2 Kɔwlɛntiɔn 1 - Ku̍o̍ Delee 1999

¹ Mɔ̍ Pɔɔ, ɛ̍ nu̍ Nyɔsoa-a wlùh iě Jusu Klai-a gba̍tòà nu̍. Nɔ̌ ǐn ke à de̍di̍i̍ Timote we̍ bo chlǐh-dɛ̍ la ɛ̍ sɔ-ɔ. À chlǐh-ɛ dě Nyɔsoa-a chɔchi̍h ɛ̀ nɛ-a dě Kɔwlɛn wlɔ̀ di̍i̍-ɛ we̍, ɛ̍ ke Nyɔsoa nyɔ̍ kli̍hgbɛ̍ ùh nɛ-a dě Akaia bloa̍ kɛ̍n-ɛ ke.

² Ǎn sà nǐ wɔ̍n, à Baa Nyɔsoa ke Joi Jusu Klai iě mɔ̀ blɛ ke wlùh-a i̍ tè-ɛ nyǐ.

Pɔɔ po̍ Nyɔsoa tlɔ̌

³ Mɔ̀ à po̍ Nyɔsoa tlɔ̌ ɔ̀ nu̍-a à Joi Jusu Klai Baa-ɛ. Ɔ̍ nu̍ wɔɛ kɔn Baa ke Nyɔsoa ɔ̀ kɔn we̍ nyɔ̍ we̍ gbǎ-a kli̍hgbɛ̍ sɔ-aɛ.

⁴ Ɔ̍ gbǎ àɔ̀ we̍ dě à tìh jě-ɛ kli̍hgbɛ̍ di̍i̍, wɛ̀ ɛ̍ iě ɛ̍ nu̍ à iě nyɔ̍ ùh-a jě-a tìh kaɛn kaɛn-ɛ we̍ gbǎ-a bɛ̌ɛ dǒ ka ɔ̍ nu̍-a à we̍ gbǎ-aɛ we̍.

⁵ Klai sàɛ̀ jua̍i̍ dɛ̍blɔ dɛ̍, wɛ̀ à sàɛ̀ jua̍i̍ ke ka ɔ̍ nu̍-a jua̍i̍ sàɛ̀-ɛ. Kǎ ɛ̍ nɛ ke, dě Klai ja̍a̍ bo Nyɔsoa jii iě ɔ̍ gbǎ àɔ̀ we̍ kaa̍ ke.

⁶ Pò à jě tìh-ɛ, nɛ̀ mɔ̀-a we̍ gbǎ-a ke mɔ̀-a pǔh-u tìh bo. Pò à gbǎ-ɛ we̍-ɛ, nɛ̀ mɔ̀ gbǎ-ɛ we̍ ke, iě mɔ̀ nyǐ-ɛ gbǐh mɔ̀ iě-e klì i̍ ku̍ mɔ̀ iě wlùh i̍ gbɛ̍n dě mɔ̀-a jua̍i̍ sàɛ̀ di̍i̍ ka à nu̍-a jua̍i̍ sàɛ̀-ɛ ke-ɛ.

⁷ À ku̍-e klì i̍ dǒ mɔ̀ wlì tè-ɛ we̍. Dɛ̍nu̍ɛ, ka à nu̍-a we̍ gbǎ-ɛɛ, kǎ mɔ̀-a nu̍ we̍ gbǎ-ɛ ke. À juo ɛ̍ ka à nu̍-a jua̍i̍ sàɛ̀-ɛ kǎ mɔ̀-a nu̍ jua̍i̍ sàɛ̀ ke.

⁸ À de̍di̍i̍ᵻ, à pɔ̀n mɔ̀ iě i̍h juo ka à nu̍-a tìh jě-ɛ dě Esea bloa̍ kɛ̍n-ɛ. À jě tìh dɛ̍blɔ, ɛ̍ nu̍ ɛ̍ à se̍ i̍h juo ka à mu̍-a kmɔ̌ nɛ ke̍ de-ɛ.

⁹ À jajeɛ̍ à mu̍ mɛ̌ de. Jɛ ɛ̍ nɛ-ɛ wɛ̀ à-a je̍e à chɛ̀ wlì tè, jɛ Nyɔsoa ɔ̀ sà-ae mɛ̌-nyɔ̍-ɛ, ɔ̍-ɔ bo à iě wlì tè.

¹⁰ Ɔ̍ sà à kanɛa dɛ̍ klaa wɔ̍i̍n, wɛ̀ ɔ̍ iě à pǔh-i. Ɔ̍-ɔ bo à tè wlì wɛ̀, ɔ̍ mu̍ àɔ̀ pǔh-i dɛ

¹¹ ka mɔ̀-a gbǎ-a àɔ̀ we̍ dǒ à tàà ba̍le-ɛ we̍-ɛ. Nɛ̀ɛ̍, ba̍le wlu̍ dɔu la dǒ à we̍-ɛ, i̍h-a gba̍-a mu̍ sà-ɛ. Nɛ̀ Nyɔsoa-a mu̍ àɔ̀ pɔ̀ìě nyǐ iě nyɔ̍ dɔu iě ɔ̍ tlɔ̌ po̍ dǒ à tàà.

Pɔɔ flɔn-ɛ ɔ̍ wlùh i̍ bǐi dɛ we̍i̍

¹² À wlùh se̍ kǎ dǒ dɛ̍ᵻ kli̍hgbɛ̍ à nu̍-a nɔ̌ kmɔ̌ la we̍-ɛ. À nu̍ i̍h dǒ wlùh wlǎ ke wlùh-a kɛ̍n i̍ flɔn-ɛ ɛ̀ sɔ-a dě Nyɔsoa we̍-ɛ we̍. Ìh à nu̍-a mɔ̀ pùn-ɛ bo ǎn dǎ chɛ̀ɛ̌chɛ̀. Ɛ̍ kɔn à po̍ bu̍hᵻ wlù i̍. Ɛ̍ se̍ nyɔ̍-a flɔ̍nwlùh à se̍ ɛ̍ nui, jɛ dǒ Nyɔsoa-a blɛ we̍ bo.

