Mariko 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩkangĩrĩrya lya Yoane Mũbatĩsya

¹ Erĩtsũka lyʼEngulu Yowene ya Yesu Kristo Mugala wa Nyamuhanga.

² Ngoko mũmĩnyererĩ Ĩsaya asaka, ati, Nyamuhanga ati, Omukwenda wage yoyũ. Nasyamutuma embere syawe, Erĩyakokotya enzira busana nawe.

³ Ni mulenge wʼoyukabirikirira omo mbwarara, ati, Mowanaye enzira yʼomukama, Mũtũngananaye esyombalu siwe.

⁴ Yoane Mũbatĩsya mwahulukira omo mbwarara, ĩnĩakatũlaganaya omwatsi ati, Mubindule emitima yenyũ erireka ebibi, mũbatĩsĩbawe, Nyamuhanga ababuyire ebibi byenyũ.

⁵ Neryo abandu bosĩ bʼekihugo kyʼeYũdea, nʼabʼomũyĩ wʼeYerũsalema mobahĩka uku Yoane. Mobakangya ebibi byabo, neryo Yoane mwabatĩsyabo omo lũsĩ lwʼeYorodanĩ.

⁶ Neryo Yoane abya ambite esyongimba syʼobweya bwʼengamia, iniakambala nʼomukoba wʼekihu omo mbindi yiwe; kandi iniakalya esyongĩke; nʼobuki bʼomolĩ.

⁷ Yoane mwabwira abandu ati, Oyo wasyasa enyũma syage anyĩrengĩrye maka, kandi ĩngye sinyitolere erĩũnama nʼerĩkũndũla emikoba yʼesyongendero syʼebisando biwe.

⁸ Ĩngye ngababatĩsaya omo magetsi, nĩkwa iye asyababatĩsya omo Mũlĩmũ Abũyĩrĩre.

Erĩbatĩsĩbwa lya Yesu

⁹ Omo biro ebyo Yesu mwalũa eNazaretĩ omo kihugo kyʼeGalĩlaya, na Yoane mwamũbatĩsya omo Yorodanĩ.

¹⁰ Neryoneryo Yesu abere abĩlũa omo magetsi, mwalangira olubula molwakingukala, nʼOmũlĩmũ iniakamwandagalirako ngʼakalĩkũkũ.

¹¹ Nʼomulenge mwalũa elubula ati, Uli Mugala wage mwanze, namakutsemera ndeke.

Erirengwako lya Yesu

¹² Neryo-neryo Omũlĩmũ mwamũlolya omo mbwarara.

¹³ Neryo Yesu mwabya eyo omo mbwarara ebiro makũmĩ ani, nĩkwa eSatanĩ moyamulengako. Yesu mwabya eyo haguma nʼesyonyama syʼomolĩ, nʼabamalaĩka mobasa nʼerimukolera.

Yesu akabirikira abasohĩ bani

¹⁴ Neryo Yoane abere abĩhĩrwa omo mũlĩkĩ, Yesu mwaya eGalĩlaya, mwatũlaganĩa Engulu Yowene eyĩkalũa ewa Nyamuhanga.

¹⁵ Ati, Omugulu abiribererera, nʼobwami bwa Nyamuhanga buli hakũhĩ! Mubinduke, erireka ebibi byenyũ, mwĩkĩrĩraye Engulu Yowene.

¹⁶ Kandi omugulu Yesu abya akalendera hakũhĩ nʼengetsi yʼeGalĩlaya, mwalangira Sĩmonĩ na mugala wabo ye Anderea, bakagusa ekĩsohĩ kyʼomo ngetsi kusangwa babya basohĩ.

¹⁷ Neryo Yesu mwabwirabo ati, Munyikwame, nage nasyabayira mo basohĩ bʼabandu.

¹⁸ Neryoneryo mobasĩga ebĩsohĩ byabo, mobamukwama.

¹⁹ Kandi mwagenda embere yo hake mwalangira Yakobo mugala wa Zebedayo, na mugala wabo ye Yoane, ibane omo bwato bakalanda ebĩsohĩ.

²⁰ Neryo-neryo Yesu mwabirikirabo; nabo mobasĩga ĩse wabo ye Zebedayo omo bwato haguma nʼabagombe babo, neryo mobakwama Yesu.

Omundu oyuli kwʼembĩnga

²¹ Neryo mobaya oko mũyĩ wʼeKapernaũmũ. Nʼoko kiro kyʼeSabato, Yesu mwingira omo nyũmba yʼerĩhĩndanamo, mwatsũka erĩkangĩrĩrya.

²² Neryo abandu mobaswekera erĩkangĩrĩrya liwe, kusangwa mwabya akakangĩrĩryabo nʼehamũlĩ, isiali ngʼabakangĩrĩrya bʼEmigambo.

