Kalase 1 - Ku̍o̍ Delee 1999

¹ Mɔ̍ Pɔɔ, ɛ̍ nu̍ Nyɔsoa-a wlùh iě Jusu Klai-a gba̍tòà nu̍. Nɔ̌ ǐn ke à de̍di̍i̍ Timote we̍ bo chlǐh-dɛ̍ la ɛ̍ sɔ-ɔ.

² Ɛ̍ mu̍ dě Nyɔsoa nyɔ̍ ùh nu̍-a à de̍di̍i̍ᵻ ùh gbaɛ-a Klai wlùh dǒ Kalase wlɔ̀ di̍i̍-ɛ we̍. Ǎn sà nǐ wɔ̍n, à Baa Nyɔsoa-a blɛ ke ɔ̍ wlùh-a i̍ tè-ɛ iě dǒ mɔ̀ we̍ nɛ.

Pɔɔ ba̍le-e iě ɔ̍ po̍ Nyɔsoa tlɔ̌

³ Pò à ja dǒ mɔ̀-a tàà ba̍le ti̍ kli̍hgbɛ̍ we̍-ɛ, nɛ̀ à po̍ Nyɔsoa ɔ̀ nu̍-a à Joi Jusu Klai Baa-a tlɔ̌.

⁴ Ka mɔ̀ gbaɛ-a Jusu Klai wlùh-ɛ, ɛ̍ kɔn pɔ̀n bo à wɔ̌n, ɛ̍ ke ka mɔ̀ kma-a Nyɔsoa nyɔ̍ kli̍hgbɛ̍-a tìh-ɛ ke.

⁵ Mɔ̀-a nu̍ ìh la, dɛ̍nu̍ɛ, ɛ̀ mɔ̀ kɔ̍-a wlùh i̍-ɛ ɛ̍ tè-eɛ i̍ dě ja̍i̍wlɔ̀ dǒ mɔ̀ we̍. Ti̍ tìh-a taǐn pɔ̀n chɛ̀ sàɛ̀-a ji̍-ɛ i̍ dě mɔ̀ we̍-ɛ, dǒ mɔ̀ wɔ̌n-ɛ wlùh kɛ̍n i̍ kɔ̍ dɛ la ɛ̍ nynɛ̌.

⁶ Pɔ̀n chɛ̀ la ɛ̍ ku̍ i̍ iě ɛ̍ wɔ̀ ka bloa̍ kli̍hgbɛ̍ dlǔ. Kǎ ɛ̍ nu̍ ke dě mɔ̀ nynɛ̌ sɔ dǒ weɛ̍ mɔ̀ wɔ̌n-a ɛ̍ iě mɔ̀ ju̍o̍e-a Nyɔsoa-a blɛ we̍ i̍-ɛ.

⁷ À tìh kma nyɔ̍ Ipafla, ɔ̀ nu̍-a à ba̍ pòi̍ju ɔ̀ nu̍-a wlùh gbaɛ nyɔ̍ dǒ à wɔ̀ɔ̀ dě Klai-a dbo̍ nu̍-ɛ di̍i̍-ɛ, ɔ̍ bo mɔ̀ cheǎn-ɛ ɛ̍ we̍.

⁸ Ka Nyɔsoa-a Sùù nyǐ-a mɔ̀ jbɛɛ-ɛ, ɔ̍ bo ɔ̀ sèàɛ̍ à wlùh.

⁹ Ti̍ à wɔ̌n-a mɔ̀-a dɛ we̍ i̍-ɛ, sɔ dǒ ti̍ laa̍ we̍-ɛ, à-a se̍a dǒ mɔ̀-a tàà ba̍le-ɛ bɔ̌. Ɛ̍ kɔn à tèle Nyɔsoa i̍ mɔ̀ iě ɔ̍ wlùh juo, ɛ̍ ke flɔ̍nwlùh kli̍hgbɛ̍ ke dɛ̍ɛ̍ i̍ wɔ̌n-ɛ ɔ̍ Sùù-a nyǐ-a nyɔ̍-ɛ ke.

¹⁰ Pò ɛ̍ nɛ laan-ɛ, nɛ̀ mɔ̀-a mu̍ dě kmɔ̌ ɛ̀ po̍-a Joi gbǐh-ɛ di̍i̍ nɛ, mɔ̀ iě ɔ̍ wlùh i̍ tè-e mɔ̀ iě tlo dě dbo̍ chɛ̀ kli̍hgbɛ̍ di̍i̍. Nɛ̀ mɔ̀-a mu̍ ku̍ dě Nyɔsoa juo-ɛ di̍i̍.

