Apocalipsis 7 - Bëngbe Bëtsa Cabëngaftaca Entsoyebuambna

Chë Bëngbe Bëtsábioye oservénënga chë uabouana castigüents̈ana mochántsatsebacana

¹ Chca tonjanopasá chents̈ana, canta angelënga sënjánanÿe, monjétsatsana chë quem luarents̈a canta opochócayenache; chënga ndoñe quemënjatanleséncia chë canta binÿiënga jtsebínÿnama, ndoñe chaondë́tsebinÿiayama, ni fshantsents̈e, ni mar béjayoca, ni ndocna betiyeshënguiñe.

² Inÿe ángelnaca sënjáninÿe, shinÿe bocana luaroicana enjetsabó, y chë Bëngbe Bëtsá Ainabe sello enjétsiyëboye. Chë ángelna chë inÿe canta angelë́ngbioye, ndë́muanÿengbioye obenana tmojanats̈atá chë fshantsents̈e y mar béjayoca lempe jtsepochócama, chë́ngbioye jabuache tonjánabachembo:

³ “¡Tondaye s̈matjapochóca, ni fshantsoca, ni mar béjayoca, ni betiyeshënguiñe, chë Bëngbe Bëtsabiama oservénëngbioye chë sélloca juentsaca fchayauínÿnanantscuana, ndoñe chamondë́tsapochocama ca!”

⁴ Y sënjanuena buétanga chë sélloca tmojánauinÿnanayama: canÿe patse, canta bnë́tsana y canta uaranga ents̈anga uinÿnanánënga nÿetsca Israeloquents̈a bëts pamíllanguents̈ana.

⁵ Judabe pamillents̈ana, bnë́tsana uta uaranga uinÿnanánënga; Rubenbe pamillents̈ana, bnë́tsana uta uaranga; Gadbe pamillents̈ana, bnë́tsana uta uaranga;

⁶ Aserbe pamillents̈ana, bnë́tsana uta uaranga; Neftalibe pamillents̈ana, bnë́tsana uta uaranga; Manasesbe pamillents̈ana, bnë́tsana uta uaranga;

⁷ Simeonbe pamillents̈ana, bnë́tsana uta uaranga; Levibe pamillents̈ana, bnë́tsana uta uaranga; Isacarbe pamillents̈ana, bnë́tsana uta uaranga;

⁸ Zabulonbe pamillents̈ana, bnë́tsana uta uaranga; Josebe pamillents̈ana, bnë́tsana uta uaranga; y Benjaminbe pamillents̈ana, bnë́tsana uta uaranga ents̈anga.

Chë mallajta ents̈anga uafjantsëjuangá uichë́tjonënga

⁹ Chents̈ana, sënjanrrepará y mallajta ents̈anga sënjánanÿe, ndocná quentaisobenaye jacúntana, nÿetsca mándayënguents̈ana, nÿetsca cachca buiñe bomnënguents̈ana, nÿetsca canÿe ents̈anguents̈ana, y nÿetsca biyana bomnënguents̈ana; chënga monjétsatsana chë uámana puesto chë Oveshatembe natsanents̈e, uafjantsëjuangá uichë́tjonënga y ramëshangá monjétsëtbëna.

¹⁰ Nÿetscanga ts̈a monjétsayebuache: ¡Bënga atsebacayana endobá, Bëngbe Bëtsá, chë uámana puestents̈e entsetbemanábents̈ana, y chë Oveshatémbents̈ana ca!

¹¹ Y nÿetsca angelënga, chë uámana puesto y chë bëtsëjémënga amë́ndayënga y chë canta ainëngbe shë́conana monjétsatsanënga, chë uámana puestents̈a natsanoica tmonjanoshaments̈é, fshantsóntscoñe jotsejbénase, y Bëngbe Bëtsá tmonjanadorá,

¹² mënts̈á jayanëse: ¡Chca chaotsemna! Bëngbe Bëtsábioye nÿets tempo y nÿetsca tescama chamotsadorana y nÿets ainánaca cha chamotsatschuaná. Ents̈anga chamotsinÿanÿná cha puerte bëtsá y uamaná bétsemnama; cha endmëna nÿets osertánana bomná, y nÿets respeto buajoná, y nÿets obenana y añemo bomná. ¡Chca chaotsemna ca! —chënga monjétsichamo.

¹³ Chents̈ana, canÿa chë bëtsëjemënguents̈á tonjanoyebuambá y s̈onjantjá: “¿Ndëmuanÿenga imomna chë uafjantsëjuangá uichë́tjonënga, y ndë́mocana tmojabo ca?”

¹⁴ “Taita, aca chëngbiama cotáts̈ëmbo ca” —ats̈e sënjanjuá. Y cha s̈onjaniyana: “Chënga montsemna chë jabuache ngmenënguents̈ana ts̈abá tmojábocanënga; chë Oveshatema chëngbiama tojóbana y chëngbe bacna soyëngama perdonánënga montsemna; chëngbe uichëtjonëjuangá tmojtsaboshabé y chë Oveshatembe buíñeca tmojtabofjantsé.

¹⁵ Chíyeca chënga chë Bëngbe Bëtsabe uámana puestents̈a natsanoica montsemna, y chábioye nÿets tempo chabe delante mondëservena, y chë uámana puestents̈e entsetbemaná, chë́ngbenache jtsemnëse, chënga echántsanÿena, mo cuafjutsebotscá.

¹⁶ Ya ndoñe más shëntsana, ni uajuendayana quemochátsbomna; shinÿama, ni yapa jënÿama ya ndoñe más quemochátssufrina;

¹⁷ er chë Oveshatema, chë uámana puestents̈a natsana tsëntsaca entsemná, chë́ngbioye mo oveshëngcá echantsabuajë́nÿa, y echanjunatse béjaye vida bomniye yóbocana luaroye, y Bëngbe Bëtsá echanjama ya ndoñe más ngménana chamondë́tsebomnama ca” —cha s̈onjanjuá.