Luku 1 - FỊAFỊA BAỊBỤLỤ

¹ Tiyofịlọsị, ì iḅi ḅọ: Tọnwa-apụ ini inetẹ ḅara, inetẹ ḅara kẹ wamịna ogboku paka aị ma kẹ ḍiri kẹẹ tẹ.

² Ịn kẹẹ aị anie, mịna aị ma tarị saakị ḅụ, ẹrị tẹ pịkị oku mẹ kẹ ḅo apụ ma ḍuko wa pịrị aị ma.

³ Ọkọẹrẹsị, ị́ kụn ḅụ, à kpọma mịna aị ma tarị saakị ḅụ arị sọkịrị ḍiki tẹ ḍawọ tẹ ḅara, à kuromam, anị iḅi ḅa yẹrị sọ arị kẹ ọrụtọn tẹ kẹ ḍiri kẹẹ ị́ pịrị,

⁴ à mie mịẹarị mịẹtẹ í ḅintẹ ḅara kẹ ịn kẹ í toluma aị ma ḅẹ karakara nwẹn nimi.

Gebịrẹlị Minji-sara Jọnị Iyi Mẹ Ḍuko-pakamam

⁵ Ẹrọdị Judiya ḅụ ama-daarị sakị, Abija agbamịẹ ọrụ mẹ ḅụ Zẹkaraya nwẹn-sịn agbamịẹḅọ simem. Ọ̀ ta ẹrẹ Elizabẹfụ, árị ma sọ Erọnị furo-ḅẹ-ḅọọ.

⁶ Ini maa apụ mamgba Tamụnọ tọrọkọ iḅi ḍumo kọnm, anie ịn pịkị KỊNỊNYANAḄỌ ḅe oloko mamgba koko kpaịnma ḅara.

⁷ Ini awọ nyana-a, Elizabẹfụ amụ tụḅọ iyi-a ẹrẹsị, anịsakị árị na Zẹkaraya na pịkị kpọma omongi tẹ.

⁸ Gbọrụ ene Tamụnọ-warị mẹ ḅio agbamịẹ kọrịnama kọrị nwẹnị ḅo Zẹkaraya la, anie ene-ḅaaene-ḅaaene ọ̀ kọrị-kọrị ye mẹ.

⁹ Agbamịẹapụ ma wẹrịtẹ mịẹ-mịẹ ḅara ḅụ, ịn sụa apịan ori ọlọm, mịnẹ ori kụnụaị dọkịmaa, agbamịẹ-anga mẹ ọgọnọ. Anie ḅụ ọ̀ nwẹnị KỊNỊNYANAḄỌ ḅe Warị mẹ ḅio sọ-mu,

¹⁰ tẹ ọ̀ kụnụaị mẹ dọkịmarị sakị tomina-ogbo mẹ etela-ogbo tẹkẹarị.

¹¹ KỊNỊNYANAḄỌ ḅe enjẹlị agbamịẹ-anga mẹ ḅẹ ama-ḅara anga, ịn kụnụaị mẹ dọkịma anga mẹ ḅụ, sịẹ tẹ ḅụụ pakama ò ḍiem.

¹² Zẹkaraya enjẹlị ḅe ẹrị sakị, ọ̀ ḅụụ-gbiripu tẹ ḅalafaam.

¹³ Kụma enjẹlị ḅe nwẹnị ọ̀ ḅẹẹ, “Zẹkaraya, ḅalafa ma, Tamụnọ ị́ tẹkẹ naa tẹ, ị́ ta Elizabẹfụ owiḅọtụḅọ iyi ḅa. Ị́ kẹ ọ̀ sịn ḅarịye Jọnị.

¹⁴ Ori ḅe iyi mẹ kpọma í ḅioḅẹlẹma ḅa, anie anị pịkị kẹ ja apụ sọ ḅioḅẹlẹma ḅarị ḅara.

¹⁵ KỊNỊNYANAḄỌ ḅe tọrọkọ ori opu tomḅọ sọ ḅa. Ori iru ḅuu ḅịa, jen-a jen-a kụrọ iru. Ini ori iyi koroma gbọrụ sakị Fịafịa Tẹmẹ ḅe ọ̀ ḅụụ sọ ḅin ḅa,

¹⁶ tẹ ori Izirẹlị ḅẹ tọnwa-apụ pịkịma ḅo ịn Nyana Tamụnọ ḅe pịrị ḅa.

