1 Timoti 1 - FỊAFỊA BAỊBỤLỤ

¹ Pọlụ, Kịrayịsị Jizọsị fịrịmẹnjịḅọ ḅe, Tamụnọ wamịna Ḅọrọmaḅọ ḅe na Kịrayịsị Jizọsị wamịna ḅiokpọ ḅe na tọn ḅara ḅụ:

² Mị ḍiri mẹ kẹẹ tẹ kẹ Timoti, mininiye mẹ ḅụ ị̀ karakara tụḅọ ḅe fịrịmarị. Yee Tamụnọ Ḍaḅọ ḅe na Kịrayịsị Jizọsị wa Nyanaḅọ ḅe na, ḍiki-ḅụụjịrị na ọkụrụkụrụ na dein na kẹ ị́ pịrị.

Iruo Tolumaye Kiki Ḅẹ Ḅeri nụnụ Ẹkwẹn Ma

³ À ḅiiarị ị́ Ẹfisọsị ḅụ sime, anie à so Masidoniya muarị saakị à ḍuko kụrọma ị́ pịrị ḅara mẹ. Anịanga ja atomi emi tẹ iruo aị tolumarị, tẹ í in kiki ḅẹ ḅara.

⁴ Ḍuko ịn pịrị tẹ ini in gbaa-gbaa papaa ịlụkụ ma na, ịn kịẹn nangwọma, nangwọma paka afuro ma na ḅụ ḅara-siin, anie ye-nụnụa ngẹrị dogi-ḅoarị aị ma; arị Tamụnọ wẹrịtẹ ye tọn ḅara mẹ ḅẹ fịrịmẹnjị-a, minini ḅụ kịnị nimi, nimi ye mẹ.

⁵ Mị oloko mẹ ḅẹ sịḅị anie anị kịnị ḅụ fịafịa ḅioḅẹngbọ ḅụ paka-ḅo ḅẹlẹma na, ḅẹrẹ-ḅarasii-a tẹmẹ ḅioḅẹngbọ na, aka ofori minini na jike sakị ḅarị ḅara.

⁶ Japụ ọḅụ pịkị ma aị ma gbin tẹ papaa aị nụnụa ḅụ etela-iri fa tẹ.

⁷ In ḅiiarị ịn Tamụnọ oloko mẹ toluma apụ sọ, kụma ịna ẹkwẹn ma na in ḍukoarị aị ma na fiearị aị sọ in nimi-a, tẹ ịn nwẹnị tẹmẹ-la ḅara kẹ ẹkwẹn-arị.

⁸ Wa nimi wararị mịnẹ Oloko mẹ iḅim, tomḅọ anị kẹ ịn gotẹ anị tọn koroma ye mẹ mịẹ kụma.

⁹ Ye sime-ḅara ḅụ, wa kẹ ḅiokoroma mịnẹ ini iḅi-apụ gotẹ oloko sụa-a, kụma oloko kan-arị apụ na, si-aị kẹ mịẹ-mịẹye sọma wararị apụ na, Tamụnọ kẹ ye-sịn-a apụ na, si-mịẹapụ na, pịkị Tamụnọ etela mẹnjị-a, anịanịa tẹmẹ ḅụ ḅẹ aị nimi-a apụ na, ḍapụ anịanịa iyingiapụ ḅaarị apụ na kịnị ḅaa apụ na,

¹⁰ owiapụ na ereme na kura-a ḅara kẹ gboloma ḍumo kọn-arị apụ na owiḅọ na ẹrẹḅọ na mịẹ-mịẹ ye kẹ amịna pembema owiapụ na mịẹarị apụ na, tomḅọ furuarị apụ na iruoarị apụ na, pịkị ḅẹrẹ kọn anga ḅụ, nimi-a ye kẹ nimi ye sọma tẹ ḍukoarị apụ na anịanịa ḅẹẹye-ḅẹẹye tẹ karakara tolumaye na tụḅụrụ wararị ye, mịna aị ma mie in gotẹ oloko sụarị.

¹¹ Anị toluma ye mẹ, tẹ ịn kẹ ị̀ ḅara sụam à ḍuko ḅẹ oku mẹ ḅụ, mie anị simearị, ebube nyana, boma tẹ Tamụnọ ḅe ḅara ḅo Iḅi Oku mẹ.

