Romu 1 - FỊAFỊA BAỊBỤLỤ

¹ Pọlụ, Kịrayịsị Jizọsị fịrịmẹnjịḅọ ḅe, anie Tamụnọ sẹlẹ-ọkịm mịnẹ ori Iḅi-Oku mẹ ḍuko wasama ḅẹ ḅọ ḅe, mie mị ḍiri mẹ kẹẹ tẹ kẹ ọ́ fịrịma ye.

² Iḅere-iḅerea kụra-ḅio mie Tamụnọ, ịkịankoroapụ ma, ḅụụ ḅọrọ tẹ mị Iḅi-Oku mẹ minini tomi pịrị tẹ ini anị kẹ fịafịa ḍiri mẹ ḅio kẹẹ koroma ye.

³ Mị Iḅi-Oku mẹ, Wanyanaḅọ Jizọsị Kịrayịsị ọ̀ Tụḅọ ḅe gbolomayee, anie tomḅọ ḅara ḅụ Devidi furo paka-ḅo ḅọ ḅe;

⁴ kụma Tamụnọ kịka fịafịa sime-ḅara ḅụ, Tamụnọ fịị ḅụ ọ̀ saakịma tẹ opu kụrọ ḅụ ḍie-pakama tẹ mịnẹ ori Tamụnọ Tụḅọọ.

⁵ Ori ḅe ḅụ anie, anị Tamụnọ ḅụụ-ḅẹlẹ ḅara ḅụ, à Kịrayịsị fịrịmẹnjịḅọ sọ ye, tẹ mu ama sịẹ, sịẹ ḅụ simearị atomi mamgba mịẹtẹ ịn Kịrayịsị minini tẹ pịkị ọ̀ ḅịḅị poki ḅẹ ḅara.

⁶ Ọmịnị Romu ḅụ simearị tẹ Tamụnọ sịn tẹ mịnẹ ó ḅo sime Jizọsị Kịrayịsị pịrị ḅẹ apụ ma sọ anị ḅụ emi.

⁷ Ọkọẹrẹsị à mị ḍiri mẹ kẹẹ tẹ kẹ ọmịnị Romu ḅụ, Tamụnọ ḅẹlẹmarị tẹ, sịn tẹ mịnẹ ó ḅo ori atomi sọ ḅẹ apụ mamgba fịrịmarị. Yee Tamụnọ, wamịna Ḍaḅọ ḅe na Wanyanaḅọ Jizọsị Kịrayịsị na ḍiki-ḅụụjịrị na dein na sime ọ́ pịrị.

Ịmịẹtẹ Ḅẹ Tẹkẹ

⁸ Tarị ye, à Jizọsị Kịrayịsị ẹrẹ ḅụ ọmịnị-mgba gotẹ ịmịẹtẹ kẹ ị̀ Tamụnọ ḅẹẹm, bebe tomikiri mẹ ọmịna minini mẹ gbolomaye naa tẹ mẹ ẹrẹsị.

⁹ Àrị ì ḅioḅẹngbọ mẹmgba kẹ fịrịmẹnjị pịrịarị Tamụnọ ḅe, ọ̀ Tụḅọ ḅe Iḅi Oku mẹ ḍuko wasama ḅụ, nimi wararị tẹ ḍuko ḅa mịnẹ à karakara ye ḍukoarị. Tamụnọ nimi wararị mịnẹ

¹⁰ à tẹkẹ sakị, tẹkẹ sakị àrị ọ́ kẹ ḅiokoromarị. À Tamụnọ tẹkẹarị mịnẹ ọ̀ ḅụụ-ḅẹlẹ ḅara ḅụ ọ̀ paa mịẹtẹ ala-a sakị ḅụ à ḅo ọmịnị na ẹrịya.

¹¹ À kpọma ḅii lamarị mịnẹ à ḅo tẹ ọmịnị na tẹmẹ boma ḍiema tẹ ọ́ mịẹ kụrọma.

