Ruf Tɔnɔ 1 - Wɛ Tɔnɔ

Nawomi de Ruf taane

¹ Faŋa faŋa pa se dedɛɛra nii Isarele tiina bam baŋa ne ye ba ta wo tiŋi pɛ to, mo kana déem tu ba teo kom. Nɔɔno wodwoŋi déem maa wora, o na nwoŋi Judah teo kodwoŋi, ko yere mo Bɛtelehem. Nɔɔno wom de o kaane de o bakeiri selei ma zaŋe ba vo Moaba teo se ba taa zoore da maŋa fenfee wone.

² Nɔɔno wom yere mo Elimeleka. O kaane yere maa ye Nawomi. O bakeiri sem yera maa ye Maalon de Kilion. Ba déem ye Eferata dwi dem tiina mo ba na nwoŋi Judah teo, Bɛtelehem. Ba ma seene ba vo ba zoore Moaba teo kom ne.

³ Ba na wora to, Elimeleka ma te ye o daare Nawomi de o bakeiri selei sem.

⁴ Banto ma swo Moaba bukwa ba ma ke ba kaana. Dedoa yere mo Orepa, wodwoŋi wom yere maa ye Ruf. Ba déem ma zo Moaba ne ba yi bena fuga.

⁵ Maalon de Kilion de déem ma te. Ko laam ma daare Nawomi, ye o daa ba jege baro naa bu-baara.

⁶ Nawomi ta na wo Moaba laŋa ne konto to mo o nigi we Baŋa Wɛ woli o nɔɔna bam pa se ba na wodiu ba di. O na nigi konto to, o ma zaŋe dedaane o bu-kaana Orepa de Ruf, se o jwoori o vo o tete teo kom.

⁷ Ba maama ma zaŋe ba yage ba déem na zoore mɛ to ye ba tɔge chwoŋa ba maa vei Judah teo kom.

⁸ Nawomi ma ta de o bu-kaana balei bam o we, “Abam maama jwoori-na á niina tei. Baŋa Wɛ wó ke abam lanyerane, nenɛɛne abam ya na ke amo de á banna bam lanyerane tei to.

⁹ Wɛ wó pa abam chwoŋa se á zo banna badwonna ye á na yazura ba sam ne.” O ma kukwori-ba ye ba keeri bɔge-bɔge.

¹⁰ Ba ma leiri‑o ba we, “Dé bá yage‑m! Dé wó tɔge nmo mo dé vo n nɔɔna bam tei.”

¹¹ Nawomi maa we, “A bukwa bam, jwoori-na á daare-ne. Bɛŋwaane mo á boŋe se á tɔge-ne á vo? Amo daa lage a lo bakeiri se ba ji abam banna mo na?

¹² Jwoori-na á sam, se a tiini a kwe a kɛ ban-zore. A ya ná maŋe a boŋe we a wó wane a lo bia, ye a ná nɛ baro zem se a daare a lo bakeiri mo de,

¹³ abam ta wó jeini á cheigi se á zo-ba na? Abam bá zo banna badwonna na? A bukwa bam, ko bá ke konto. Ko tiini ko chamma amo yerane ko dwoi abam, kolo ŋwaane Baŋa Wɛ mo chɔge a yiga.”

¹⁴ Nawomi na tage konto to, ba daa ma keeri bɔge-bɔge. Orepa laam ma kukwori o baro nu Nawomi ye o bane‑o. Ko daare Ruf ma fɔge o pɛ Nawomi o ja.

¹⁵ Nawomi na nɛ konto to, o ma ta de Ruf o we, “N wo nɛ na? Nmo yuudwoŋi wom maa jwoori o nɔɔna bam tei se o daare o taa zuli ba dwi jwona yam mo. Nmo de kwaane se n ke konto.”

¹⁶ Ruf ma leiri‑o o we, “Yé fe-ne se a ke kolo a na vae to, se a bá ywori n kwaga ne. Nmo na lage n vo jei selo maama to, amo de wó tɔge a vo. Nmo na wó ta‑n zoore mɛ to, amo de wó zo dáane. Nmo nɔɔna bam wó taa ye amo de nɔɔna. Wɛ wolo nmo na zuli to mo, amo de wó zuli.

¹⁷ Nmo na wó ba n te mɛ to, dáane mo amo de wó te se ba suli-ne da. Wɛ wó waare-ne lanyerane nenɛɛne a ná sɛ se woŋo pɔɔre debam daane ye ko dae toone yerane.”

¹⁸ Nawomi na maane we Ruf seene o yia se o tɔge‑o to, o daa wo tage kolokolo.

¹⁹ Ba ma vo taa ba vo ba yi Bɛtelehem. Ba na yi da to, ko ma ke teo kom nɔɔna bam yaau. Kaana bam ma bwei daane ba we, “Nawomi mo tento na?”

²⁰ Nawomi ma ta o we, “Dam-fɔrɔ Tu Wɛ wom pɛ se a ŋwea ke cham mo. Konto ŋwaane, daa á yé bwoŋi-na a yere we Nawomi. Nam ta‑á bwoi a yere we Mara.

²¹ A na nwoŋi ywo-seeni to, a jeŋa wonnu déem daga dedɛ. Baŋa Wɛ laam ma pa se a jwoori de je-kore. Dam-fɔrɔ Tu Wɛ wom mo lɔge a kwaga ne ye o daare o ja cham dedɛ o ba a baŋa ne. Konto to, bɛŋwaane mo á daa wó ta‑á bwoi a yere we Nawomi? Ko ba jege kuri.”

²² Ko déem ke konto mo ye Nawomi nwoŋi Moaba o jwoori o vo Bɛtelehem, wonto dedaane Moaba tiina bukɔ Ruf na ye o bu-kaane to. Maŋa kalo ba na bobo se ba zage chaara to mo ba yi da.