¹¹ Ǎn sà nǐ wɔ̍n Joi-a tìh-a i̍ bɛ̌-ɛ gbǐh iě ɛ̍ nu̍ mɔ̀-a kmu-ɛ iě gbǐh kɛ̍n nɛ. Wɛ̀ mɔ̀ iě-e klì i̍ ku̍ dǒ dɛ̍ᵻ kli̍hgbɛ̍ we̍ dě wlùh i̍ gbɛ̍n-ɛ di̍i̍, mɔ̀ iě nmɔ.

¹² Wɛ̀ mɔ̀ iě Baa Nyɔsoa tlɔ̌ po̍, ɔ̀ jɔ nɛ-a kmɔ̌ wɛ̀ mɔ̀ iě-a ɔ̍ nyɔ̍ nynɛ̌ gbǎ, iě dɛ̍ ɔ̍ tè-a i̍ dě sɔ̀npli di̍i̍-ɛ mɔ̀ kɔn-a ɛ̍ fɔ̌ wɛ̀-ɛ.

¹³ Ɔ̍ sèìe àɔ̀ dě kwile-a gbǐh sɔ̀n, wɛ̀ ɔ̍ blě à te̍ete̍ iě ɔ̍ gba̍ à dě ɔ̍ tìh kma Jǔ-a kmɔ̌ wlu̍ i̍ kɔn-ɛ di̍i̍.

¹⁴ Ɔ̍ Jǔ sà à dě kàn kwa̍a̍. Ɛ̍-ɛ bo ɛ̀ nu̍-a à gblɛ̍n sɔ̀ɛ̀n-a tìh i̍ tǎli-ɛ.

Klai bo ɔ̀ nu̍ sàǐtòò Jǔ

¹⁵ Klai ɔ̀ nyɔ̍-a jě-aɛ, ɔ̍ nɛ dě Nyɔsoa ɔ̀ nyɔ̍-ɔ jě-aɛ ɔ̍ tu̍ di̍i̍, iě ɔ̍ nu̍ sàǐtòò Jǔ kle̍kle̍ dǒ dɛ̍ᵻ kli̍hgbɛ̍ ìh nui-a nɔ̌ kmɔ̌-ɛ jǔ.

¹⁶ Dɛ̍nu̍ɛ, dɛ̍ᵻ kli̍hgbɛ̍ nɛ-a dě ja̍i̍wlɔ̀-ɛ ke jih nɛ-a nɔ̌ kmɔ̌-ɛ, dě ɔ̍ ja̍a̍ bo i̍h nui-ɛ. Jih nyɔ̍-a jě-aɛ ke jih nyɔ̍-ɔ jě-aɛ, ɛ̍ bo ɛ̀ nu̍-a gbǐh ke, nyɔ̍-a wlu̍ kwa̍ blě nyɔ̍ ke, joi kli̍hgbɛ̍ nɛ-a dě dlǔwèàì-ɛ ke tùn blě nyɔ̍ ke, dɛ̍ᵻ kli̍hgbɛ̍ nui-ɛ dě ɔ̍ ja̍a̍, iě ɔ̍ kɔn i̍h.

¹⁷ Ɔ̍ nɛ-ɛ dǒ dɛ̍ᵻ kli̍hgbɛ̍ jǔ, iě dɛ̍ᵻ kli̍hgbɛ̍ gbe̍ɛ̍ɛn i̍ dě ɔ̍ ja̍a̍.

¹⁸ Chɔchi̍h nu̍ ɔ̍ ku̍ iě ɔ̍ nu̍ ɛ̍ dlǔ. Ɔ̍-ɔ bo ɔ̀ nu̍ tɔ̀blɔ̍ɔ̍, iě ɔ̍ nu̍ sàǐtòò Jǔ ɔ̀ wlǔh-e, wɛ̀ ɔ̍ iě dɛ̍ᵻ kli̍hgbɛ̍-a chìnɔ̀ɔ̀n nu̍.

¹⁹ Dɛ̍nu̍ɛ, Nyɔsoa-a wlùh tè i̍ ɔ̍ nɛka kli̍hgbɛ̍ iě dě ɔ̍ Jǔ la ja̍a̍ nɛ.

²⁰ Dě ɔ̍ ja̍a̍ bo Nyɔsoa ke dɛ̍ᵻ kli̍hgbɛ̍ gbǎ-ɛ tàdùè. Jih nɛ-a nɔ̌ kmɔ̌-ɛ ke, jih nɛ-a dě ja̍i̍wlɔ̀-ɛ, ɔ̍ dǒ gbàɛ̍ kɛ̍n i̍ tu̍ wlì mɛ̌ɛ bo ɛ̀ gbe̍ɛ̍ɛn i̍h ke Nyɔsoa-a wlu̍ kɛ̍n i̍ dode̍.