¹⁷ Tẹrẹmẹ KỊNỊNYANAḄỌ ḅe ḅo, ori tarị ḅo ḅa, opu na kụrọ na ḅụ, ịkịankoro Ịlayịja nyana kụrọ pembe ḅara. Ọ̀ ḍapụ na ịna awọmẹ na ọkị-ḅo siin gboloma ḅa; ọ̀ mịẹtẹ ḅịḅị poki-a atomi ma pịkị ḅo karakaraye-mịẹapụ sọ ḅa. Ọ̀ pịkị KỊNỊNYANAḄỌ ḅe atomi ma tẹlẹma ọ̀ wẹrịma ḅa.”

¹⁸ Zẹkaraya nwẹnị enjẹlị ḅe ḅẹẹ, “Ndẹẹ à kẹ í ḍukoarị ye mẹ ḅẹ karakara nimi ḅarị ḅara? Àrị omongi tẹ, ị̀ ta sọ omongi tẹ.”

¹⁹ Enjẹlị ḅe nwẹnị pakịrị, “Yẹrị enjẹlị Gebịrẹlị, tẹ sakị mamgba Tamụnọ tọrọkọ sịẹarị ḅọ ḅe, ori anie ị̀ fịrịma ye mịnẹ à ḅo mị iḅi oku mẹ ḍuko ị́ pịrị.

²⁰ Kụma í ị̀ oku mẹ minini-a, anie anị ḅẹ sakị la sakị paka ḅarịye mẹ. Í minini-a mẹ gotẹ ị́ ḅịḅị ikpopu ḅa, í inetẹ ẹkwẹn ḅịa nwenii à minini ị́ pịrị ye mẹ mịẹ ḅa.”

²¹ Miemẹ mịẹarị sakị tomi ma Zẹkaraya koru, tẹ ḅụụ-ḅalaḅalarị, ò gotẹ Tamụnọ-warị mẹ ḅio ala sime ye mẹ.

²² Ọ̀ paka-ḅo sakị, ọ̀ ḅarị inetẹ ẹkwẹn ịn pịrị-a, anie ḅụ ịn nwẹnị nimi mịnẹ ori ịkịan ẹrị tẹ Tamụnọ-warị mẹ ḅio. Ine ẹkwẹn-a ḅụ ọ̀ nwẹnị ḅara, ḅara kẹ tọnma ịn pịrị.

²³ Tamụnọ-warị mẹ ḅio ọ̀ kọrịnama fa tẹso, Zẹkaraya nwẹnị pịkịma so warị mu.

²⁴ Anịtẹso ala-a kụma ọ̀ ta Elizabẹfụ fura tẹ, tẹ à nwẹnị sọnọ akalụ kẹ warị ḅio á ḅụụ ḅọị.

²⁵ Á nwẹnị ḅẹẹ, “Mịọkụ kunoma ḅụ KỊNỊNYANAḄỌ ḅe mị ḅara kẹ ḅarasụa yẹrị ma sọ pịrị tẹ ị̀ ḅụụ inweni-ogbo ḅẹ ḅụụ-jịrị mẹ kan sin tẹ!”

Gebịrẹlị Jizọsị Iyi Mẹ Ḍuko-pakamam

²⁶ Elizabẹfụ fura mẹ ḅo sonio akalụ la tẹso, Tamụnọ nwẹnị enjẹlị Gebịrẹlị kẹ Galili ḅụ Nazarẹtị nwẹn-sịn ama fịrịma.

²⁷ Ori oku ḍa mu gbọrụ ẹrẹḅọtụḅọ tẹ Josẹfụ nwẹn-sịn owiḅọ sime ḅẹ tẹ ọlọ wararị ḅọ pịrịm. Ori Josẹfụ ḅe Ama-da Devidi furo-ḅẹ-ḅọọ. Ẹrẹḅọtụḅọ ma ẹrẹ Meri.

