Wo-chechɔgɔ 1 - Wɛ Tɔnɔ

Wo-chechɔgɔ na yi Jerusalem tiina tei to

¹ Nii teo konto laam na tigi tei ye nɔɔn-nɔɔno tere ko wone. Ko déem nam su de nɔɔna mo! Ko déem ye te-fɔrɔ mo logo baŋa teene dem wone. Nii ko laam na ye ne kadeim tei! Ko ya ye teene dem maama dedɛɛro mo, ye ko laam to kabɛɛne wone.

² Teo kom nye de kaane wolo na yɔɔre o keeri mo. Yi-na ma bɔɔre o keila yam tete dem maama wone. O bɔɔla bam wolowolo nam tera se kotu zuri o bochare. O badwonna maama de ma baare o kwaga ne, ye banto ji o dona.

³ Judah tiina yaara yam de ba totoŋ-dɛɛra yam kwaga ne, ba ta kale-ba mo ba ja ba vo sa-teo yiga yiga. Ba laam maa zoore dwi-gɛ tiina tetare ne. Ba daa ba jege mɛ ba na wó jeini se ba sii to. Ba dona maama pare-ba ba ja mo. Jeiga daa tera se ba duri ba vo ba jwoŋi ba tete.

⁴ Nɔɔna daa ba tui ba zoore teo kom wone se ba di kura Wɛ diga kam wone. Konto ŋwaane chwei selo na vei se zoore Zion wone to de keeri mo. Teo kom ni maama wone nɔɔn-nɔɔno tera. Wɛ kaanem tiina yɔɔre ba vuvuni mo. Ko bukwa bam wo ma chɔge, kokuri to, teo kom cham dem kɛ jeŋa mo.

⁵ Balo na ye Jerusalem dona to laam mo jigi ko yuu tiina. Ba nam ba lwei de kolokolo. Kokuri to, Baŋa Wɛ mo pɛ se cham dento yi teo kom, ko wɛleera yam na tiini ya gaale to ŋwaane. Ko dona bam yɔɔre ba di ko nɔn-bia bam mo jara wone, ye ba daare ba pɛ-ba ba ja ba viiri.

⁶ Zion nenɔŋ-fɔrɔ kom maama laam ti mo. Teo kom dedɛɛra tiini ba bwona ne wei na beeri gaao se ga se se di tei to. Ba ma kwaane se ba duri ba dona yiga ne, ye ba ware.

⁷ Jerusalem na wo cham wone ye o kare o beeri maŋa kalo to, mo o guli o déem na jege ywoni delo o di to. Ko ye o dendéem gula mo o guli. O laam nam to o dona jeŋa ne mo, ye nɔɔn-nɔɔno tera se kotu woli‑o. O dona bam maa nii, ye ba jege‑o ba mɔna de o na nɛ chɔgem to ŋwaane.

⁸ Jerusalem yɔɔre o ke o tusi dedɛ mo, pa se o ji wo-zɔɔne nɔɔna yiga ne. Balo déem na nege‑o to laam gwooni‑o mo, ba na nɛ o kuri to ŋwaane. Wonto tete de laam yɔɔre o vuvuni mo, ye o daare o jege o yibia o seiga chaveera na jege‑o to ŋwaane.

⁹ O chɔge o tete mo de wo-zɔɔna kikia. O nam wo boŋe se o lɔre ko jwa na wó ke‑o tei to. O laam na to tei to mo tiini ko jege lɛɛro. Nɔɔn-nɔɔno nam tera se kotu zuri o bochare. O maa we, “Baŋa Wɛ, nii ko na zoore a yera tei! A dona bam mo di dam a baŋa ne!”

¹⁰ O dona bam nɛ chwoŋa se ba zo ba pɛ o jejegero maama ba ja ba viiri. O zege o nii mo ye dwi-gɛ tiina zo Wɛ wara-jei sem wone. Baŋa Wɛ tete nam ya maŋe o ta we, ko chula se banto zo o diga kam wo.

