Brɩm Tɔnɔ 1 - Wɛ Tɔnɔ

¹ Tɔnɔ konto wo wonnu tem ye kolo Wɛ na bere Yezu Krista se o ma le o bere o tontoŋena, se ba wane ba lɔre kolo na jege se ko ke leile to mo. Yezu pɛ o maleka mo ba amo tei se ka bere-ne wonnu tem konto.

² Amo Jɔn ye Yezu tontoŋeno mo, ye a popone kolo maama a na nɛ to a tiŋi. Amo zege Wɛ kwora kam kwaga ne mo, ne Yezu Krista na veere o bere-ne tei to.

³ Nɔɔno wolo ná kwaane o ga tɔnɔ konto pa nɔɔna cheigi, wonto ye yu-ywoŋo tu mo. Balo de na cheigi tɔnɔ kom wo wonnu tem ye ba kwori ba sɛ-te de ba wo maama to wó taa jege yu-ywoŋo. Ko seene ko ye kolo Wɛ na le o bere-ne to mo, ye maŋa kam yia se wonnu tem seene te ke.

⁴ Amo Jɔn mo popone tento a pa Yezu kɔgɔ kuni berepɛ kolo na wo Asia te-nia yam wone to. Wɛ wó pa abam zaane de yazura. Wonto maŋe o wora mo boboa ne, ye o ta wora zem se ko taa vei wuu. Wɛ dedɛɛra barepɛ balo na bere o Jworo kom dam ye ba zege o paare yitiŋu kom yiga ne to de wó pa abam zeinim konto.

⁵ Yezu Krista de wó pa abam zaane de yazura. Wonto mo ye wolo na yɔɔre o zege Wɛ chega kam kwaga ne to. Wonto ta mo ye wolo na dɛ yiga o bi toone wone ye o na Wɛ ŋwe-doŋa kam to. O nam ta mo ye logo baŋa pwa bam maama yuu tu. Yezu swoi debam ye o vere debam dé wɛleera wone o yage, o na tega ye o jana bam nwoŋi to ŋwaane.

⁶ O ma daare o pa dé ji dwi delo na wó zege o Kwo Wɛ yiga ne ye dé zuli‑o ne kaanem tiina to. Zula de dam taa wo Yezu tei ne se ko taa vei wuu. Ameena.

⁷ Nii-na! Wonto tɔge de kunkwonnu mo o beene. Nɔɔno maama yi wó na‑o, de balo na zɔge‑o de chichwei to de. Ko daare logo baŋa dwi maama wó keeri o ŋwaane. Ko ye chega mo. Ameena.

⁸ Yuu-tu Baŋa Wɛ mo we: “Amo mo ye pulim jei de kweelim jeiga.” Wonto mo maŋe o wora boboa ne, ye o ta wora zem se ko taa vei wuu.

⁹ Amo Jɔn ye abam nu-bu mo. Amo na ye Yezu nyem to, ko ma pa se a tɔge a na yaara nenɛɛne abam de na nɛ yaara tei to. Amo nam kwori a tɔge de abam a woli Wɛ paare dem wone, ye a tɔge a na baare Yezu ŋwaane. Amo na kwaane a bere Wɛ kwora kalo Yezu na le o bere-ne to ŋwaane mo ba jaane-ne ba yage Patama buburu kom yuu ne.

¹⁰ Dɛ delo na ye Wɛ siu dɛ to mo o Sin-laao kom tu amo tei de dam. Amo ma ni kwora na ŋɔɔne baŋa baŋa a kwaga ne, ne nɔɔno na wui nabɔnɔ tei to.

¹¹ Kwora kam ma ŋɔɔne ka we, “Nam popone kolo maama nmo na wó na to n ke tɔnɔ ne, se n toŋe-ko n pa Yezu kɔgɔ kolo na wo teene derepɛ dem wone to. Teene dem konto mo ye: Efesia, Semuna, Pɛregama, Tuatera, Sadisa, Filafia, de Ladika.”

¹² Amo ma pipiri se a nii wɔ mo ŋɔɔna de amo. A ma na sabu-seŋa min-zwonnu terepɛ mo na zega.

¹³ Nɔɔno maa zege te tetare ne, o na nye de nabiinu bu. O ma zo gare-dedɔrɔ o de o napera ne, ye o daare o vɔ sabu-seŋa kila o nyɔɔne ne.

¹⁴ O yu-ywei maa tiini se peere cha, ne lɔŋɔ tei. O yia maa nye ne min-vogo tei.

¹⁵ O napera maa nyeena, ne channa kolo ba na ke mini ne pa ko be to. O kwora maa dɔna ne na-fwaaro mo chuuri tei.

¹⁶ O maa zei chalechwe serepɛ o jazem ne. Se-zɔɔ kolo na tiini ko jege ni ye ko ye nia yalei to maa nwoŋi o ni ne. O yibia maa nyeena, ne wea na tiini ka nye tei to.

¹⁷ Amo na nɛ‑o ye o jege dam konto to, a ma to o yiga ne, ne a tega mo tei. O ma kwei o jazem o daŋe a baŋa ne, ye o we: “Yé ta‑n kɔre foone. Amo mo ye boboa kam de gurim tu.

¹⁸ Amo ye ŋwea tu mo. Amo ya tege mo, ye a laam jwoori a jege ŋwea se ko taa vei wuu. Amo jege dam toone baŋa ne de churu de baŋa ne.

¹⁹ Nam popone wonnu telo nmo na nɛ to. Ko ná ye wonnu telo na wora te ke leile to, dedaane wonnu telo na lage te ke kwaga to, se n popone te maama n tiŋi.

²⁰ Amo wó bere‑m chalechwe serepɛ sem nmo na nɛ amo jazem ne to, de sabu-seŋa min-zwonnu terepɛ tem kuri na ye tei to chekke. Chalechwe serepɛ sem bere Wɛ tontoŋena balo na nii wɛ-di serepɛ sem nɔɔna baŋa ne to mo. Ko daare min-zwonnu terepɛ tem de bere wɛ-di serepɛ sem nɔɔna bam tete na ye tei to mo.”