3 Chɔɔn 1 - Ku̍o̍ Delee 1999

¹ Chlǐh-dɛ̍ la ɛ̍ sɔ nɔ̌ mɔ̍ ɔ̀ nu̍-a mɔ̀-a Klaa-ɛ we̍. Ɛ̍ mu̍ dě ǎn tìh kma nyɔ̍ Kaeɔ we̍, ɔ̀ kɔn tìh ǐn kma-a dě tìh-a taǐn di̍i̍-ɛ.

² Ǎn tìh kma nyɔ̍, ǎn sà nǐ wɔ̍n dɛ̍ᵻ kli̍hgbɛ̍ iě nmɔ la̍ mu̍ dǒ ìn we̍, wɛ̀ ìè blee nɛ. Ǐn juo ɛ̍-ɛ, dɛ̍ᵻá mu̍ nmɔ la̍ dǒ àn wlùh gbaɛ we̍.

³ À de̍di̍i̍ᵻ duuh sǐ-a da̍a i̍-ɛ, wɛ̀ ka àn nu̍-a tìh-a taǐn dɛ̍ɛ̍ jě-ɛ, iě àn wɔ̀-a dǒ ɛ̍ de̍e̍ ke̍ ma̍u̍-ɛ, u̍h sèàɛ̍ ǐn wlùh. Sɔ ɛ̍ po̍ ǐn mɔna̍-a kaa̍.

⁴ Pò ǐn wɔ̌n ǎn nynuu̍-a dǒ tìh-a taǐn de̍e̍ wɔ̀ pɔ̀n-ɛ, nɛ̀ dɛ̍ dɛɛ se̍ ǐn mɔna̍-a po̍ ɛ̍ se̍ ɛ̍ sìì.

Kaeɔ po̍-eɛ tìhwe̍

⁵ Ǎn tìh kma nyɔ̍, ìn nu̍ wlì tè nyɔ̍ dǒ ka àn nu̍-a à de̍di̍i̍ᵻ sɔ̍nᵻ sɔɔ̌n i̍ gbɛ̍n-ɛ we̍. À de̍di̍i̍ᵻ nu̍-a dihwi̍hᵻ gbejii̍-ɛ bo ǎn dǎ gbòǒ.

⁶ U̍h-a sà àn nyɔ̍-ɔ jbɛɛ tìh i̍ dě chɔchi̍h we̍. Dbǎkà, gbɛ̀n dǒ u̍h we̍ i̍ ka mɔ̀ kɔn mɔ̀ iě-a dǒ Nyɔsoa-a pòi̍nynuu̍ we̍ i̍ gbɛ̀n-ɛ nu̍-ɛ, wɛ̀ u̍h-a dihwa̍a̍ iě chlà.

⁷ Dɛ̍nu̍ɛ, Klai-a tìh bo u̍h-a na we̍, iě u̍h se̍ ùh se̍-a wlùh gbaɛ blě nyɔ̍-ɛ dɛ̍ kwa̍a̍ i̍ pɔ̀n-ɛ.

⁸ Ɛ̍ we̍ nyɔ̍ laa̍, àɔ̀ bo à kɔn à iě u̍h sɔ̍n we̍ po̍, wɛ̀ u̍h ke à iě tìh-a taǐn-a dbo̍ tàdùè nui nyɔ̍ nu̍.

Daotlofi se̍ wɔ̌n

⁹ Ǐn chlǐh chɔchi̍h chlǐh-dɛ̍ tile we̍. Jɛ Daotlofi jɔ nyɔ̍ klaa nu̍ dɛ-a po̍-a gbǐh-ɛ, ɔ̍ dounᵻ se̍ à we̍ nɛ.

¹⁰ Jɛ pò ǐn ji̍-ɛ, nɛ̀ ǎn mu̍ ɔ̍ nu̍-dɛ̍ᵻá kunǎ po̍. Ɔ̍ sà dɛ̍ᵻ sɔ̀nᵻ dǒ à pùn, iě ɔ̍ tmɔ̌-ɛ à si̍h-i. Ɛ̍ nɔ̀ɔ̍, ɛ̍ se̍-o dɛ̍ nu̍ ke̍ gbɔ̀ɔ, jɛ ɔ̍ sà de̍di̍i̍ᵻ ùh nu̍-a dihwi̍hᵻɛ́ jlǐhɛ̍ we̍, iě juh-a pɔ̀n-a u̍h-a tìh jlǐhɛ̍ i̍ gbɛ̍n-ɛ i̍-ɛ, ɔ̍ po̍ u̍h bɔ̌ i̍. Iě ɔ̍ po̍ u̍h sɔ̀n i̍ dě chɔchi̍h-i.

¹¹ Ǎn tìh kma nyɔ̍, bɔ̌-e dɛ̍ sɔ̀n-a wɔ̀ɔ̀ i̍ sà-a, jɛ dɛ̍ chɛ̀-a wɔ̀ɔ̀ bo ìè-e i̍ sà. Nyɔ̍ jɔ nu̍-a dɛ̍ chɛ̀-ɛ, nɛ̀ ɔ̍ sɔ dě Nyɔsoa we̍. Jɛ nyɔ̍ ɔ̀ nu̍-a dɛ̍ sɔ̀n-ɛ, nɛ̀ ɔ̍-ɔ se̍a Nyɔsoa jě.

¹² Dimɛtleɔ-a tìh chɛ̀-a sàànsi̍i̍h bo nyɔ̍ kli̍hgbɛ̍ nu̍. Ɔ̍ gblɛ̍n bo ìh to ɛ̍ ke ka ɔ̍ nu̍-a tìh-a taǐn nyɔ̍-ɛ, iě à chɛ̀ nu̍ ɔ̍ tìh chɛ̀-a sàànsi̍i̍h ke. Ìn juo i̍h dɛ̍ kɔn sàànsi̍i̍h à nu̍-aa nɛ̀ tìh-a taǐn bo.

Bɔ̌ɛ-o wlu̍ la

¹³ Ǐn blě dɛ̍ᵻ dɔu iě ìn wlùh sèàɛ̍, jɛ ǐn se̍ ɛ̍ nu̍-ɛ i̍ pɔ̀n dǒ chlǐh-tu̍ we̍.

¹⁴ Ǐn tè ɛ̍ wlì ìn ke ǐn ke à mu̍ jiěe suei̍, nɛ̀ à mu̍ bu̍hᵻ i̍ slo̍e, wɛ̀ à iě sɔ̀ìn chɛ̍n.

¹⁵ Ǎn sà nǐ wɔ̍n Nyɔsoa iě ìn wlùh-a i̍ tè-ɛ nyǐ. Ba̍ᵻ kli̍hgbɛ̍ la̍ u̍h sà ìn nyinɔ̍ i̍. Àɔ̀ sà ba̍ᵻ kli̍hgbɛ̍ nyinɔ̍ i̍ ke due due.