²¹ Mɔ̀ poe Nyɔsoa kɛ̍n i̍ tɛin, iě mɔ̀ nu̍ ɔ̍ nyɛ̌-nyɔ̍ dǒ dɛ̍ᵻ sɔ̀nᵻ mɔ̀ nu̍-aɛ we̍.

²² Jɛ kaka la̍ ɔ̍ Jǔ ɔ̀ mɛ̌-a dě nyi̍ɔ̍ku di̍i̍-ɛ, ɛ̍-ɛ nɛ kmɔ̌ iě Nyɔsoa ke mɔ̀-a kmɔ̌ gbe̍ɛ̍ɛn i̍ wɛ̀. Mɔ̀ wɛ̀ nɛi̍ iě mɔ̀ nɛ wlaǎwla, mɔ̀-a nu̍-dɛ̍ᵻ wɛ̀ gblɛ̍ja̍i̍ dě ɔ̍ jlǐh.

²³ Jɛ nɛ̀ mɔ̀ kɔn mɔ̀ iě wlùh gbaɛ dluwe̍ i̍ gba̍, mɔ̀ iě gbǐh blě, mɔ̀ iě dě tu̍ i̍ ku̍ dǒ pɔ̀n chɛ̀ mɔ̀ wɔ̌n-aɛ pùn. Ɛ̍ bo ɛ̀ nu̍ wlì tè dɛ̍, mɔ̀ bɔ̌ dǒ ɛ̍ de̍e̍ sɔ-ɛ. Pɔ̀n chɛ̀ la ɛ̍ kɔn tìh bo ɛ̀ bla̍-ɛa dě kmɔ̌ nyɔ̍ kli̍hgbɛ̍ we̍. Mɔ̍ Pɔɔ la, ɛ̍ kɔn pòi̍ju bo ǐn nu̍.

Pɔɔ-a gbǐh se̍-e gbɔ̀lɔ

²⁴ Kaka la̍ tìh ǐn jě-a dǒ mɔ̀ we̍-ɛ, ɛ̍ po̍ ǐn mɔna̍-a. Dɛ̍nu̍ɛ, tìh ǐn jě-a dǒ ǎn nyi̍ɔ̍ku we̍-ɛ, ɛ̍ nɛ kmɔ̌ wɛ̀ tìh jě-ɛ sie-a dǒ Klai we̍-ɛ, iě ǐn wɔ̀ ɛ̍ i̍ dǒ chɔchi̍h ɛ̀ nu̍-a ɔ̍ ku̍-ɛ we̍.

²⁵ Wɛ̀ Nyɔsoa nu̍ ǐn chɔchi̍h-a chɛ̀ ɛ̍ pòi̍ju we̍i̍, wɛ̀ iě ɔ̍ wlu̍-a gblangbai̍ bla̍ dě mɔ̀ we̍.

²⁶ Dɛ̍ ɛ̀ sìle-a de tɛin-ɛ, ɛ̍ wlǔh tà wɛ̀ kaka dǒ Nyɔsoa nyɔ̍ we̍.

²⁷ Nyɔsoa nu̍ ɛ̀ la, dɛ̍nu̍ɛ, ɔ̍ pɔ̀n u̍h iě ɛ̍ juo ka dɛ̍ ɛ̀ sìle-a dě ùh se̍-a Juu nyɔ̍-ɛ nynɛ̌-ɛ ɛ̍ tìh bɛ̌-a i̍ kaa̍ka-ɛ. Dɛ̍ ɛ̀ sìle-a bo ɛ̀ nu̍-a Klai ɔ̀ nɛ-a dě mɔ̀ ja̍a̍-ɛ. Ɔ̍-ɔ bo ɔ̀ nu̍ wlì tè nyɔ̍ dǒ tìh-a i̍ bɛ̌-ɛ jě-ɛ we̍.

²⁸ À bla̍ ɔ̍ tìh dě nyɔ̍ kli̍hgbɛ̍ we̍. À gbòɛ̀ɛ̀ iě à po̍ u̍h nǎ dǒ flɔ̍nwlùh kli̍hgbɛ̍ we̍. Nɛ̀ ɛ̍ mu̍ kmɔ̌ nɛ u̍h iě ku̍ dě dɛ̍ɛ̍ i̍ wɔ̌n-ɛ di̍i̍ dě Klai ja̍a̍.

²⁹ Ɛ̍ kɔn ǐn nu̍ dbo̍, iě ǐn po̍ gbɔ̍igbɔ̍ dǒ ǎn kmu-gbǐh ìh Klai po̍-a dě ǐn ku̍u̍-ɛ we̍.