2 Chɔɔn 1 - Ku̍o̍ Delee 1999

¹ Chlǐh-dɛ̍ la ɛ̍ sɔ nɔ̌ mɔ̍ ɔ̀ nu̍-a mɔ̀-a Klaa-ɛ we̍. Ɛ̍ mu̍ dě Nynɔ̌ Chɛ̀ ɔ̀ Nyɔsoa tba̍-a chèɛ̀-ɛ ke ɔ̍ nynuu̍ we̍. Ǐn jbɛɛ mɔ̀-ɔ dě tìh-a taǐn di̍i̍. Ɛ̍ se̍ ǐn nɛ due, jɛ nyɔ̍ kli̍hgbɛ̍ ùh juo-a tìh-a taǐn-ɛ, u̍h jbɛɛ mɔ̀-ɔ ke.

² À jbɛɛ mɔ̀-ɔ, dɛ̍nu̍ɛ, tìh-a taǐn nɛ dě à ja̍a̍, iě ɛ̍ ke à mu̍ na nɔ̌ kmɔ̌-a kmɔ̌.

³ Ǎn sà nǐ wɔ̍n, Baa Nyɔsoa ke Jusu Klai ɔ̀ nu̍-a Baa-a Jǔ-ɛ, u̍h iě à wlùh-a i̍ tè-ɛ nyǐ. Ǎn sà nǐ wɔ̍n ke u̍h iě à wɔɛ ke blɛ we̍ blě-e dě tìh-a taǐn ke jbɛɛ di̍i̍.

Mɔ̀ à jbɛɛ we̍

⁴ Ɛ̀ kɔn taǐn Baa Nyɔsoa la̍ à iě-a dǒ tìh-a taǐn de̍e̍ wɔ̀-ɛ nu̍-ɛ, àn nynuu̍ duuh ǐn jě-aɛ, kǎ u̍h-a nu̍. Sɔ ɛ̍ po̍ ǐn mɔna̍-a kaa̍.

⁵ Nɛ̀ɛ̍, Nynɔ̌ Chɛ̀, ǐn gbɛ̍n àn bu̍hᵻ i̍, mɔ̀ à iě we̍ jbɛɛ. Ɛ̀ la ɛ̍ se̍ telě delee ǐn se̍ ìn we̍ chlǐh. Jɛ telě à blě-a se̍e̍ sɔ dě tɔ̀blɔ̍ɔ̍-ɛ, ɛ̍-ɛ bo.

⁶ Ɛ̀ nu̍-a jbɛɛ-ɛ, ɛ̍ nu̍ à iě dǒ Nyɔsoa-a telě de̍e̍ wɔ̀. Ɛ̀ nu̍-a telě mɔ̀ sà-a wɔ̌n-ɛ dě tɔ̀blɔ̍ɔ̍-ɛ, ɛ̍ nu̍ mɔ̀ iě dǒ jbɛɛ de̍e̍ wɔ̀.

⁷ Nyɔ̍ i̍ boe nyɔ̍ dɔu-a sì la̍ blǔh we̍. Ka Jusu Klai ji̍-a dě nyi̍ɔ̍tu di̍i̍-ɛ, nyɔ̍ ùh se̍-a ɛ̍ tìh i̍ wɔ̌ɛn-ɛ, nɛ̀ nyɔ̍ i̍ boe nyɔ̍ ke Klai-a nyɛ̌-nyɔ̍ bo.

⁸ Ɛ̍ tìh-ɛ, mɔ̀ nu̍ mɔ̀-a chɛ̀-a nɛnɛ̌, wɛ̀ mɔ̀-ɔ se̍-e dɛ̍ kɔn dbo̍ mɔ̀ nu̍-aɛ jě, wɛ̀ mɔ̀ iě pɛ̌ɛ la jě gblaan.

⁹ Nyɔ̍ jɔ se̍-a dǒ Klai-a nǎ po̍ wlu̍ de̍e̍ wɔ̀ wɛ̀ ɔ̍ tàn-ɛa ɛ̍ kɛ̍n-ɛ, nɛ̀ ɔ̍ tba̍ Nyɔsoa chla. Jɛ nyɔ̍ ɔ̀ nɛ-a dǒ ɔ̍ nǎ po̍-ɛ de̍e̍-ɛ, nɛ̀ Baa Nyɔsoa ke ɔ̍ Jǔ-a tìh bo ɔ̍ wɔ̌ɛn-ɛ.

¹⁰ Pò nyɔ̍-o-nyɔ̍ ji̍ dǒ mɔ̀ we̍ wɛ̀ ɔ̍ se̍ nǎ po̍ wlu̍ la ja-ɛ, nɛ̀ mɔ̀ bɔ̌ ɔ̍ gbò we̍ gba̍-a. Mɔ̀ bɔ̌ ɔ̍ tàlo̍-a chɛ̀ po̍-ɛ.

¹¹ Dɛ̍nu̍ɛ, nyɔ̍ mu̍-a ɔ̍ tàlo̍ po̍-ɛ, nɛ̀ ɔ̍ gbǎ ɔ̍ kà gblɛ̍n-ɛ wɛ̀ ke.

Bɔ̌ɛ-o wlu̍ la

¹² Ǐn blě dɛ̍ᵻ dɔu iě-e sà dě mɔ̀ we̍, jɛ ǐn se̍ ɛ̍ dǐfluh ke chlǐh-tu̍ nui mu̍. Ǐn tè ɛ̍ wlì iě dě mɔ̀ we̍ i̍ nala ji̍ nmɔ jii̍, wɛ̀ à iě bu̍hᵻ i̍ slo̍e à iě sɔ̀ìn chɛ̍n, iě à nmɔ-ɛ iě kwlǎ wɛ̀.

¹³ Ìn De̍di̍i̍ Nynɔ̌gbaɔ ɔ̀ Nyɔsoa tba̍-a chèɛ̀-ɛ, ɔ̍ nynuu̍ la̍ u̍h sà ìn nyinɔ̍ i̍.