²⁸ Enjẹlị ḅe nwẹnị ḅo tẹ á ḅẹẹ, “Dein sime ị́ pịrịị! KỊNỊNYANAḄỌ ḅe ị́ na emi, tẹ pịkị í boma lama tẹ!”

²⁹ Enjẹlị ḅe oku mẹ kpọma Meri ḅioḅẹngbọ pikirima lamam, tẹ á nwẹnị ḅụụ-bua, ọ̀ kọn ẹkwẹn mẹ ḅọrọ tiye fiearị ḅoto.

³⁰ Enjẹlị ḅe nwẹnị á ḅẹẹ, “Meri, ḅalafa ma, Tamụnọ kẹ ị́ ḅẹlẹma ye ḅakam.

³¹ Í fura tẹ owiḅọtụḅọ iyi ḅa, tẹ ị́ kẹ ọ̀ sịn ḅarịye Jizọsị.

³² Ori opu sọ ḅa, tẹ Geletẹịn Tamụnọ ḅe Tụḅọ anie tomi kẹ ọ̀ sịn ḅarịye. Ori atẹngịḅọ Devidi ama-da ḅara anie KỊNỊNYANA-TAMỤNỌ ḅe ọ̀ kẹ ama-dama ḅarị ḅara.

³³ Tẹ Ori anie Jekọbụ awọmẹ ma amadaḅọ sọ gbamaso ḅarị ḅọ; ori ama-da mẹ kunoma nyana ḅịa.”

³⁴ Meri nwẹnị enjẹlị ḅe ḅẹẹ, “Amụ àrị owiḅọ nimi-a sakị, ndẹẹ ọkọ sime ye inetẹ mịẹ ḅẹ ḅara?”

³⁵ Enjẹlị ḅe nwẹnị pakịrị, “Fịafịa Tẹmẹ ḅe ị́ ḍọkụma-ḅo ḅa, tẹ Tamụnọ kụrọ mẹ ị́ ọgọnọ gbana ḅa. Ọkọẹrẹsị í iyi ḅarị fịafịa tụḅọ ḅe ini ọ̀ sịn ḅa Tamụnọ Tụḅọ.

³⁶ Kẹ ḅio kuroma, ị́ ịyịmbara Elizabẹfụ ma tẹ tomi ḅarị iyi ḅịa tọrụ kẹ ḍiki tẹ ḅọ ma fura tẹ, mie á ḅụụ sonio akalụ, karakara ye árị omongi lama tẹ sọ.

³⁷ Kẹ gotẹ ọkọ ḅẹẹarị Tamụnọ inetẹ mịẹ ḅịa ye ofori.”

³⁸ Meri nwẹnị ḅẹẹ, “Yẹrị KỊNỊNYANAḄỌ ḅe fịrịmẹnjịḅọọ, í ḍuko ḅara anị ọkọ paka ị̀ pịrịị.” Tẹ enjẹlị ḅe nwẹnị á koroma so.

Meri Mu Elizabẹfụ Ẹrịm

³⁹ Anịtẹso ala-a Meri nwẹnị ḅụ tẹlẹma tẹ fọnya-fọnya mu Judiya ḅẹ tụndụ mẹ iwo mu gbọrụ ama la.

⁴⁰ Á nwẹnị Zẹkaraya warị sọ-mu tẹ sịn-ḅịḅị kẹ Elizabẹfụ pịrị.

⁴¹ Elizabẹfụ Meri sịn-ḅịḅị mẹ naa gbọrụ sakị á furo ḅio ḅẹ tụḅọ mẹ nwẹnị tii, tẹ Fịafịa Tẹmẹ ḅe nwẹnị Elizabẹfụ ḅụụ sọ ḅin,

⁴² tẹ á nwẹnị gele pọkọ kẹ ḅẹẹ, “Eremịna ogbo ḅụ anie boma tẹịn tẹ ḅọ, tẹ í iyi ḅarị tụḅọ mẹ sọ boma tẹ!

⁴³ Ndẹẹ mị opu mẹ ḅo ị̀ la ḅara, mịnẹ ị̀ Nyanaḅọ ḅe iyingi ma rẹ ḅo toluma ì ḍiki ḅẹ ḅo?

⁴⁴ À paa ị́ sịn-ḅịḅị naa gbọrụ sakị mie ì furo ḅio ḅẹ tụḅọ mẹ saakị ḅioḅẹlẹ tẹ tii ye.

