Jonah 1 - Wɛ Tɔnɔ

Jonah ve Wɛ ni

¹ Baŋa Wɛ déem mo ŋɔɔne de Amitayi bu Jonah o we,

² “Zaŋe n vo Ninevɛ te-fɔrɔ kom n ta‑n kaane ko nɔɔna bam we, ba lwarem dem gaale amo yiga ne.”

³ Jonah ma ve ye o zaŋe o duri se o vo Tarasisi. O déem vei Jopa mo se o ná nɛ nabworo na maa vei jei sem konto, se o duri o lu Baŋa Wɛ yiga ne. O laam ma ŋwe o sabu, ye o da o zo nabworo kom ne.

⁴ Baŋa Wɛ ma pa se vo-dɛɔ zaŋe ko mage na bam dedɛ. Vio kom na tiini ko fufugi konto to, nabworo kom maa ga fee se ko bwori.

⁵ Foone ma tiini de ja nabworo kom yuŋina bam, ye ba dedoa dedoa bobo o kaase o lwoori o teo wɛ se de jwoŋi‑o de yage. Ba ma daare ba dole ba zela ba yage na bam ne se nabworo kom taa pwona. Jonah déem nam ya tu nabworo kom kuri gugworo ne mo o tigi da, ye o dɔ o kɛ.

⁶ Yuŋina bam yiga tu wom ma vo o na‑o, ye o bwei‑o o we, “Bɛ mo ye nmo tigi n dɔa? Nmo de zaŋe n bwoŋi n Wɛ yere, se dɛ delo wonto wó duri dé ŋwaŋa, se dé yé maŋe na banto wone.”

⁷ Nabworo yuŋina bam ma bane daane ba we, “Pa-na se dé ta jɔrɔ se dé lɔre wolo ŋwaane cham dento na yi debam to.” Ba na tage to, ko ma ja Jonah.

⁸ Ba ma bwei‑o ba we, “Ta‑n tɛa, wɔ mo pɛ se lwarem dento ba debam baŋa? Bɛ totoŋe mo nmo jega se n toŋe ywo? Nmo nwoŋi yei ne mo? Nmo dwi ye dɔ mo?”

⁹ Jonah ma leiri o we, “Amo ye Hiburu dwi tu mo. Amo nam tɔge Yuu-tu Baŋa Wɛ wolo na tei wɛyuu ye o kwori o ke tega baŋa de naneo maama to mo.”

¹⁰ Ba na nigi konto to, foone déem ma tiini de ja nɔɔna bam. Kokuri to, Jonah ya maŋe o ta o bere-ba we o kwaane se o duri o lu Baŋa Wɛ yiga ne mo. Ba ma bwei‑o ba we, “Bɛ mo ye nmo ke keim dento?”

¹¹ Nabworo yuŋina bam ma bwei‑o ba we, “Bɛ mo dé wó ke de nmo se naneo kom ke ziim?” Vio kom déem yɔɔre ko taa tiini ko dana ko pa-ba mo pa se ba bwei‑o konto.

¹² Jonah ma leiri o we, “Ja-na amo á dole á de naneo kom wone, se ko wó ke ziim ko pa abam. Ko ye chega, amo yiga mo pɛ se abam zo vo-dɛɔ konto wone.”

¹³ Ba maa wo sɛ ye ba ya ta kwaane ba yuŋa de ba dam maama se nabworo kom wane ko bɛ buburu baŋa, ye ba ware. Vio kom ma bole ye ko fɔge ko tiini ko dana ko ja gaale.

¹⁴ Ba ma kaase ba bwoŋi Baŋa Wɛ yere ba we, “Jan ja, Yuu-tu Baŋa Wɛ! Dé lwoori‑m, yé chɔge debam dé na lage dé le nɔɔno wom ŋwea to ŋwaane. Kokuri to, nmo ná wo pɛ chwoŋa, tento maama bá ke.”

¹⁵ Nɔɔna bam ma dole Jonah ba de naneo kom wone, ye ko de ke ziim bedwe baŋa ne.

¹⁶ Ba na nɛ kolo maama na ke to, mo Wɛ kɔrɔ zo-ba lanyerane. Ba ma kwei kaanem ba ke ba pa Baŋa Wɛ, ye ba ta pwooli se ba taa zuli‑o.

¹⁷ Ko nam ná ye Jonah, Baŋa Wɛ toŋe ywoni kamunu mo pa se de ba de li‑o. O maa wo ywoni dem wone da yatɔ wea de tete maama.