¹³ À chlǐh la̍ mɔ̀ dɛ̍ ɛ̀ mɔ̀ bɛ̌ɛ-a mɔ̀ iě-a slè wɛ̀ mɔ̀ iě-a i̍ wɔ̌n-ɛ nɛ due we̍. Ǐn tè ɛ̍ wlì, mɔ̀-a mu̍ ɛ̍ i̍ wɔ̌n chɛ̀ɛ̌chɛ̀

¹⁴ ka mɔ̀-a tè-a la̍ à we̍ i̍ ju̍o̍e-ɛ gbɔ̀-ɛ. Weɛ̍ Joi Jusu-a mu̍-a ja-ɛ, mɔ̀ iě à bu̍hᵻ wlù i̍ po̍-ɛ bɛ̌ɛ ka à mu̍-a mɔ̀-a bu̍hᵻ wlù i̍ po̍-ɛ nu̍-ɛ.

¹⁵ Ǐn juo ka mɔ̀-a po̍-a à bu̍hᵻ wlù i̍-ɛ, ɛ̍ kɔn ǎn pɔ̀n iě dě mɔ̀ we̍ ji̍ sàǐtòò wɛ̀ ɛ̍ iě ɛ̍ nu̍ mɔ̀ iě mɔna̍-a gbǎ-a gbɔ̍ᵻ sɔɔ̌n nu̍ de.

¹⁶ Ǎn pɔ̀n iě dě mɔ̀ we̍ i̍ nala ji̍ de ti̍ ǎn mu̍-a Mɛsedonia bloa̍ kɛ̍n-ɛ, wɛ̀ iě-e mɔ̀ we̍ jii dode̍ pò ǐn ja Mɛsedonia sɔ-ɛ, wɛ̀ mɔ̀ iě ǐn we̍ gbǎ dǒ ǎn dě Judia bloa̍ kɛ̍n mu̍-ɛ we̍.

¹⁷ Ti̍ ǎn pɔ̀n-a iě-a ɛ̀ la nu̍-ɛ, nɛ̀ ɛ̍ se̍ jlii̍h ǐn se̍ nu̍. Nɛ̌ nu̍ dɛ̍ᵻ ka kmɔ̌ we̍ nyɔ̍ ùh-a wɔ̌n-ɛa “I̍i̍n” ke “Iěe” tàdùè-ɛ.

¹⁸ Nyɔsoa nu̍ tìh-a taǐn nyɔ̍ ti̍ kli̍hgbɛ̍ we̍. Kǎ à nɛ ke, à tu̍owli à po̍-a dě mɔ̀ we̍-ɛ, à se̍ “I̍i̍n” ke “Iěe” tàdùè bla̍-ɛ.

¹⁹ Dɛ̍nu̍ɛ, Nyɔsoa-a Jǔ Jusu Klai ɔ̀ kɔn tìh mɔ̍ ke, Sale ke, Timote ke à bla̍-a dě mɔ̀ we̍-ɛ, ɔ̍-ɔ wɔ̌n-ɛ “I̍i̍n” ke “Iěe” tàdùè. Jɛ “I̍i̍n” bo ɛ̀ sɔ dě ɔ̍ we̍ ti̍ kli̍hgbɛ̍ we̍.

²⁰ Dɛ̍nu̍ɛ, ɔ̍-ɔ bo ɔ̀ nu̍ “I̍i̍n” dǒ Nyɔsoa-a wlu̍ kli̍hgbɛ̍ ɔ̍ po̍-a tɔ̀ma̍a̍-ɛ we̍. Ɛ̍ kɔn à wlu “Kǎ ɛ̍-ɛ nɛ” dě Jusu Klai ja̍a̍ dǒ Nyɔsoa-a tìh-a i̍ bɛ̌-ɛ we̍.

²¹ Jɛ Nyɔsoa bo ɔ̀ nu̍ ɛ̍ wɛ̀ mɔ̀ ke à nɛ due dě à ke Jusu Klai-a due nɛ-ɛ di̍i̍ wɛ̀ ɔ̍ tè àɔ̀ pɔ̌ dǒ ɔ̍ dbo̍ we̍.

²² Ɔ̍ tù ɔ̍ juola dǒ à pùn wɛ̀, iě ɔ̍ po̍ ɔ̍ Sùù dě à wlùh di̍i̍, ɛ̍ iě ɛ̍ to dǒ dɛ̍ᵻ ɔ̍ mu̍-a à nyǐ-ɛ we̍.

²³ Ǎn dǎ Nyɔsoa ɔ̍ iě ǎn sàànsi̍i̍h nu̍. Ɔ̍ juo dɛ̍ nɛ-a dě ǐn wlùh we̍-ɛ. Nɛ̌ je̍e mɔ̀-a wlùh dě de̍ i̍ po̍ tìh bo ǐn se̍ dě Kɔwlɛn mu̍.

²⁴ À se̍ dɛ̍ we̍ fɔ̀n à iě mɔ̀ wlu̍ i̍ kɔn dǒ dɛ̍ mɔ̀-a mu̍-a wlùh gbaɛ-ɛ we̍. À juo ɛ̍ ka mɔ̀ ku̍-ae klì i̍ dě mɔ̀-a wlùh gbaɛ di̍i̍-ɛ. Jɛ mɔ̀ ke à nu̍ dbo̍ dǒ mɔ̀-a chɛ̀-a mɔna̍ dɛ̍-a sǔh we̍.