Filimɔn 1 - Wɛ Tɔnɔ

¹ Amo Pɔɔl wolo na ye Yezu Krista nyem ye ba ja-ne ba ke peena diga ne o chega kam ŋwaane to mo popone tɔnɔ konto, ye dé nu-bu Timoti wo amo tei ne. Dé popone dé pa nmo Filimon, nmo na ye debam badwoŋ-swono ye n tɔge de debam n toŋe Wɛ totoŋa to.

² Dé jɔɔne nmo, ye dé daare dé jɔɔne dé nakɔ Afia, de Achipu wolo de na chana Wɛ totoŋa baŋa ne to. Dé daare dé jɔɔne Yezu kɔgɔ kolo na yeini ko tigisi daane nmo sɔŋɔ ne to maama.

³ Dé Kwo Wɛ, de dé Teiru Yezu Krista wó pa abam zaane de yazura.

⁴ Maŋa maama amo ná yeini a lwoori Wɛ, a guli nmo gula o yiga ne ye a ke‑o lei nmo ŋwaane.

⁵ Kolo ŋwaane a lɔre we, n jege Wɛ nɔɔna bam maama swono lanyerane, ye n ta kwori n ke n wo-dedoa de dé Teiru Yezu.

⁶ Wɛ wó pa‑m chwoŋa se n wane n woli n dwonna de nmo na jege wo-dedoa de Yezu Krista tei to, pa se n totoŋa yam ja kuri lanyerane, ye n wane n lɔre wo-laaro telo maama Wɛ na ke o pa debam Yezu ŋwaane to.

⁷ Nmo na jege n dwonna swono tei to mo pae se amo wo pwoli dedɛ, ye ko fɔge amo de baare, nmo na woli Wɛ nɔɔna bam se ba na ywoni ba bochara ne to ŋwaane.

⁸ Mo kokuri, amo lage a lwoori nmo se n ke kolo na maŋe se n ke to. Amo ya wó taa jege chwoŋa se a da Yezu Krista ŋwaane a ma dam a bere‑m nmo na wó ke kolo to.

⁹ Amo nam wó tɔge swono ŋwaane mo a lwoori‑m. Amo Pɔɔl wolo na ye nɔn-kwea ye ba ke-ne peena diga ne leile konto Yezu Krista chega kam ŋwaane to,

¹⁰ a lage a lwoori‑m nmo kabaa Onesima ŋwaane. Wonto nye de a tete bu mo. Amo na wo peena diga ne to mo a jigi o kwo Wɛ chwoŋa seeni.

¹¹ O déem na toŋe o pa nmo to, o wo pɛ se n na nyɔɔre. Ko daare leile konto o jege nyɔɔre o pa nmo de amo maama.

¹² Amo lage a toŋe‑o se o jwoori o ba nmo tei, ye a ta jege o swono a bochare ne.

¹³ Amo na wo peena diga ne Wɛ kwor-ywoŋa kam berem ŋwaane to, a ya wó taa lage se o maŋe a tei ne, se o wane o leiri nmo yuu ne o taa toŋa o pa-ne.

¹⁴ Amo nam ba lage se a ke kolokolo ye nmo yeiri ko ni ne. Ko wó taa ye nmo ná sɛ se n woli-ne, ye ko bá taa ye fefeo ŋwaane.

¹⁵ Onesima na duri o yage nmo to, o pɔɔre nmo tei ne maŋa fenfee wone. Ko nam wó wane ko pa se o laam jwoori o ba o taa wo nmo tei ne taa wuu.

¹⁶ O na duri o yage nmo to, o déem ye kabaa mo. O ná jwoori, o laam wó taa dwoi kabaa na ye tei to, de o na jigi nmo nu-bu dé Teiru wom ŋwaane to. Amo tiini a jege o swono. Nmo nam wó tiini n ta‑n swoi‑o se ko gaale, o na ye n kabaa ye o kwori o ye n nu-bu to ŋwaane.

¹⁷ Nmo ná sɛ we debam seene dé me daane Wɛ ŋwaane, se n kwaane n jeeri Onesima lanyerane ne amo mo tei.

¹⁸ O déem ná maŋe o ke o chɔge nmo yuu, naa o ná jege nmo jene, se n kwei ko maama n pa amo.

¹⁹ Nii, amo Pɔɔl tete mo mɛ a jeŋa a popone tento we, Amo wó ŋwe jene dem. Ko daare nmo wó wane n guli we, n maŋe n jege amo jene dedɛ, de nmo na nɛ ŋwea Wɛ tei ne amo ŋwaane to.

²⁰ A nu-bu, ko ye chega mo we, amo laam lage se a na nyɔɔre nmo baŋa ne, nmo na ye dé Teiru wom nyem to ŋwaane. Pa se ywoni taa wo amo bochare ne Yezu Krista ŋwaane.

²¹ Amo na popone tɔnɔ konto a pa nmo to, a yei lanyerane we, nmo wó sɛ a boboŋa yam. Amo ta yei we, nmo wó ke keim delo na wó dwoni amo na lwoori kolo to.

²² Ko ta woli da, a lwoori‑m se n kwaane n lage diga se a peini da. Kolo ŋwaane amo jege teena we, Wɛ wó sɛ abam na lwoori‑o á pa-ne tei to ye o pore chwoŋa se a jwoori a ba abam tei.

²³ Epafera mo jɔɔne‑m. Wonto dedaane amo mo wo peena diga ne Yezu Krista chega kam ŋwaane.

²⁴ Maake, de Arisaka, de Demas, de Luka maama de jɔɔne‑m. Banto de amo tɔge daane dé toŋa dé pa Wɛ.

²⁵ Dé Teiru Yezu Krista zaane dem taa wo abam bochara ne.