Ditẹrọnọmị 1 - FỊAFỊA BAỊBỤLỤ

¹ Mie Mozizi Jodanị mẹ ọgọnọ-jụ ḅụ kọọn Izirẹlị mẹmgba pịrị ẹkwẹn ma, ịkpa mẹ ḅio Sufu na saḅama wararị ele mẹ ḅio, Peranị na Tofeli na Labanị na Hazerọtị na Dizayabu na ogboku ḅụ.

² Siya Tụndụ akaka ḅẹ etela mẹ ḅụ, Orẹbụ ḅụ mẹnjị-ḅo Kadẹsị-Baniya la anie oyi gbọrụ ḍin finji igoni.

³ Kụra amesi karama kụra mẹ ḅẹ oyi gbọrụ akalụ finji karama akalụ mẹ ḅẹ tarị ene ḅụ, Mozizi KỊNỊNYANAḄỌ ḅe wẹrịtẹ tọn ọ̀ pịrị tẹ mịnẹ ọ̀ tọn in pịrị ḅẹ aị mamgba kẹ ẹkwẹn Izirẹlịapụ pịrịm.

⁴ Ò Sihọnị, Amọrayịtị apụ ma amadaḅọ tẹ Ẹsịbọnị ḅụ sime ḅọ ḅe na, Ọgụ, Basani ḅẹ amadaḅọ tẹ Asịtarọtị na, Ẹdẹrẹyi na ḅụ sime ḅọ ḅe na nẹngịma tẹso,

⁵ Jodanị mẹ ọgọnọ-jụ, Mohabụ ḅẹ ama mẹ ḅio Mozizi nwẹnị mị oloko mẹ ḍuko giregirema mẹ ọkị ori ọgọnọ gbana tẹ ḅẹẹm:

⁶ “KỊNỊNYANAḄỌ wamịna Tamụnọ ḅe Orẹbụ ḅụ wa ḅẹẹm, ‘Mị tụndụ mẹ ḅụ ó sime ala tẹ ḅara iḅi tẹẹ!

⁷ Miemẹ ẹrẹsị ọ́ saakịị, tẹ mẹnjị tọrọkọ Amọrayịtị apụ ma tụndụ ọgọnọ ḅẹ opu sịẹ mẹ na anị na kpeki tẹ angarị apụ mamgba na ama ma muu — anie Jodanị tụndụ suku-ḅio na, ḅẹ opu sịẹ mẹ na, lẹgịtẹ-kiri mẹ ḅẹ ama mẹ na, Samụnọtẹ Kiri ḅẹ mẹ na, opu tọrụ mẹ agara mẹ na, Kenanị ḅẹ apụ ma ama mẹ na, Lẹbanọnị na ọkị mu opu tọrụ mẹ jụjụ-ḅio Yuferetisi Tọrụ mẹ la.

⁸ Ḍikii àrị ama mẹ kẹ ọ́ pịrị tẹẹ; ọ́ sọ-muu, tẹ ama mẹ tẹ KỊNỊNYANAḄỌ ḅe ye karị ḅara ḅụ kẹ ọmịna aḍapụ Ebira-amụ na, Ayịzịkị na, Jekọbụ na, ịn ḅọrọtẹ so ọkụma, kẹ ịna aḅụụ ḅụ paka-ḅo apụ ma pịrị nyana ḅẹ ama mẹ ọkị nyanaa.’ ”

Mozizi Ḅẹrẹkọn-apụ Tọnm

⁹ Mozizi nwẹnị pịkị ḅẹẹ, “Wa paa Sayịnayị tụndụ mẹ suku ḅụ simearị sakị àrị ọ́ ḅẹẹm, ‘Yẹrị ngẹrị ḅarị inetẹ ó dogi ḅịa.’ ”

¹⁰ KỊNỊNYANAḄỌ ọmịna Tamụnọ ḅe mịẹtẹ ọ́ kama tẹẹ, anịsakị ḍikii, mịmgba tomi ogbo ḅụ ó So-tọrụ ḅẹ alolia ma ḅin ḅara ḅin tẹẹ kịẹn-ḅịḅị ḅụ.

¹¹ À tẹkẹarị mịnẹ KỊNỊNYANAḄỌ ḅe, ọmịna aḍapụ sịḅị-tuu pịrị Tamụnọ ḅe, ọ́ mịẹ tẹ mịọkụ kịẹn-ḅịḅị ḅụ ó kiri maa ẹndẹ oyia asi finji kẹ kamaa, tẹ ori ó bomaa, ọ̀ wẹrịtẹ ọ́ karịma tẹ ḅara!

