³ Khaiunia tsaküh liutsa nai, ‘Asam Apaou yam lükhemlou naiuso apa saihe lukü lühe ta wetsün sang!’”

⁴ Yohanüh liutsa nai, “Asam angei ainou mong lüphokle küta khiamai lülim” “naito Goa nou asam angei wankiu-e” ta chimkü shin.

⁵ Yihuda goumchi ainou khaiunia piakü naiuso Yirusalem noknio nai kihtsünso apem Yohan dongai khuküta ngüso angei thaloukü, apaüh ngüso Yordan Haiumong ai limkiu.

⁶ Yohanüh Ut pun ne ten, naiuso nyikhun nou omthsa thsakü, jongku hekü naiuso liukhiam shiukü noiküla.

⁷ Apaüh khaiuniahoi tü velutkü ngiom, “Jü phiai shiao noitsün khaiunia nou ngüko naito apa songtso, ngo apa khako kauthioau naiuso hokkhut aou sokthamaotso tsümai.

⁸ Ngü asam khiamai limkiuji, lüko jü phiai shitsün nou to asam Ashio Onthso nai limkiu-e.”

Yisu Khiamai Limtsün naiuso Lilutsün

⁹ Nung ajekhaiu ko Yisu Galil ai noitsün Nazaret ainou shin, naiuso Yohanüh apa Yordan Haiu ai limkiu.

¹⁰ Naiuso Yisu khiam ainou sungnai, aün soppankü Asio Onthso mükhamli apa dongai saotsün Yisuüh ep;

¹¹ nai aün ainou sang tsaküh ngiom, “Ni Ngü tsüojintsün Thso, ni da ngü monglamji.”

¹² Nungailu Onthso nou Yisu liutsa nai hongan.

¹³ Apa liutsa nai aopülenyi Biya nou lilukü noiküla, naiuso apa liu thainian nouko noiküla; lüko aünhonghoi nou apa hachu.

Yisuüh Ngouphek Khaiunia Püle Jonji

¹⁴ Yohan akhou tsamai thiokütün phiai, Yisuüh Galil ai shikü Goa Ngem Amei chimkü ngiom,

¹⁵ “Atao shisao-iu, naiuso Goa nokshing shimkü noin! asam mong lüphokle, küta Ngem Amei nai lümonglam!”

¹⁶ Galil khiamnok shimkü khunai, Yisuüh Simon naiuso anio nou Andria khiamnok nai nyao sokkü ep; tititenai ngüso ngouphek khaiunia noiküla.

¹⁷ Yisuüh ngüso tü ngiom, “Jü phiai ohoilut, naiuso ngo asam hao khaiunia thalouao tsande-e.”

¹⁸ Nungailu ngüsoüh nyao nou wanküta apa phiai hoilut.

¹⁹ Naiuso entso khuküta Yisuüh Zebedi thso Yakob, naiuso anio nou Yohan, ngüso lüko kheng nai nyao chioshikü epkü,

²⁰ nungailu apaüh ngüso jon, naiuso ngüso po Zebedi chaichenhoi nousoko kheng nai leankü, apa phiai hoilut.

Angei Onthso Suntsün Khaiunia Tsak

²¹ Ngüso Kapernaum ai napnai, Yisuüh Yihuda Anounyi Yihuda kamthang nai napkü tsande.

²² Ngüso apaüh tsandetsünko ngawan; tititenai apaüh ngiokhemtsandetsünsoli tsüde, lüko oukong suntsünsoli ngüso tü tsande.

²³ Nungko Yihuda kamthang nai angei onthso nou thaloutsün khaiunia tsak noiküla, naiuso apaüh wekü ngiom,

²⁴ “Nazaret hai Yisu, sam niko chhiao ti noin? Ni sam mowan-iau shiji süne? Ni sauko ngü ngeji, Ni Goa Asio ün nou noin!”

²⁵ Yisuüh apa tü, “Nyankü lünoi, naiuso apa ainou asungan!” ta ngiokhem kiukü ngiom.

²⁶ Angei onthso nou apa loian-i naiuso sang asong nou wekü, apa ainou sungkhu.

²⁷ Nungko ngüso si ngüso ongko, “Nung ti! Atsandetsün ayan tsak süne? Apaüh oukong nou angei onthso hao lüko ngiokhem kiuji, naiuso ngüsoüh apa ngio angji!” ta sangekü ngem.

²⁸ Nungailu apa thaiutha Galil goumchi lemkü apemai ngemkü khu.

Yisuüh Khaiunia Piakü Lomeiji

²⁹ Sahoi nouso Yakob si Yohan ne hakü Yihuda kamthang ainou sungküta Simon si Andria ne tsamai saitha khu.

³⁰ Simon nyai kiyashi shikü then ai saikü noiküla, nungai ngüsoüh apa thaiutha Yisu hau chiten.

³¹ Nai Yisu shikü apa pha nai thaloukü tenchunai kiyashi nou meila, naiuso apaüh ngüso hao paotsangwao.

³² Ahsham ajenap taoko, khaiuniahoi nou akiahoi naiuso angei onthso nou thaloutsünso apem Yisu dongai nialoukü shi.

³³ Nungko noknio nai noitsün khaiunia chikü tsamkha ai kamshin.

³⁴ Yisuüh akia in amomo nou kiatsün apem lomeikiu, naiuso angei onthso piakü koman. Apaüh angei onthso nouso hao titso tsüsingio-i, tiautenai ngüsoüh apa sau nung ngekü noiküla.

Yisuüh Galil nai Chimji

³⁵ Ah-ngeao atao laiukü noikü, Yisu chuküta noksong ainou aodangkün athang tsakai khukü apaüh misao sao.

³⁶ Lüko Simon naiuso apako hakü noinso Yisu tü yamkü khu,

³⁷ naiuso tilai ngüsoüh apa epiu, “khaiunia pungkü nou ni yamji,” ta ngüsoüh apa tü ngiom.

³⁸ Lüko Yisuüh ngüso tü ngiom, “Lemkü noitsün nok nouso ai lüko sam khuao noin. Ngo ngüso tü lüko chimao noin, tiautenai ngo shitsün nung thaiutha noin.”

³⁹ Nungtiphe Apa Yihuda kamthang nouso ai napkü chim, naiuso angei onthso nouso komankiukü Galil apem thapekkü tsakei.

Yisuüh Khaiunia tsak Lomeiji

⁴⁰ Je sungtsün khaiunia tsak Yisu dongai shikü kaukü, ahachu thaiutha apa tü kojakü, “Ni mongchio naito,” “Ni ngo losiokiuao shio-e.” Ta apaüh ngiom.

⁴¹ Yisu mong ai atsüojin nou miankü apa pha lolukü, akia khaiunia tü, “Ngü mongchioji,” “Ni lülosiolu!”

⁴² Nungai jamaolu je kia nou nung khaiunia ainou khuwan, naiuso apa siokü iula.

⁴³ Nai Yisuüh apa nungailu ngiomong tsak ngiokü hongan,

⁴⁴ apa tü nungti ngiom, “Anglu, nung thaiutha sau hao lachite. Lüko meson dongai saitha lükhu küta ni lomeitsün apa hau lühan; küta khaiunia pungkü nou ni lomeitsün atsüo ta mitha noiau Mosaüh thoiluttsün aa chaithio lükiu.”

⁴⁵ Lüko nung khaiunia nou khukü nung ngiongem apemai lopengau yachu, nungti apaüh thatü thsüokü chitephe Yisu lotü noksong tsakai lüko khakhakü khuao tsüshio. Nungliko apa aodangkü nai noikü khaiuniahoi alum ainou apa dongai shin.