⁴⁵ KỊNỊNYANAḄỌ ḅe kẹ ị́ fịrịma oku mẹ karakaraye sọ ḅẹ tẹ ị́ nwẹn minini ye mẹ kpọma ḅioḅẹlẹma ye sọ ị̀ pịrị tẹ.”

Meri Nume-su Tamụnọ Tokinim

⁴⁶ Meri nwẹnị ḅẹẹ, “Ì ḅioḅẹngbọ KỊNỊNYANAḄỌ ḅe bomarị,

⁴⁷ ì tẹmẹ ḅioḅẹlẹarị Tamụnọ ị̀ Ḅọrọmaḅọ ḅe gotẹ,

⁴⁸ ori yẹrị iderima fịrịmẹnjịḅọ ma kẹ ḅiokoroma tẹ ẹrẹsị. Mịọkụ saakị mu, tomi mamgba boma tẹ ḅọ kẹ ị̀ sịn ḅa,

⁴⁹ opu Tamụnọ ḅe kọrị ị̀ pịrị tẹ opu aị ma gotẹ. Ori ẹrẹ fịafịam;

⁵⁰ ọ́ kẹ ye sịn apụ ma, sakị sakị mamgba ori in ḍiki-tọrụ-kụrụkụrụarị.

⁵¹ Ori ọ̀ kụrọtẹ opu ḅara sụn-pakama tẹ opu amịẹaị atomi ma gala-galama tẹ, ịna ḅiotọn aị ma na ini na.

⁵² Ori opu amadapụ ma siin koroma tẹ ịna emine ma ḅụ, tẹ iderima kiri ḅụ sime apụ ma iwoma tẹ.

⁵³ Ḅuru pọkọ-tarịarị apụ ma ori iḅi aị kẹ ịn pịrị fị furo ḅinma tẹ, ngọ-kọnapụ ma ọ̀ papaa ḅara ḅụ in dee-siin tẹ.

⁵⁴ Ò minini wamịna atẹngịapụ ma pịrị ye ọ̀ mịẹ tẹ; ọ̀ pịkị ḅarasụa ọ̀ fịrịmẹnjịḅọ Izirẹlị pịrị tẹ.

⁵⁵ Ò ḅiokoroma tẹ ḍiki-ḅụụjịrị nyana Ebira-amụ na, pịkị ò furo-ḅẹ-apụ mamgba na pịrị gbamaso tẹ!”

⁵⁶ Meri nwẹnị Elizabẹfụ na tẹra akalụ sime tẹ pịkịma so warị mu.

Elizabẹfụ Minji-Sara Jọnị Iyim

⁵⁷ Elizabẹfụ iyi ḅẹ sakị la tẹso, á nwẹnị owiḅọtụḅọ iyi.

⁵⁸ Árị na kpeki tẹ anga apụ na árị amịnapụ na nwẹnị KỊNỊNYANAḄỌ ḅe kẹ á mịẹ opu ḅụụ-buama iḅi mẹ naa tẹ ḅo árị na sọ tẹ ḍereku.

⁵⁹ Nine aḍin tụḅọ ḅe sịḅị ḅọrọ tẹso, ịn nwẹnị ọ̀ tarị-ḅụụ sin ḅẹ tẹ ḅo, tẹ ọ̀ ḍa ẹrẹ, Zẹkaraya, kẹ ọ̀ sịn ḅẹ tọn.

⁶⁰ Kụma ò iyingi nwẹnị ḅẹẹ, “Ẹn-ẹn! Ori ẹrẹ Jọnị.”

⁶¹ Kụma ini á ḅẹẹm, “Mị ẹrẹ mẹ jen sakị ọmịna furo-ḅẹ-ḅọ amụ fị-a!”

⁶² Anịtẹso ịn nwẹnị ḅara kẹ tọnma tẹ tụḅọ ḅe ẹrẹ kẹ ḍaḅọ gbela.

⁶³ Mie ḅụ Zẹkaraya ḍiri kẹẹ abịlala ḅii tẹ kẹẹm, “Ori ẹrẹ Jọnị!” Inimgba nwẹnị kpọma ḅụụ-bua!