¹² À fiearị ye anie, wa ḅarasụa tẹ jụmọ-jụmọ minini mịẹ kụrọma ḅẹ ḅara, ì nye ọmịna nye mịẹ kụrọma, ọmịna nye pịkị ì nye mịẹ kụrọma.

¹³ Ị̀ amịnapụ, ọ́ kẹ ḅiokoroma ḅa mịnẹ tọnwa asakị à ḅo ọmịnị ẹrị mẹ tọn fama kụma gberie ḅo ị̀ dasịẹma tẹ. À ḅiim arị ọmịna ḅụụ sọ kịnị pịkị Tamụnọ pịrị, Ja asịẹ ogboku à mịẹtẹ ḅara.

¹⁴ Anị sime-ḅara, à kọrị kịnị mamgba pịrị ḅẹ ye emi, tọrụ finjitẹ apụ-o, tọrụ finji-a apụ-o; ḍiri ẹrị apụ-o, ḍiri ẹrị-a apụ-o.

¹⁵ Anie mie Iḅi Oku mẹ ḍuko ọmịnị Romu ḅụ sime apụ sọ pịrị mẹ gotẹ ì ḅio-sẹsẹmarị ye.

Iḅi Oku Mẹ Nyana Kụrọ

¹⁶ À kpọma iḅi-oku mẹ ḅụ ḅiokpọ nyana lama wararị; anị anie Tamụnọ kẹ minini nyana apụ mamgba ḅọrọmarị kụrọ mẹ, tarị apụ, Juu-ḅẹ-apụ, na pịkị Ja asịẹ ḅẹ apụ sọ.

¹⁷ Kẹ gotẹ ọkọ ḍukoarị, iḅi-oku mẹ anie ḍie-pakamarị Tamụnọ mịẹtẹ tomi ori na ḅẹrẹ famarị ḅara; minini nyana ḅụ mie anị saakịarị ye, pịkị mu kunomarị ye. Anie pịkị fịafịa ḍiri mẹ ḅẹẹ ḅara, “Minini ḅụ ḅọrọ tẹ Tamụnọ na ḅẹrẹ-fama tẹ ḅọ mẹ anie ḍumo ḅarị ḅọ.”

Tomḅọ Ḅẹrẹ-ḅarasii

¹⁸ Tamụnọ owi ịganị So-ḅio koro ḅo tomi ma si sime-ḅara na, mbasị na, tẹ mịẹtẹ kịnị Tamụnọ karakara mẹ nimi-a aị ma ọgọnọ gbana tẹ anị ḍie-paka tẹ.

¹⁹ Tamụnọ gotẹ fomu-ḅara kẹ ịn pịrịarị ye anie, tomi ọ̀ ḅụụ nimi na-iḅi ye goyegoye giregire ịn pịrị wararị; Tamụnọ ḅarana anị mịẹ giregirema ịn pịrịm.

²⁰ Tamụnọ bịan tomikiri mẹ tẹmẹ kụra-ḅio, kịnị tọrụngbọ kẹ ẹrị-a tẹ ọ̀ ḅụ simearị iḅi aị ma na, ò sime gbamaso kụrọ mẹ na ọ̀ Tamụnọ-sime-ḅara mẹ na, tomi nwẹn ẹrị giregiremarị. Tamụnọ tẹmẹ-aị ma ḅụ anie tomi ḅọrọ tẹ arị lekiriarị ye. Mie ḅụ arị atomi ma ịn ḅarị gotẹ so ye nyana-a gbala-gbala!

²¹ Ịn Tamụnọ nimi wararị kụma sime ọ̀ pịrị kụn mẹ ịn kẹ ọ̀ pịrị-a, ịn pịkị ịmịẹtẹ kẹ ọ̀ ḅẹẹ-a. Anie nakara ịna akuroma papaa ye sọ fama tẹ, kanakana pịkị ịna oḅori aḅioḅẹngbọ ma sọ ḅin tẹ.

