Закар 9 - Коми Библия 2023

Орчча муяс мыждӧм

¹ Водзвыв висьталӧм. Господьлӧн кывйыс олӧ Хадрак муын, шойччӧ Дамаск карын. Господь видзӧдӧ мувывса став олысьыс бӧрся: Израиль чужанкотыръяс бӧрся,

² Дамасккӧд орччӧн сулалысь Хамат кар бӧрся, зэв сюсь Тир да Сидон каръяс бӧрся.

³ Тир лэптіс аслыс изкар, чукӧртіс эзысьсӧ лыа мында, зарнисӧ – ывлавыв няйт мында.

⁴ Но Господь босьтас сылысь озырлунсӧ, вӧйтас сылысь тышкайӧзсӧ саридзӧ, а карсӧ биӧн сотас.

⁵ Тайӧс аддзӧмысь Аскалон повзяс, Газа ёна тіравны пондас, Экронӧс тшӧтш тіралӧм босьтас, ӧд сылӧн лачаыс серамтуйын лоӧ. Газаысь ӧксыӧс петкӧдасны, Аскалонын олысьыс оз ло,

⁶ Азотӧ овмӧдчасны сорласьӧм вира йӧз. Филистимсаяслӧн вывтіасьӧмлы Ме, Господь, пукта пом,

⁷ весала налысь вом пытшсӧ вир сора яйысь, перъяла пинь костсьыс пеж сёянсӧ. Филистим войтырлӧн колясыс лоӧ Менам, сійӧс лоӧ пыртӧма Иудаын олысь чужанкотыръяс лыдӧ, Экронын олысьяс евуссаяс моз лоӧны Менам войтырӧн.

⁸ Ме понда видзны Ассьым керкаӧс тышкайӧзысь, кодъяс ветлӧны тайӧ муыс пыр. Водзӧ некод нин оз дзескӧд Менсьым войтырӧс, ӧд Ме Ачым кута видзӧдны сы бӧрся.

Ерусалимӧ ӧксылӧн локтӧм

⁹ Долыда нимкодясь, Сион ныв, кыпыда гажӧдчы, Ерусалим ныв! Видзӧд, Ӧксыыд локтӧ тэ дінӧ! Сійӧ веськыда вӧчысь да вына мездысь, Сійӧ рам сьӧлӧма, локтӧ осёл вылын, пукалӧ осёл чань вылын.

¹⁰ Сійӧ пасьвартас Ефремысь тарантасъяссӧ, бырӧдас Ерусалимысь вӧвъяссӧ, чегъялас тышкасян ньӧввужъяссӧ. Сійӧ юӧртас войтыръяслы лӧнь олӧм йылысь, пондас юравны саридзсянь саридзӧдз, Ефрат юсянь му помӧдз.

Господь дорйӧ Ассьыс войтырсӧ

¹¹ Вирӧн вынсьӧдӧм йитӧд вӧсна Ме мезда пленӧ босьтӧмаястӧ, петкӧда найӧс ватӧм гуысь.

¹² Бӧр локтӧй асланыд изкарӧ, пленӧ босьтӧмаяс, помӧдзыс лача кутысьяс. Талун Ме юӧрта, мый кык пӧвстӧн тэныд ставсӧ бӧр бергӧда.

¹³ Ме зэвта Иудаӧс ньӧввужйӧс моз, Ефремӧс босьта ньӧв пыдди. Тэнсьыд пиянтӧ, Сион, Ме паныд кыпӧда яванса пиянлы, вӧча тэнӧ тышкасян шыпуртӧн.

¹⁴ Господь петкӧдчас, медым отсавны Аслас войтырлы, Сійӧ чардби моз лыйыштас Ассьыс ньӧвсӧ. Господь Ыджыдыс букӧстас буксанӧн, Сійӧ кыпӧдчас лунвыв ыджыд тӧвнырӧн.

¹⁵ Господь Саваоф доръяс Ассьыс войтырсӧ. Найӧ ньылыштасны вӧрӧгнысӧ, кок уланыс таляласны вӧрӧглысь лыйсян изъяссӧ, пондасны равзыны вина юысьяс моз, вир резан тасьті моз вирӧссясны, лоӧны вирӧн резӧм висьпуктанін пельӧс кодьӧсь.

¹⁶ Сійӧ лунӧ Господь, налӧн Ен, мездас найӧс, чукӧртас Ассьыс войтырсӧ ыж чукӧрӧс моз. Юркытшса дона изъяс моз найӧ пондасны дзирдавны Сылӧн му вылын.

¹⁷ Кутшӧм бур да мича йӧзӧн найӧ лоӧны! Муыс сетас нянь да вина, и ныв-зон пондасны дзоридзавны.