¹¹ Teo kom nɔn-bia bam maama yɔɔre ba vuvuni mo ye ba beeri wodiu se ba di. Ba laam ma kwei ba jejegero ba yeigi, se tento leiri wodiu yuu ne se ba ma wori. Ba maa we, “Baŋa Wɛ, nii dé seeni, se ba tiini ba gwooni debam dedɛ.”

¹² “Abam balo na wo chwoŋa yuu ne á kɛ to, á yiga tera na? Nam pipiri-na á nii kolo na yi amo to. Nɔɔno tera kotu yaara na yi amo nyem dem. Ko ye Baŋa Wɛ mo kwei cham dem konto o ke amo yera ne, maŋa kalo o ban-lom na zaŋe de amo to.

¹³ O pɛ se mini mo nwoŋi wɛyuu ne de ba amo baŋa. De ma zo a yera ne, ye de zwɛ a kwi sem. O chege kalanchogo mo se ko ja-ne, pa se a pipiri a jwoori kwaga. O yage amo a yerane mo, pa se a yera chɛ dɛ dem maama wone.

¹⁴ Ko nye de o kwei a wɛleera yam mo o ke daane, ne nɔɔno na vɔge ŋone daane tei to. O ta kwei-ya o lei a ba ne pa se a dam maama jei mo. Baŋa Wɛ na kwei-ne o ke a dona jeŋa ne to, a ware se a zege de-ba.

¹⁵ Baŋa Wɛ tete mo maŋe o ve a na teere de babɛ selo to. O ma bwoŋi nɔn-kɔgɔ se ba ba amo baŋa, ye ba daare ba meere a nɔn-donno tem. Wɛ tete mo nɔne Judah dwi tiina bam o le, ne nɔɔno na nɔne sɛɛro o le swa wone tei to.

¹⁶ Wonnu tento ŋwaane nam mo pa se a yɔɔre a keera. A yia yi-na de maa chuuri bare-bare. Nɔɔn-nɔɔno nam tera se kotu zuri a bochare. Nɔɔno tera se o woli-ne se a jwoori a tete ne. Amo bia bam daa ba jege jwa, kokuri to, dé dona bam wane debam mo.”

¹⁷ Jerusalem yɔɔre o lwoori wolim mo nɔɔna tei ne. Nɔɔn-nɔɔno nam tera se kotu zi o bochare. Baŋa Wɛ maŋe o ta Jakob dwi tiina yera taane o we, ba fara wó ji ba dona. Jerusalem seene o ji wo-zɔɔne mo banto yiga ne, pa se ba chuli‑o.

¹⁸ O maa we, “Baŋa Wɛ ye chega Tu mo, se ko ye amo mo nwoŋi o ni dem kwaga ne. Cheigi-na, abam dwia yalo na zoore jei selo maama ne to. Nii-na a na yaare ye ko zoore a yera tei! Ba jaane a nɔn-donno tem de a bukwa bam mo ba kale ba ja vo sa-teo yiga yiga.

¹⁹ A bwoŋi a bɔɔla mo se ba ba ba woli-ne. Ba nam koge a kuri mo ba pa a dona. Kana ma go a kaanem tiina bam, de a nakwa bam, teo kom wone. Ba kare jei maama mo ba beeri wodiu se ba di ba wori ye ba ga.

²⁰ Baŋa Wɛ, nii ko na tiini ko yi-ne tei! Ko jege-ne mo ko ni. A wo kom tete de ma di, a na nwoŋi n ni dem kwaga ne to ŋwaane. Teo kom chwei sem ne, nɔɔna toa jara wone mo. Sɔŋɔ ne de, toone ta maa wora.

²¹ Nɔɔna nigi a na vuvuni tei to, ye nɔɔn-nɔɔno tera se kotu zi a bochare. A dona bam maama na nigi kolo na yi-ne to, ba yɔɔre ba chake mo de nmo na ke tei a yera ne to. Ja! Nam pa se banto de dɛ yi, ne n na gwoni ni se n ke-ba tei to, se ba de na yaara ne ko na ye tei amo yera ne to.

²² Pa se ba lwarem kikia maama taa tigi n yiga ne, se n pa ko zo ba de yera, ne n na pɛ ko zo amo yera tei a wɛleera yam maama ŋwaane to. A tiini a vuvuni dedɛ. A wo de ma jei.”