Malaki 1 - Wɛ Tɔnɔ

¹ Kwora kalo Baŋa Wɛ na kwei o pa Malaki se o lwoni o bere Isarele tiina bam to mo tento.

Baŋa Wɛ swoi Isarele dwi dem

² Baŋa Wɛ mo tage we, “Maŋa maama wone mo amo tiini a jege abam swono.” Abam nam daa ta kare á bwei amo we, “Bere debam chwei selo nmo na tɔge ye n swoi debam to.” Amo Baŋa Wɛ ma leiri a we, “Yé swei-na we abam nabaaro Jakob déem ye nyaane mo o zembaaro Esawu yiga ne. Amo nam jege Jakob de o dwi dem swono,

³ ye a chuli Esawu de o dwi dem ni taane. Konto ŋwaane mo amo pipiri Esawu na jei peero laŋa kalo ne to, pa ka ye yɔɔ yerane. Ba tega kam ma ji kagoa ye ga-vara kare ka wone ba beera.”

⁴ Esawu dwi Edom tiina bam wó wane ba ta we, “Debam teo kom seene ko chɔge mo. Dé nam wó jwoori dé lɔ-ko dé zege.” Amo Paŋwa Tu Baŋa Wɛ nam tɛ we, “Ba ná ke dam ba jwoori ba lɔ ba teo kom, amo ta lage a vaare-ko mo a de tega ne. Nɔɔna wó taa yaale ba teo kom ba we ko ye te-balɔrɔ mo, ye ba bwoi Edom tiina bam we ba ye balo Baŋa Wɛ bane na fɔge de wo ba baŋa ne to.”

⁵ Abam Isarele tiina bam wó na tento maama, ye á laam wó ta we, “Baŋa Wɛ dam daga. O dam dem nam kɛ de yi teene dedwonna ne mo se ko dae debam teo kom siseini dem yerane.”

Wɛ na bwɛ kaanem tiina bam tei to

⁶ Paŋwa Tu Baŋa Wɛ jege kwora kanto mo se o pa kaanem tiina bam: “Bia jege se ba taa nege ba kwoa mo, se balo na toŋe ba pae nɔɔna to de taa nege balo na tei-ba to. Amo nam mo ye abam kwo de á yuu tu de. Á nam ba nege-ne. Bɛ mo tei keim dento maama? Abam tiini á gwooni amo, ye á ta kare á bwei we, ‘Tetɛ seeni mo dé gwooni nmo?’

⁷ Abam pɛ se chaveera ja-ne, kokuri to á jege wodiu kolo na digiri to mo á ke kaanem á pa-ne, ye á daa ta jege ni se á bwei amo we, ‘Debam bere dé ke tɛ mo ye dé pa se chaveera ja nmo to?’ Nii-na mo! Abam keim dem bere nenɛɛne á yeini á nii amo kaanem bimbini dem mo ye á chweesa we, de ye wo-kafɛ mo.

⁸ Abam na yeini á ja vare-lilwoa de vare-gwane dedaane vare-jaweena bam se á ma‑á ke kaanem á pa amo to, konto dae wɛleere mo na? Á wó wane á ja vara konto dwoŋi á vo á pa á teo kom yuu tu mo na? Á ya ná ke konto, á boŋe we o wo wó pwoli de abam se o wane o nii á seeni na?

⁹ Abam nam ná vei yiga se á ta‑á jaane vara konto dwoŋi á tui á ke kaanem á pa amo, ye á laam ba á lwoori lanyerane a tei ne, á boŋe we amo wó cheigi abam taane mo na?”

¹⁰ Paŋwa Tu Baŋa Wɛ na jege kolo se o ta to mo tento: “Abam wone dedoa ya mo ná maŋe o pi Wɛ diga kam ni dem, ko ya wó taa gara. Konto wó pa se á daa bá ja kaanem delo na ba jege kuri to á ba á zwɛ á pa-ne. Amo ba jege wopwolo de abam kaanem tiina bam na ke tei to. Konto ŋwaane mo a bá jwoŋi á pɛɛra yam.

¹¹ Amo zula yam wó zaŋe baŋa baŋa mo logo baŋa teene dedwonna wone. Ko zege teene delo na jeeri wɛ-puli seeni to se ko yi delo na wo wɛ-zoore seeni to, de maama wó zuli amo. Jei maama ne mo nɔɔna wó ja talwoŋ-ywoŋa dedaane pɛɛra yalo na ye wose to ba ba se ba pa-ne zula.

¹² Ko nam ná ye abam, á gwooni-ne mo, nenɛɛne á na yeini á boŋe we amo bimbini dem mo ba jege kuri to. Abam ma yeini á ja wodi-yɔɔro á ba dáa ne se á pa-ne.

¹³ Abam na kare á ŋɔɔne tei to mo tento: ‘Wɛ totoŋa yam tiini ya chamma mo’, ye á daare á virigi á kwaga á ya amo. Abam ná ŋɔge vara á ja á ba, naa á ná jaane vare-jaweena dedaane vare-gwane mo á ba se á pa amo, á boŋe we amo ta wó jwoŋi tento maama ye a wo pwoli na?

¹⁴ Sɔɔlem mo daŋe kampin-nyena bam yuu ne! Kolo ŋwaane o jege vare-laao o sɔŋɔ ne, vare-bɛa kalo o ya na pwooli se o ma ke kaanem o pa-ne to, ye o laam jwoori o ni dem kwaga ne se o pa-ne varem wolo na wo su yi to. Amo mo ye Pa-faro ye ko jege se logo baŋa teene dem nɔn-bia bam maama mo taa kɔre amo yere dem!” Paŋwa Tu Baŋa Wɛ na tage tei to mo konto.