²² Ini mẹẹ in ye nimim, kụma ini oḅori atomii;

²³ in ḍumo gbamaso Tamụnọ ḅe tẹkẹ ḅẹ nakara, ini ịn kẹ fị-fị atomi na, feni na, nama na, ikiriarị aị na kịkama kịra aị rẹ anie ịn tẹkẹarị.

²⁴ Mie ḅụ Tamụnọ arị atomi ma ḍiki-tọrụsin sịḅị-ngụngụnma aị pịrị tẹ ini ịna aḅioḅẹngbọ sọlịma aị, sọlịma aị mịẹarị, tẹ ḅụụ-jịrịma amịẹaị anie ịn kẹ jụmọ-jụmọ na mịẹarị.

²⁵ Iruo aị anie ịn kẹ Tamụnọ gboloma karakara mẹ ḍima tẹ ye; Tamụnọ tẹmẹ-aị anie ịn tẹkẹ tẹ pịkị fịrịmẹnjị pịrịarị, tẹ nwẹnị ori mịna aị ma tẹmẹḅọ ḅe rẹ tẹkẹ-a anie ịn tokini gbamaso ḅẹ ḅọ ḅee! Amẹnị.

²⁶ In miemẹ mịẹarị ẹrẹsị Tamụnọ ịn wẹrịso tẹ kẹ ḅụụ-jịrịma amịẹaị sọlịma pịrị tẹ. Ereme sọ mịẹ mịẹ-a ḅara kẹ ịna pembema ereme na gbolomarị.

²⁷ Anị gbọrụ ḅara ḅụ owiapụ so ereme na mịẹ-mịẹ ḅara kẹ jụmọ-jụmọ na mịẹ ḅẹ tẹ ḅalaḅalarị. Owiapụ ịna pembema owiapụ na ḅụụ-jịrịma aị mịẹarị, tẹ mịẹ na-iḅi-a tẹ ịn mịẹarị aị ma nwẹnị ịn da na-iḅi fomu-ḅara dogi-ḅo ịn pịrịarị.

²⁸ Ọkọ sime atomi ma karakara ḅara kẹ Tamụnọ ḅe nimi ḅẹ ḅii-a ẹrẹsị ori ịn wẹrịso ịna ḅụrụtẹ aḅioḅẹngbọ ma pịrị tẹ, ịn ḅarị kuraye nimi tẹ mịẹ-a.

²⁹ Si-sịḅịḅio-sụa ḅara na, si-amịẹaị na, opu-pọkọḅẹngbọ na, ngoro-ngoro-amịẹaị na, ịna ḅụụ ḅin wararị; afana na, kịnị-ḅa na, owu kẹ kịnị paka na, oḅori-kẹ-kịnịsịn na, ḍiki-ḅioḅu na sọ ịna ḅụụ sọ ḅin wararị. Ịn kịnị kẹ ọḅụ mẹnjị

³⁰ tẹ jụmọ-jụmọ ḅụụ siye ḍukoarị, ịn Tamụnọ ḅẹlẹma-a, ịn kịnị mịẹ simearị, ini opu amịẹaị mịẹarị, ḅụụ-bomarị; siye mịẹ ḅẹ aḅọkọ ḅọkọ kuroma ḅo ịna ḅụụ kụrọ tẹịnm; ḍapụ-na-iyingiapụ-na ḅịḅị poki poki-a apụ,

³¹ ịna tẹmẹ ḅioḅẹngbọ pụụn tẹ; in minini kịnị pịrị aị sọ ịn mịẹ mịẹ-a, tẹ ịn pịkị iḅi-yemịẹ-ḅara, anịanịa ọkụrụkụrụ nyana ja atomi pịrị pịrị-a.

³² In nimi wararị mịnẹ Tamụnọ Oloko mẹ ḅẹẹm mị ḍumo ḅara mẹ kọn apụ, kọn apụ fịị na-iḅim. Anịsọ ịn paa ma amịẹaị ma mịẹ ma-muarị, tẹ pịkị ọkọ mịẹarị jen-apụ mịẹ kụrọmarị.