¹² Yẹrị ngẹrị tọ-ḅara kẹ inetẹ ọmịna iku na, ọmịna aḅụụ palịma aị na dogi, tẹ ọmịna ịgbanịya ḍuko-ḍuko siin ḅẹ ḅara?

¹³ Ọmịnị ọmịna afuro ma wẹrịtẹ sime-ḅara ḅụ ye-nimi, yefieye naa, tẹ kụn nyanatẹ atomi sẹlẹẹ, anịsakị arị ịn kẹ ọmịna sịḅịdapụ tọn ḅa.

¹⁴ Tẹ ọ́ nwẹnị ị̀ pakịrị: í ḍuko wa mịẹ nwẹn ḅẹẹ ye mẹ anie iḅiye.

¹⁵ Anieḅụ arị ọmịna afuro ḅụ ye-nimi, yefieye naa, tẹ kụn nyanatẹ owiapụ ọkị tẹ kẹ sịḅịdapụ sọma ọ́ pịrịm, ḅẹrẹtọn kịnị maa ẹndẹ oyia asi finji finji na, kịnị sọnọa si sọnọa si na, kịnị amesi oyi finji finji na, oyia apụ oyia apụ na pịrị, pịkị fịrịmẹnjị-opuapụ na sọmam ọmịna afuro ikelema-koro ḅụ.

¹⁶ Àrị ọmịna ḅẹrẹkọn-apụ mịẹ ḅẹ ye ḍuko ịn pịrịm anị sakị mẹ ḅụ, ọmịnị ọmịna amịnapụ ogboku ḅẹ aḅẹrẹ ma naa, tẹ karakara ḅara kẹ gbọrụ tomḅọ na, ori iyimbere na, anịanịa igoniḅọ tẹ ori na simearị ḅọ ogboku ḅẹ ḅẹrẹ kọọn.

¹⁷ Ḅẹrẹkọn ḅụ ọmịnị aḍụa kọn ma; ọ́ gbọrụ ḅara kẹ kala mẹ na, opu mẹ na naa ḅa, ó tomḅọ tọrụkuḅu mẹ ḍiki-ḅalafa ma, kẹ gotẹ ọkọ ḅẹẹarị, ḅẹrẹkọn mẹ sime Tamụnọ pịrịm, anịsakị ọmịna aḅụụ kụrọ ḅaka ḅẹrẹ ọmịnị ọkị-ḅo ị̀ pịrị ḅa, tẹ arị anị naa ḅa.

¹⁸ Anị sakị mẹ ḅụ arị ọ́ mịẹ na-iḅi aị mamgba tọn ọ́ pịrị famam.

In Kadẹsị-Baniya Ḅụ Ama Ẹnyẹ-apụ Ma Fịrịma Pakamam

¹⁹ KỊNỊNYANAḄỌ wamịna Tamụnọ ḅe tọn wa pịrị ḅara ḅụ wa Orẹbụ ḅụ saakị pakam, tẹ mẹnjị anị gburo-gburotẹ tẹmẹ-naịn-naịnma ịkpa mẹ tẹ mẹnjị Amọrayịtị apụ tụndụ ọgọnọ ḅẹ opu sịẹ mẹ muarị etela mẹ ḅụ ọmịnị ẹrị ye mẹ tolum tẹ wa ḅo Kadẹsị-Baniya lam.

²⁰ À nwẹnị ọ́ ḅẹẹ: ó ḅo Amọrayịtị apụ tụndụ ọgọnọ ḅẹ opu sịẹ mẹ tẹ KỊNỊNYANAḄỌ wamịna Tamụnọ ḅe kẹ wa pịrị ye mẹ la tẹẹ.

²¹ Ḍikii, KỊNỊNYANAḄỌ ọmịna Tamụnọ ḅe ama mẹ kẹ ọmịna tọrọkọ koroma tẹẹ; ọmịnị iwo muu, tẹ KỊNỊNYANAḄỌ ọmịna aḍapụ ma Tamụnọ ḅe ḍuko ọ́ pịrị ḅara ḅụ ọkị nyanaa; ọ́ ḅalafa, anịanịa, ḅụụ tukutuku nyana ma.