²³ Nʼoko mugulu oyo omo nyũmba yʼerĩhĩndanamo mwabya omundu oyuli kwʼekĩrĩmũ kibi iniakalaka kutsibu ati,

²⁴ Uwe, Yesu wʼeNazaretĩ tuli na mwatsi wahi nawe kwehĩ? Wamasa erĩtũherya kwehĩ? Nyĩnakwasĩ, uli Oyũbũyĩrĩre wa Nyamuhanga!

²⁵ Neryo Yesu mwakunga embĩnga eyo ati, Ubye bũkũtũ, Ũlũe oko mundu oyũ!

²⁶ Nʼekĩrĩmũ kibi ekyo mokyamũsũkya-sũkya, kandi mokyalaka kutsibu, mokyamũlũako.

²⁷ Neryo abandu bosĩ mobasweka. Mokyaleka ĩbabũlanĩa bati, Kwʼekĩ nĩkĩ? Nĩ ʼkangĩrĩrya lihya-lihya kwehĩ? Akahana ebĩrĩmũ bibi nʼehamũlĩ, nabyo ĩbyamowa.

²⁸ Neryo engulu ya Yesu moyatsungana ehosĩ omo kihugo kyʼeGalĩlaya.

Yesu akalamaya abandu bangi

²⁹ Neryo mobalũa omo nyũmba yʼerĩhĩndanamo, mobaya omo nyũmba ya Sĩmonĩ na Anderea; kandi Yakobo na Yoane mobagenda haguma nabo.

³⁰ Neryo nyĩnyĩ-byala wa Sĩmonĩ abya alwere ekĩhũhanĩ. Nĩkwa mobabwira Yesu bati kwʼalwere atya.

³¹ Neryo Yesu mwahĩkaho, mwamuwata oko byala, mwamũhanganĩa. Neryo erĩhũhana molyamũlũako, neryo mwatsũka erikolerabo.

³² Neryo bwabere bwabya ĩgolo-golo, eryuba lyabirenga, abandu mobaletera Yesu yʼabakonĩ bosĩ nʼababya kwʼesyombĩnga.

³³ Neryo abandu bosĩ bʼomũyĩ mobahĩndana embere wʼenyũmba.

³⁴ Kandi Yesu mwalamya abangi ababya balwere emĩsĩndo yosĩ yʼesyondwala, kandi mwahiga esyombĩnga nyingi. Mwatalĩga esyombĩnga sĩkabũga mwatsi, kusangwa syabya ĩsĩnamwasĩ.

Yesu akakangĩrĩraya eGalĩlaya

³⁵ Omo ngyakya-ngyakya isibulibwakya, Yesu mwabuka mwalũa eka, mwaya ahate bandu, mwasabiraho.

³⁶ Nĩkwa Sĩmonĩ nʼabalĩkyabo mobamusonda-sonda.

³⁷ Nʼomugulu bamubana mobabũga bati abandu bosĩ bakakusonda-sonda.

³⁸ Nĩkwa Yesu mwabwirabo ati, Tugende ehandi oko yindi mĩyĩ, eyiri hakũhĩ, inatoka erĩkangĩrĩryayo nibya, kusangwa ekyo kyo nasira.

³⁹ Kwʼalendera atya ehosĩ eGalĩlaya, ĩnĩakatũla Engulu Yowene omo manyũmba wʼerĩhĩndanamo, nʼerihiga esyombĩnga.

Yesu akalamaya omuhaga

⁴⁰ Nʼomuhaga mwahĩka uku Yesu iniakamuhatikana nʼerĩmũkũkamira ati, Wamabya ũnanzĩre, wangatoka erĩnyĩlamya.

⁴¹ Yesu mwamũkwĩra bũlĩge neryo mwakakya ebyala biwe mwamũtũlako ati, Nyanzĩre, ũlamĩbawe!

⁴² Neryo-neryo ebihaga mobyamũlũako, mwalama.

⁴³ Neryo Yesu mwamuhana kutsibu, mwamutuma

⁴⁴ ati, Subwire omundu omwatsi oyũ. Nĩkwa ugende ũyĩkanganaye oko mũhererĩ, uhere obuhere obo Musa ategeka busana nʼerilama lyawe, erĩmĩnyĩsya abandu bosĩ ngoko wabĩrĩlamĩbwa.

⁴⁵ Nĩkwa omundu oyo mwahuluka, mwatsũka erĩtũlago ehosĩ nʼerĩtũlaganĩa engulu eyo. Kyaleka Yesu iniatatoka erĩhĩka oko mũyĩ, nĩkwa mwĩkala ahate bandu, nĩkwa abandu mobasa eyo ali bakalũa ehosĩ.