Tɩtʋŋa Tɔnɔ 1 - Wɛ Tɔnɔ

Yezu na ke kolo ye o laam jwoori Wɛ telaao to

¹ Amo badwoŋi Teofila, amo maŋe a da yiga a popone tɔnɔ a pa nmo. Tɔnɔ kom konto wone mo a popone wonnu telo maama Yezu déem na ke to, ye a kwori a popone o na yeini o bere nɔɔna tei to.

² Amo popone o na ke tei ko zege maŋa kalo o na bobo o totoŋa yam to se ko vo ko yi dɛ dem Wɛ na kwei‑o o ja di wɛyuu to. O ta na wo diini Wɛ telaao konto to, o ma tɔge Wɛ Sin-laao dam ŋwaane o ŋɔɔne de o totoŋa nakwa balo o na kuri to, ye o bere-ba o ni se ba taa tɔga.

³ O toone dem kwaga ne o daa ma kwei o tete o bere o nɔɔna bam kuni dedɛ. O na ke tei konto to bere lanyerane we o seene o bi toone wone. Da finna mo o tontoŋena bam déem wane ba na‑o, ye o ŋɔɔne Wɛ paare dem taane o bere-ba.

⁴ Dɛ dedwe Yezu na wora o bere-ba konto to, o ma kaane-ba o we, ba yé zaŋe ba nwoŋi Jerusalem wone. O maa we, “Cheigi-na se a Kwo Wɛ laam zeini abam, ne o na pwooli se o ke o pa abam ye amo maŋe a bere abam ko taane to.

⁵ Jɔn déem yeini o kwei na mo o ma pa nɔɔna sɛɛm Wɛ ŋwaane. Ko laam daare da fenfee mo se Wɛ pa abam o Sin-laao kom se á ma á jwoŋi sɛɛm.”

⁶ Yezu de o tontoŋena bam déem na gilimi daane konto to, ba ma bwei‑o ba we, “Debam Teiru, nmo laam wó pa se debam Isarele tiina bam jwoori dé di paare logo baŋa ne leile konto mo na?”

⁷ Yezu ma leiri-ba o we, “Ko dae se abam mo lɔre maŋa kalo wonnu tem na wó ke to. Amo Kwo Wɛ nam mɛ o tete dam mo o tiŋi da yam pa se woŋo maama ke ko maŋa ne.

⁸ Wɛ Sin-laao kom nam wó ba abam baŋa pa se á jwoŋi dam Wɛ tei ne. Abam laam wó daare á zege amo chega kam kwaga ne á bere nɔɔna jei maama ne. Ko wó taa ye Jerusalem ne, ko woli de Judea de Samaria teene dem maama ne, de logo baŋa jei maama ne.”

⁹ Yezu déem na ŋɔɔne konto de-ba o ti to, Wɛ ma kwei‑o o jege o diini wɛyuu ye ba zege ba nii‑o. Kunkwoŋo ma ba ko li‑o pa se ba daa ware ba na‑o.

¹⁰ O na maa viiri konto to, ba daa ta ma kwoni ba yuni ba nii wɛɛne. Ba na wora ba nii konto to, nɔɔna balei ma pɔpɔ ba ba ba zege ba tei ne. Ba déem zo gare-pwonnu mo.

¹¹ Ba ma ta ba we, “Galili tiina bam, bɛ mo ye á zege ywoba á kwoni á nii wɛɛne? Abam na nɛ kolo to, ko ye Wɛ mo kwei Yezu o ja di telaao. Wonto tete nam wó seene o jwoori o ba konto dwoŋi, ne abam na nɛ o na maa viiri tei to.”

¹² Yezu tontoŋena bam laam ma zege peo kom ba na wo ko yuu ne to ba jwoori ba vo Jerusalem teo kom wo. Peo kom konto yere mo Olivi peo ye ko bwola dedaane teo kom nenɛɛne naba-laara moro.

¹³ Ba ma vo ba zo teo kom ba kɛ ba vo sɔŋɔ kolo ba na zoore da to. Nɔɔna bam konto ye Piita, de Jɔn, de Jemsi, de Anduru, ko woli de Filipi de Tomas, dedaane Batoloma de Matiyu, ko woli de Jemsi wolo na ye Alafayu bu to, de Simon wolo na nwoŋi Zɛlota tigisim wone to, dedaane Judas wolo na ye Jemsi bu to.