²² Anịtẹso, ọmịnị-mgba sọma ḅo ì kpekim, tẹ ḅẹẹm, “yee wa kịnị kẹ wamịna tọrọkọ fịrịma, mịẹtẹ ini ama mẹ sime-ḅara ḍọkị nimi wa pịrị tẹ etela mẹ tẹ wa mẹnjị iwo na iḅi etela na, opu ama ma tẹ wa sọ-ḅo ḅẹ opu ama ḅụ, siin ḅịḅị kẹ ḅo wa pịrị ḅẹ ḅara.”

²³ Ye mẹ ị̀ ḅụụ iḅim, tẹ arị ọmịnị aḅụụ oyi maa owiapụ finji ọkịm, gbọrụ furo gbọrụ owiḅọ-owiḅọ.

²⁴ Ịn mẹnjị tụndụ ọgọnọ ḅẹ opu sịẹ mẹ ḅio sọ-mum, tẹ ḅo Ẹsịkọlị ḅẹ Tụndụ ogboku mẹ lam, tẹ anị ẹnyẹm.

²⁵ Ini ịna aḅara ḅio ama mẹ ḅẹ ja asịnmgbọlụ ọkịm, tẹ anị kẹ ideri ḅo wa pịrịm, tẹ ḅịḅị kẹ pịkị-ḅo wa pịrịm, tẹ ḅẹẹm, iḅi ama mie KỊNỊNYANAḄỌ wamịna Tamụnọ ḅe kẹ wa pịrị yee.

²⁶ Anịsọ ọmịnị iwo mu ḍụkụ-a, kụma sịḅịḅio kụrọma KỊNỊNYANAḄỌ ọmịna Tamụnọ ḅe tọn ye mẹ pịrịm,

²⁷ tẹ ọmịna akpụrụ-awarị ḅio mbụrụmbụrụm, tẹ ḅẹẹm: KỊNỊNYANAḄỌ ḅe wa ḍiki-ḅioḅum ẹrẹsị ori Ijiputi ama mẹ ḅio wa pakama-ḅom, wa kẹ Amọrayịtị apụ ma ḅara ḅio su tẹ wa ḅaa ḅẹ ḅara.

²⁸ Wa iwo tọ anga muarị? Wamịna amịnapụ mịẹ tẹ wamịna aḅioḅẹngbọ sanị tẹẹ. Ịn ḅẹẹm, “tomi ma ịn gburo-gburo na, gele na kẹ wa nẹngị wararị, opu ama ma ḍụḅa ḍụḅa wararị, tẹ ini ọmụ-aị kẹ arị mịẹ kụrọma mu so la wararị; anie sikima, wa anịjụ ḅụ nonji-atomi ma owiapụ ma ẹrị tẹẹ.”

²⁹ Anịtẹso, à nwẹnị ọ́ ḅẹẹ: Ọmịnị opu ḅalafa nyana, anịanịa in ḍiki-ḅalafa ma.

³⁰ KỊNỊNYANAḄỌ ọmịna Tamụnọ ḅe tẹ ọmịna tọrọkọ-tarịarị ḅọ ḅe ḅarana owu mẹ sọ ọ́ pịrị ḅa, ọ̀ wẹrịtẹ Ijiputi ḅụ ọmịna atọrụngbọ mịẹ ọ́ pịrị ḅara pembema ḅara,

³¹ na ịkpa mẹ ḅio ọ́ KỊNỊNYANAḄỌ ọmịna Tamụnọ ḅe owiḅọ ori owiḅọtụḅọ dogi ḅara kẹ etela mẹmgba tẹ ọ́ mẹnjị anga ḅụ ó dogi nwenii ó ḅo mịanga la ḅara ẹrị tẹ ḅara.

³² Anịsọ mị ẹkwẹn-ḅịḅị mẹ ḅụ sọ ọ́ KỊNỊNYANAḄỌ ọmịna Tamụnọ ḅe minini-a,

³³ oriḅe tẹ etela mẹ ḅụ ọmịna tọrọkọ mu ọmịna akpụrụ-awarị pike ḅẹ anga ḍọkị ọ́ pịrị tẹ ḍin ḅụ fịnị, anịsakị eneḅaka ḅụ oḅuto kẹ ọ́ ḅọrọ ḅẹ etela kẹ ó ḍie ḅọ ḅe.

