Nahum 1 - Wɛ Tɔnɔ

¹ Kwora kanto déem mo tua Elikosi tu Nahum tei Ninevɛ tiina bam ŋwaane. Nahum ma popone wonnu telo Wɛ na veere o bere‑o to o tiŋi tɔnɔ ne.

Wɛ bane zaŋe de Ninevɛ tiina

² Baŋa Wɛ yi page o nɔɔna bam baŋa ne. O wó waare balo na dwoni ded‑o to. O bane wó tiini de zaŋe de balo na ve‑o to. O ta wó jwoori o ŋwe o jene o seba-nyena baŋa ne. Chega to, o bane wó zaŋe o dona baŋa ne ye o bá yage.

³ Baŋa Wɛ yeini o peene o bane mo. O dam-fɔrɔ nam gaale pa se o yɔɔre o waare balo na gɛ bora to. Chwei selo maama ne Baŋa Wɛ na wó tɔge da to, vo-dɛɔ mo yeini ko dola. O na wó nɔne mɛ maama to, kunkwonnu de maa jaane kulululu, ne fwogo mo tei.

⁴ Wonto bwɛ naneo kom we ko we, ye ko seene ko we. O ta maa pae se nabare sem kora. Basan laŋa kam de Kamele peo kom gaaro tem maama koga. Lebanon peero baŋa teeni dem maama de ma te.

⁵ Baŋa Wɛ ná bere o dam dem, peero tem wó ziziŋi mo. Zwonnu tem maa wó saare te to buri-buri. Tega kam baŋa maama de wó chɔge, pa se logo baŋa de nabiina maama yera taa sae.

⁶ Baŋa Wɛ bane ná zaŋe, wɔ mo yi se o zege o yiga ne? O bane ná tutugi, wɔ daa mo wó wori? O ná lwogi o bane logo baŋa ne, kandwa tete wó chochoge mo muga-muga.

⁷ Baŋa Wɛ lamma mo. Cham ná yi o nɔɔna bam, o maa ye ba dalem jei. Ko ná ye balo na seigi o woro kom wone to, o maa nii ba baŋa ne.

⁸ Ko nam ná ye balo na dwoni ded‑o to, o lage o chɔge-ba mo lela, ne na-fwaaro na chuuri ba baŋa ne tei to. O ta wó zeili o dona bam pa se lim kwoli-ba.

⁹ Abam jeeli se á ke bɛ mo á ma‑á chɔge Baŋa Wɛ yiga? Wonto nam wó pa á boboŋa yam konto jei. Nɔɔn-nɔɔno bá dwoni ded‑o se ko ke belei.

¹⁰ O dona bam nye de sa-nyɔra mo. Ba ta nye de sabare selo na milimi daane to mo. Mini mo lage de zwɛ-ba nenɛɛne ga-korro na yeini te zwɛ kula tei to.

¹¹ Ninevɛ tiina bam, puseŋ-nyeno mo nwoŋi abam wone o jeeli keim-balɔrɔ se o ke o chɔge Baŋa Wɛ yiga.

¹² Baŋa Wɛ kwora mo tento: “Asiria tiina bam ná maŋe ba damma ye ba daga tei de, amo wó pa ba na chɔgem, pa se ba jage da-yiga ne. A nɔɔna bam, amo seene a pa se cham yi abam. A nam daa bá ke konto.

¹³ Leile konto amo lage a pa se Asiria tiina bam dɔne ba jea á baŋa ne, se ba daa yé taa bɛɛse abam.”

¹⁴ Baŋa Wɛ ta pɛ ni dento, se de taa wora abam Asiria tiina bam ŋwaane: “Á dwi dem wó jei mo pa se á yera saare. Amo lage a chɔge á jwona yam mo se á daa yé zuli-ya ya di sem ne. A ta maa wó suli abam tega ne, á na ye nɔn-yɔɔro to ŋwaane.”

¹⁵ Judah tiina bam, nii-na peero tem seeni! Tontoŋeno mo maa beena. O nɛ sem nɔne peero tem yuu ne ye wopwolo de yazura taane wo o ni ne. Konto ŋwaane, ta‑á di-na á kura yam, se á daare á ke kolo á na gwoni ni de Baŋa Wɛ se á ke to. Puseŋ-nyena bam konto daa bá wane ba kwaare jara de abam, Wɛ na wó chɔge-ba o ti to ŋwaane.