⁶⁴ Anị gbọrụ kiri Zẹkaraya nwẹnị inetẹ sin ẹkwẹn, tẹ saakị Tamụnọ tokini.

⁶⁵ Ḅalafa anịjụ anga apụ mamgba ḅụụ ḅio sọm, tẹ anị gboloma ẹkwẹn bebe Judiya ḅẹ tụndụ mẹ ọgọnọ sime ama mamgba kana korom.

⁶⁶ Anị naa ḅọ naa ḅọ anị kẹ kuroma ḅụ suu tẹ gbelam, “Mịẹ ḅọrọ tọ-ḅara sime ḅẹ tụḅọ?” Tẹ anị inimgba ḅụụ korom mịnẹ KỊNỊNYANAḄỌ ḅe kụrọ ori ọgọnọ gbana tẹ.

Zẹkaraya Ịkịan Korom

⁶⁷ Fịafịa Tẹmẹ ḅe nwẹnị Jọnị ḍa Zẹkaraya ḅụụ sọ, tẹ ọ̀ nwẹnị Tamụnọ oku mẹ ḍuko pakama:

⁶⁸ “Ó yee wa KỊNỊNYANAḄỌ, Izirẹlịapụ tẹkẹarị Tamụnọ ḅe tokini! Ọ̀ ḅarasụa ori atomi pịrị ḅẹ ḅo tẹ, ori ịn ḅọrọma tẹ.

⁶⁹ Ori opu Ḅọrọmaḅọ kẹ wa pịrị tẹ, ọ̀ fịrịmẹnjịḅọ Devidi furo mẹ ḅụ paka-ḅo.

⁷⁰ Ò mininim ọ̀ fịafịa ịkịankoroapụ ma ḅịḅị ḅụ alatẹ sakị,

⁷¹ mịnẹ ọ̀ wamịnị na fịya-a apụ ḅara-ḅio wa ḅọrọma ḅa, pịkị wa ḍiki-ḅioḅu apụ kụrọ ḅụ wa gbaịn ḅa.

⁷² Ọ̀ ḅẹẹm ọ̀ wamịna atẹngịapụ ma ḍiki tọrụ-kụrụkụrụ ḅa, pịkị ori ini na fị fịafịa ọḅọkụ mẹ kẹ ḅiokoroma ḅa.

⁷³ Ọ̀ tẹmẹ-la ḅara kẹ minini wamịna atẹngịḅọ Ebira-amụ pịrịm:

⁷⁴ ọ̀ wamịnị na fịya-a apụ ḅara-ḅio wa pụkọ-pakamaḅo tẹ wa ḅalafa-a ḅara kẹ fịrịmẹnjị ọ̀ pịrị ḅa,

⁷⁵ mịẹtẹ wa fịafịa tẹ Ọ̀ tọrọkọ karakara atomi sọ ḅẹ ḅara, wamịna ḍumo-ene mamgba ḅụ.”

⁷⁶ “Ị́yẹrị, ị̀ tụḅọ, ịn kẹ ị́ sịn ḅarịye Geletẹịn Tamụnọ ḅe ịkịankoroḅọ, ị́ tarị mu tẹ KỊNỊNYANAḄỌ ḅe etela tẹlẹma ọ̀ pịrị ḅa,

⁷⁷ tẹ ḍuko ori atomi pịrị ịn ḅọrọma ḅa ịna asi wẹrịso ịn pịrị ḅụ.

⁷⁸ Wamịna Tamụnọ ḅe ọkụrụkụrụ Nyanaḅọ, pịkị dein ḅọ, ọ̀ mịẹ tẹ ḅọrọma ene ḅaa wa pịrị ḅa,

⁷⁹ tẹ So-ḅio anị sime tẹ ḅịya fị kanakana ḅio angarị apụ mamgba sarama ḅa, tẹ wamịna aḅụọ da dein etela ḅio suu ḅa.”

⁸⁰ Tụḅọ ḅe nwẹnị ḍụḅa paka ḅo, oju ḅụ na tẹmẹ ḅụ na. Ịkpa ḅio anie ori anga nwenii tẹ ọ̀ ḅụụ-pakama Izirẹlị ḍie ene la ye.