KỊNỊNYANAḄỌ fomu-ḅara kẹ Izirẹlị Pịrịm

³⁴ KỊNỊNYANAḄỌ ọmịna ẹkwẹn-aḅịḅị ma naam, tẹ ịganịm, tẹ nwẹnị ye karị:

³⁵ Mị si ḅụọ mẹ ḅụ mịna owiapụ ma ḅụ gbọrụḅọ-sọ iḅi ama mẹ tẹ à kẹ ọmịna aḍapụ pịrị ḅẹ ye karị ama mẹ ẹrị ḅịa,

³⁶ Kẹlẹbụ, Jefune owiḅọtụḅọ ḅe sikima; ori anị ẹrị ḅa, anịsakị ori na, ori awọmẹ na mie arị ọ̀ mẹnjị ḅọrọ ama mẹ pịrị ḅarị yee, gbala ò bebe ḅara kẹ KỊNỊNYANAḄỌ ḅe ḍukamẹnjịm ẹrẹsị.

³⁷ KỊNỊNYANAḄỌ ḅe ọmịna sịḅị gotẹ ịganị yẹrị sọ pịrịm, tẹ ḅẹẹm: Ị́yẹrị sọ anịjụ sọ-mu ḅịa;

³⁸ Jọsụwa, Nọnị owiḅọtụḅọ ḅe tẹ ọmịna tọrọkọ sịẹsime wararị ḅọ ḅe, ori ọ̀ sọ-mu ḅa; mịẹ tẹ ò ḅiokpọ, kẹ gotẹ ọkọ ḅẹẹarị, ori Izirẹlị mịẹ tẹ ini anị nyana ḅa.

³⁹ Anie sikima, ọmịna ḍọkọḍọkọ awọmẹ ma tẹ ọ́ ḅẹẹm ḅo ḅaa pẹị-pẹị aị sọ ḅarị apụ ma na, ọmịna awọmẹ tẹ mịmgba ḅụ iḅi anịanịa, si nwẹn ḅẹẹ sịḅịḅio nyana-a apụ ma na mie anịanga mẹ sọ-mu ḅarị ye, anịsakị ini mie àrị anị kẹ pịrị tẹ anị nyana ḅarị ye.

⁴⁰ Ọmịnị kụma, ọ́ pịkịị, tẹ tọrụ kẹ ịkpa mẹ ḅio Awụ Tọrụ mẹ sime pakịrị da muu.

⁴¹ Anịtẹso ọmịnị ị̀ pakịrịm: Wa KỊNỊNYANAḄỌ ḅe ḅụụ si mịẹ tẹẹ; wa iwo mu tẹ owu mẹ sọ ḅa KỊNỊNYANAḄỌ wamịna Tamụnọ ḅe tọn wa pịrị ḅara ḅụ. Tẹ ọmịna aḅụụ owiḅọ goḅọ-goḅọ ori ọmụgbin aị kẹ ọ̀ ḅụụ tẹlẹmam, tẹ kuromam iwo tụndụ ọgọnọ ḅẹ opu sịẹ mẹ ḅio sọ-mu mẹ sarasara wararị.

⁴² KỊNỊNYANAḄỌ ḅe nwẹnị ị̀ ḅẹẹ: Ịn ḅẹẹ, ọmịnị iwo mu, anịanịa owu sọ ma, kẹ gotẹ ọkọ ḅẹẹarị, arị ọmịna ogbo ḅio mẹ ḅụ ofori; anieofori ọmịnị na fịya-a apụ ma tọrọkọ ó ḅofa ḅịkị.

⁴³ Àrị anị ḅara kẹ ẹkwẹn ọ́ pịrịm, kụma ó poki-a; ọ́ sịḅị-kụrọma KỊNỊNYANAḄỌ ḅe tọn ye mẹ pịrịm, tẹ ọmịna opu amịẹaị ḅụ mẹnjị iwo tụndụ ọgọnọ ḅẹ opu sịẹ mẹ ḅio sọ-mum.

⁴⁴ Anịtẹso Amọrayịtị apụ ma tẹ tụndụ ọgọnọ ḅẹ opu sịẹ mẹ ḅio simearị apụ ma nwẹnị paka-ḅo tẹ akama kịnị ḍuka ḅara kẹ Siya ḅụ ó ḍuka ideri ḅo Oma jụjụ-ḅio lam.

⁴⁵ Ọ́ nwẹnị pịkịma-ḅo tẹ tẹmẹ-la ḅara kẹ owu; kụma KỊNỊNYANAḄỌ ḅe ọmịna pọkọ poki-a, pịkị ḅeri sọ kẹ ọ́ ḅọlọ-a.

⁴⁶ Anieḅụ ọ́ Kadẹsị ḅụ sime wararị tọnwa aḍin ma ọ́ nwẹn simem anịanga ḅụ.