¹⁴ Maŋa maama banto déem yeini ba la daane de ni dedwe, ye ba ware Wɛ. Kaana badwonna dedaane Yezu nyaana de o nu Mary tɔge ba wora de-ba.

Ba kuri nɔɔno wodwoŋi se o leiri Judas yuu ne

¹⁵ Dɛ dedwe balo maama na ye nu-bia Yezu ŋwaane to ma gilimi daane jeiga dedoa, ko maŋe de nɔɔna bi de finlei (120). Ba na wora konto to, Piita ma zaŋe ba wone o zege wɛɛne se o ŋɔɔne.

¹⁶ O maa we, “Amo nu-bia bam, ko ná ye Judas wolo na bere Yezu dona bam chwoŋa se ba ja‑o to, Wɛ Sin-laao kom déem maŋe ko pa se Pɛ David ŋɔɔne wonto taane faŋa faŋa. Kolo na popone ko tiŋi Wɛ tɔnɔ kom ne wonto ŋwaane to mo jege se ko ba ko ji chega.

¹⁷ Judas déem tɔge o wo debam kɔgɔ kom wone mo, kolo ŋwaane Yezu tete kuri‑o se o taa tɔge o toŋe Wɛ totoŋa yam.”

¹⁸ Judas na ke tei to, o déem kwei sabu kolo o na jwoŋi o keim-balɔrɔ kom baŋa ne to o ma yeigi tega. Ko ye dáane mo o vei o te. O déem to tega ne mo. O puga ma bage ye o loro pi te nwoŋi.

¹⁹ Nɔɔna balo maama na zoore Jerusalem ne to ma ni kolo na ke‑o to, pa se ba bwoŋi tega kam konto we ‘Akɛladam’ de ba tete taane. Konto kuri mo ye ‘Jana tega’.

²⁰ Piita ta ma ta o we, “Ko nam popone Wɛ Seinim Lei tɔnɔ kom ne ko we: ‘Wɛ wó pa se wonto sɔŋɔ kom ji di-dwonnu, pa se nɔɔn-nɔɔno daa yé daare ko wone.’ Ko daa ta popone ko we: ‘Wɛ wó pa se nɔɔno wodwoŋi leiri wonto yuu ne o taa toŋe o totoŋa yam.’

²¹ Ko na ye konto to, ko maŋe se dé kuri nɔɔno dedoa se o woli debam Yezu tontoŋena bam wone. Konto tu nam jege se o taa ye wolo na tɔge o wo debam kɔgɔ kom wone maŋa maama dé Teiru Yezu déem na tɔge de debam o beeri to mo,

²² ko zege maŋa kam Jɔn na bobo o pa nɔɔna sɛɛm Wɛ ŋwaane to se ko vo ko yi maŋa kam Yezu na yage debam tei o di Wɛ telaao to. Dé na lage dé kuri nɔɔno wolo to wó zege dé Teiru Yezu chega kam kwaga ne de o na bi toone wone tei to.”

²³ Piita na tage konto o ti to, ba ma le nɔɔna balei yera. Dedoa mo ye Josɛf wolo ba na bwoŋi we Basaba ye ba daa ta bwoi‑o we Jusitu to. Wodwoŋi wom maa ye Matias.

²⁴ Ba laam ma lwoori Wɛ ba we, “Dé Teiru Wɛ, nmo maŋe n yei nɔɔna maama bochara na ye tei to. Konto ŋwaane dé lwoori nmo tei ne se n bere debam nɔɔna banto balei wone nmo na kuri wolo

²⁵ se o ji nmo tontoŋeno to, se o taa toŋe totoŋa yalo Judas na kwei o yage ye o daare o vo o na maŋe se o vo mɛ to.”

²⁶ Ba na lwoori Wɛ ba ti to, ba ma ta jɔrɔ se ba kuri yera yam konto yalei wone. Ba na tage ba kuri wolo to mo ye Matias. Ba laam ma pa se o taa tɔge o ye Yezu totoŋa nakwe o woli ba kɔgɔ fuga-dedoa kam wone.