Pọlụ Ḅe Tamụnọ Ọkụrụkụrụ Gotẹ Ịmịẹtẹ Ḅẹẹarị

¹² Àrị ịmịẹtẹ kẹ Kịrayịsị Jizọsị wa Nyanaḅọ ḅe ḅẹẹm, anie ịnyọ kẹ ị̀ pịrị tẹ à kẹ ị̀ kọrịnama-kọrịarịḅọ ḅe. Àrị ịmịẹtẹ kẹ ọ̀ ḅẹẹm, ori ị̀ kẹ ḅiokoromam mịnẹ àrị ọ̀ fịrị mẹnjị na-iḅim, tẹ ị̀ tọn ye mẹ gotẹ,

¹³ karakaraye, ḅọrọtẹ sakị ḅụ, àrị ọ̀ ḅụụ siye ḍuko, ḅaa-ḅọkọ kẹ ọ̀ ḍọkị, tẹ ọ̀ mịẹ simam ḅẹsọ. Kụma Tamụnọ ì ḍiki sịḅị-kụrụkụrụm, à minini nyana-a tẹ nimi-a ḅụ anị mịẹm ẹrẹsị.

¹⁴ Tẹ wa Nyanaḅọ ḅe nwẹnị, tọn-a ḅara kẹ, ò ḍiki-ḅụụjịrị ọsụma ị̀ ọgọnọ sara, tẹ minini na ḅẹlẹma na kẹ ị̀ pịrị, anie wa Kịrayịsị Jizọsị na gbọrụ ḅụụ emi ye mẹ ḅụ sime wa pịrị aị ma.

¹⁵ Miemẹ karakara ẹkwẹn, tẹ ḅọkọ, ḅọkọ ḅụ ọkị tẹ minini na-iḅi ye, mịnẹ: Kịrayịsị Jizọsị si-mịẹapụ ḅọrọma ḅẹ tẹ tomikiri mẹ ḅom. Yẹrị anie ịna ḅụ si tẹịnḅọ,

¹⁶ kụma Tamụnọ ì ḍiki sịḅị-kụrụkụrụm, mịẹtẹ Kịrayịsị Jizọsị ḅe ọ̀ kẹ ị̀ na mịẹ ḅara ḅụ, ḅin tẹ ye-inema ḍie-pakama tẹ anị, yẹrị si-tẹịn ḅọ ḅara ḅụ, elekima sọ tọrọkọ-jụ ò minini tẹ sime gbamaso ḍumo nyana ḅẹ apụ pịrị ḅẹ ḅara.

¹⁷ Sime gbamaso Amadaḅọ ḅe, fịị fịị-a, tomi pịkị ẹrị-ẹrịa ḅọ ḅe, ngẹrị Tamụnọ ḅe — kụn na ebube na sime ọ̀ pịrị mu ḅẹẹ-sakị ḅẹẹ-sakị la! Amẹnị.

¹⁸ Ị̀ tụḅọ Timoti, à mị oloko mẹ kẹ ị́ ḅara sụarị, anie ịkịankoro ẹkwẹn ma tẹ ḅọrọtẹ sakị ḅụ ḍuko tẹ aị ma na kura wararị ye mẹ, í gboloma ye ḅụ. Arị ẹkwẹn ma ọkị tẹ kẹ owuna-aị sọma ị́ ḅụụ pịrịị, mịẹtẹ ị́ iḅiọkụ owu sọ ḅẹ ḅara,

¹⁹ pịkị í minini mẹ ọlọ-sịẹma, na fịafịa wararị tẹmẹ ḅioḅẹngbọ na. Ja atomi amụ ịna tẹmẹ ḅioḅẹngbọ ḍuko ịn pịrịarị ye poki-a, tẹ ịna minini sima kọsịma tẹ.

²⁰ Ọkọ sime atomi ma ogboku Himẹnọsị na Alẹkịzanịda na sọ emi, anie à fomu-ḅara kẹ pịrị tẹ apụ ma, ịn saakị Ekwesu kụrọ pịrị ḅụ; miemẹ ye kẹ in toluma tẹ ịna Tamụnọ fie-sima mịẹye mẹ ḅụ ịn ḅara sin ḅa.