Ester 4 - Li Santil hu

Laj Mardoqueo quixtzꞌa̱ma chiru lix Ester nak tixcoleb lix tenamit

¹ Nak quirabi li cꞌaꞌru quicꞌulman, laj Mardoqueo quixpej li rakꞌ xban xrahil xchꞌo̱l ut quixqꞌue li kꞌes ru tꞌicr chirix ut quixqꞌue li cha chirix. Ut co̱ saꞌ li tenamit. Japjo re chi ya̱bac xban xrahil xchꞌo̱l.

² Quicuulac saꞌ li oqueba̱l re li rochoch li rey. Abanan incꞌaꞌ qui-oc xban nak ma̱ ani naru na-oc saꞌ li rochoch li rey cui cuan li kꞌes ru tꞌicr chirix.

³ Saꞌ eb li tenamit li cuanqueb rubel xcuanquil li rey Asuero quicuulac resil li chakꞌrab li quixqꞌue. Quicuan jun nimla rahil chꞌo̱lej saꞌ xya̱nkeb laj judío. Queꞌayunic ut queꞌya̱bac. Queꞌxqꞌue li kꞌes ru tꞌicr chirixeb ut nabaleb queꞌxyocob rib saꞌ cha xban xrahil xchꞌo̱leb.

⁴ Eb li ixk ut eb li eunucos li nequeꞌcꞌanjelac chiru li reina Ester queꞌxye re li cꞌaꞌru yo̱ laj Mardoqueo. Cꞌajoꞌ nak quirahoꞌ xchꞌo̱l lix Ester. Quixtakla li cha̱bil akꞌ re laj Mardoqueo re nak ta̱risi li kꞌes ru tꞌicr li cuan chirix ut tixtikib rib chi cha̱bil. Abanan laj Mardoqueo incꞌaꞌ quiraj xcꞌulbal li quixtakla li reina.

⁵ Li reina Ester quixbok laj Hatac xcomoneb laj cꞌanjel chiru li rey li quiqꞌueheꞌ re ta̱cꞌanjelak chiru xban li rey. Quixtakla aꞌan riqꞌuin laj Mardoqueo re nak tixpatzꞌ re cꞌaꞌru yo̱ chixcꞌulbal ut cꞌaꞌut nak yo̱ chixba̱nunquil chi joꞌcan.

⁶ Laj Hatac co̱ chi a̱tinac riqꞌuin laj Mardoqueo. Aꞌan cuan saꞌ li be li cuan chiru li oqueba̱l re li rochoch li rey.

⁷ Laj Mardoqueo quixserakꞌi re chixjunil ut quixye ajcuiꞌ re li joꞌ qꞌuial li tumin li quixyechiꞌi laj Amán re tixqꞌue saꞌ lix naꞌaj lix tumin li rey cui ta̱sachekꞌ ruheb chixjunileb laj judío.

⁸ Quixqꞌue jun li hu re, li tzꞌi̱banbil cuiꞌ li chakꞌrab li quixqꞌue li rey, li naxye nak teꞌcamsi̱k chixjunileb laj judío. Quixye re nak tixkꞌaxtesi li hu re lix Ester re tixnau cꞌaꞌru yo̱queb chixcꞌulbal. Ut quixtakla ajcuiꞌ xyebal re lix Ester nak ta̱xic chi a̱tinac riqꞌuin li rey, ut tixtzꞌa̱ma chiru li rey nak ta̱ril taxak xtokꞌoba̱l ruheb laj judío, li rech tenamitil lix Ester.

⁹ Laj Hatac quisukꞌi riqꞌuin lix Ester ut quixserakꞌi re chixjunil li quiyeheꞌ re xban laj Mardoqueo.

¹⁰ Ut lix Ester quixtakla cuiꞌchic laj Hatac riqꞌuin laj Mardoqueo re nak tixye re li a̱tin aꞌin:

¹¹ —Chixjunileb li nequeꞌcꞌanjelac chiru li rey, joꞌqueb ajcuiꞌ li tenamit li cuanqueb rubel xcuanquil, nequeꞌxnau nak li chakꞌrab naxye nak ta̱camsi̱k li ani ta̱oc riqꞌuin li rey chi incꞌaꞌ bokbil xban li rey, usta cui̱nk usta ixk. Caꞌaj cuiꞌ nacoleꞌ cui li rey tixtaksi li xukꞌ oro saꞌ xbe̱n retalil nak incꞌaꞌ ta̱camsi̱k. Ac xnumeꞌ laje̱b xcaꞌcꞌa̱l cutan ut la̱in toj ma̱jiꞌ chic ninbokeꞌ xban li rey, chan lix Ester.

¹² Ut queꞌxye re laj Mardoqueo li cꞌaꞌru quixye lix Ester.

¹³ Ut laj Mardoqueo quixtakla xyebal re lix Ester li a̱tin aꞌin: —Ma̱cꞌoxla nak tatcolekꞌ la̱at yal xban nak cuancat saꞌ rochoch li rey. Cui tocamsi̱k la̱o, tatcamsi̱k ajcuiꞌ la̱at.

¹⁴ Cui ti̱c ma̱cꞌaꞌ nacaba̱nu la̱at anakcuan, la̱in ninnau nak cuan jun li ta̱colok reheb laj judío. Aꞌut la̱at joꞌqueb ajcuiꞌ li ralal xcꞌajol la̱ yucuaꞌ texcamsi̱k. Ma̱re anchal re xtenkꞌanquileb la̱ tenamit nak xatqꞌueheꞌ chokꞌ reina, chan laj Mardoqueo.

¹⁵ Ut lix Ester quixtakla xyebal re laj Mardoqueo chi joꞌcaꞌin:

¹⁶ —Tatxic ut ta̱chꞌutubeb chixjunileb laj judío li cuanqueb Susa. Ye reheb nak teꞌayunik ut teꞌtijok chicuix. Incꞌaꞌ teꞌucꞌak chi moco teꞌcuaꞌak chiru oxib cutan ut oxib kꞌojyi̱n. Ut joꞌcan ajcuiꞌ tinba̱nu la̱in cuochbeneb li ixk li nequeꞌcꞌanjelac chicuu. Chirix aꞌan la̱in tinxic chi a̱tinac riqꞌuin li rey, usta tinkꞌet li chakꞌrab. Ut cui tincamsi̱k, chincamsi̱k, chan lix Ester.

¹⁷ Ut laj Mardoqueo co̱ ut quixba̱nu chixjunil li quiyeheꞌ re xban lix Ester.