2 Timoti 1 - Wɛ Tɔnɔ

¹ Amo Pɔɔl wolo na ye Yezu Krista totoŋa nakwe to mo popone tɔnɔ konto se a pa nmo Timoti. Wɛ tete mo kuri-ne de o boboŋa se a taa ye o tontoŋeno, se ko pa nɔɔna na ŋwea o tei ne, ba na me de Yezu Krista to ŋwaane. Mo Wɛ na pwooli se o ke kolo to.

² Nmo Timoti ye amo bu-swono. Dé Kwo Wɛ, de dé Teiru Yezu Krista wó pa nmo zaane de yazura, ye o daare o duri nmo ŋwaŋa.

Lei keim

³ Amo nam ke Wɛ lei. A maa toŋe a pa‑o nenɛɛne a nabaara bam déem na ke tei to, ye a bochare ba maga ko baŋa ne. A maa yeini a lwoori‑o maŋa maama wea de tete, ye a guli nmo gula a wɛ-lworo kom wone.

⁴ Amo guli nmo na kane yi-na debam na pwɛ da-tei ne maŋa kalo to. Konto ŋwaane a tiini a lage se a jwoori a ba a na nmo, se a wane a di ywoni a su.

⁵ Amo maane we n ke n wo-dedoa n sɛ Yezu. Nmo nu-nakwe Lowisi, de n nu Yunika de déem jege wo-dedoa de Yezu konto dwoŋi. Amo maa yei lanyerane we nmo de jega.

⁶ Konto ŋwaane mo a lage a pa nmo guli a déem na daŋe a jea nmo baŋa ne ye Wɛ pa nmo wolim to. Nam fɔge n nii Wɛ pɛɛre dem konto baŋa ne, se n ta‑n ma n tiini n toŋe Wɛ totoŋa yam lanyerane.

⁷ Kokuri, Wɛ na zeini debam de o Sin-laao kom tei to, ko dae se dé taa kɔre chaveera. Ko nam na zeini debam tei to pae se dé jege baare de swono dé bochara ne, ye dé ta wae dé tete dé jaana.

⁸ Mo kokuri, yé ta‑n kɔre chaveera se n zege dé Teiru Yezu chega kam kwaga ne. Ta yé pa foone zo‑m de ba na ke amo peena diga ne Yezu chega kam ŋwaane to. Ko nam maŋe se n de sɛ yaara yalo na wó yi‑m Wɛ kwor-ywoŋa kam berem ŋwaane to mo. Wɛ wó pa‑m baare se n tɔge n yaare konto dwoŋi nenɛɛne amo tei.

⁹ O nam maŋe o jwoŋi debam o pa se dé tɔge chwo-laao. O na zeini debam konto to, ko dae debam keim-laaro ŋwaane, se ko ye o tete boboŋa ŋwaane mo. Faŋa faŋa to, ko zege logo baŋa boboa ne, Wɛ déem maŋe o boŋe se o tɔge Yezu Krista ŋwaane mo o ke debam zaane.

¹⁰ Wɛ laam ma pa se dé lɔre o boboŋa yam konto, dé Vereno Yezu Krista na tu logo baŋa o veere o tete to ŋwaane. Wonto mo chɔge toone dam. O ma daare o tɔge Wɛ kwor-ywoŋa kam ŋwaane o pa se dé yi poore, ye dé wae dé nae ŋwea kalo na bá ti Wɛ tei ne to.

¹¹ Wɛ nam mo tiŋi-ne se a taa ye o totoŋa nakwe se a taa tɔɔle o kwor-ywoŋa kam a bere nɔɔna.

¹² Ko ye konto ŋwaane mo amo nɛ yaara yam konto. Amo nam bá taa kɔre chaveera. A ke a wo-dedoa de Yezu, ye a yei o wo lanyerane. Amo daŋe a teena wonto baŋa ne. A maa tiini a yei we o wae o nii amo na kwei kolo maama a ke o jeŋa ne to baŋa ne, se ko taa vei dɛ dem o na wó ba to.

¹³ Nam fɔge n ta‑n tɔge chega chwoŋa kalo amo na maŋe a bere nmo to, se n kwori n ta‑n jege wo-dedoa de swono, ne Yezu Krista na woli debam tei to.

¹⁴ Wɛ Sin-laao kom wo debam bochara ne. Tɔge wonto dam ŋwaane se n fɔge n nii chega kalo Wɛ na kwei o ke nmo jeŋa ne to baŋa ne, se nɔɔn-nɔɔno yé chɔge-ka.

¹⁵ Nmo maŋe n yei we, Wɛ nɔɔna balo maama na zoore Asia jei sem ne to mo jwoori amo kwaga ne, ko woli de Figela, de Hɛmɔgena.

¹⁶ Onesifɔrɔ nam mo yeini o pa a na ywoni a bochare ne. Wɛ wó duri o ŋwaŋa, de o sɔŋɔ tiina maama. Ba na ke amo peena diga ne to, o wo kɔre chaveera se o taa woli-ne.

¹⁷ O na tu o yi Rom maŋa kalo to, o déem beeri amo jei mo taa, ye o laam ba o na amo.

¹⁸ Wɛ wó pa o na chega dé Teiru Yezu dɛ dem ne. Nmo ta maŋe n yei lanyerane Onɛsifɔrɔ na tiini o woli-ne Efesia ne tei to.