Ester 6 - Li Santil hu

Laj Mardoqueo quiqꞌueheꞌ xlokꞌal xban li rey

¹ Saꞌ li kꞌojyi̱n aꞌan nak incꞌaꞌ quicube xcuara li rey, quixtakla xcꞌambal chak li hu li tzꞌi̱banbil cuiꞌ retalil chixjunil li ac quilajcꞌulman, ut queꞌoc chirilbal xsaꞌ li hu aꞌan chiru.

² Saꞌ li hu aꞌan queꞌxtau retalil chanru nak laj Mardoqueo quixye resil nak laj Bigtán ut laj Teres queꞌraj xcamsinquil li rey Asuero. Li cuib chi cui̱nk aꞌan xcomoneb li queꞌcꞌacꞌalen re li oqueba̱l re li rochoch li rey.

³ Li rey quixpatzꞌ reheb li yo̱queb chi cꞌanjelac chiru: —¿Cꞌaꞌru xkaqꞌue re laj Mardoqueo? ¿Ma xkaqꞌue xkꞌajca̱munquil li usilal xba̱nu cue? chan. Eb li nequeꞌcꞌanjelac chiru queꞌxye: —Ma̱cꞌaꞌ quiqꞌueheꞌ re, chanqueb.

⁴ Saꞌ ajcuiꞌ li ho̱nal aꞌan laj Amán qui-oc saꞌ li neba̱l cuan cuiꞌ lix naꞌaj li rey. Quiraj xtzꞌa̱manquil chiru li rey nak tixqꞌue chi yatzꞌecꞌ laj Mardoqueo saꞌ li naꞌajej li quixqꞌue chi yi̱ba̱c laj Amán. Li rey quixpatzꞌ: —¿Ani yo̱ chi be̱c saꞌ li neba̱l? chan.

⁵ —Aꞌan laj Amán, chanqueb li nequeꞌcꞌanjelac chiru li rey. Ut li rey quixye: —Ocsimak chak, chan.

⁶ Ut laj Amán qui-oc cuan cuiꞌ li rey ut li rey quixpatzꞌ re: —¿Cꞌaꞌru us tinba̱nu re junak li cui̱nk li nacuaj xqꞌuebal xlokꞌal? chan. Saꞌ xchꞌo̱l laj Amán nak aꞌan li ta̱qꞌuehekꞌ xlokꞌal. Quixye saꞌ xchꞌo̱l: —¿Ani ta chic tixqꞌue xlokꞌal? Caꞌaj cuiꞌ la̱in, chan.

⁷ Joꞌcan nak laj Amán quixye re li rey: —Cui ta̱qꞌue xlokꞌal li cui̱nk aꞌan, at rey,

⁸ ta̱cꞌamekꞌ chak li cha̱bil akꞌ xcomon li nacaqꞌue cha̱cuix, at rey. Ut ta̱cꞌamekꞌ ajcuiꞌ chak li cacua̱y li nacatbe̱c cuiꞌ la̱at ut ta̱qꞌuehekꞌ lix corona li cacua̱y saꞌ xjolom li narocsi nak nacatbe̱c chirix la̱at.

⁹ Ut ta̱kꞌaxtesi li rakꞌ ut li corona re junak li nim xcuanquil li nacꞌanjelac cha̱cuu. Ut aꞌan ta̱qꞌuehok re chirix li cui̱nk li ta̱qꞌue xlokꞌal. Ut laj cꞌanjel cha̱cuu tixberesi li cacua̱y saꞌ eb li be ut tixjap re chixyebal: —Joꞌcaꞌin naxba̱nu li rey re li ani ta̱raj xqꞌuebal xlokꞌal, chan.

¹⁰ Ut li rey quixye re laj Amán: —Se̱ba a̱cuib. Cꞌam li cuakꞌ aꞌin ut cꞌam li cacua̱y ut ba̱nu joꞌ xaye. Ba̱nu aꞌan re laj Mardoqueo laj judío li chunchu aran saꞌ li oqueba̱l re li cuochoch. Ba̱nu chixjunil li xaye, chan li rey.

¹¹ Laj Amán quixcꞌam li rakꞌ li rey riqꞌuin laj Mardoqueo ut quixcꞌam ajcuiꞌ li cacua̱y. Quixqꞌue li rakꞌ chirix laj Mardoqueo. Ut nak cuan chirix li cacua̱y laj Mardoqueo, laj Amán quixberesi li cacua̱y saꞌ eb li be ut quixjap re chixyebal: —Joꞌcaꞌin naxba̱nu li rey re li ani naraj xqꞌuebal xlokꞌal, chan.

¹² Nak quisukꞌi chak laj Mardoqueo chi be̱c co̱ cuiꞌchic saꞌ li oqueba̱l re li rochoch li rey. Ut laj Amán quixxulub xjolom xban xxuta̱n ut co̱ saꞌ junpa̱t saꞌ rochoch chi ra saꞌ xchꞌo̱l.

¹³ Nak quicuulac saꞌ rochoch, quixserakꞌi chixjunil li quixcꞌul re lix Zeres li rixakil ut reheb ajcuiꞌ li rami̱g li nequeꞌqꞌuehoc xnaꞌleb. Ut eb aꞌan queꞌxye re: —Xatiquib xsachbal la̱ cuanquil chiru laj Mardoqueo. Xban nak aꞌan aj judío la̱at incꞌaꞌ naru tatnumta̱k saꞌ xbe̱n. Aꞌan ban ta̱numta̱k saꞌ a̱be̱n la̱at, chanqueb.

¹⁴ Ma̱jiꞌ ajcuiꞌ nequeꞌrakeꞌ chi a̱tinac nak queꞌcuulac li eunucos li nequeꞌcꞌanjelac chiru li rey chixcꞌambal laj Amán saꞌ junpa̱t saꞌ li ninkꞌe li quixcꞌu̱b lix Ester.