Закар 8 - Коми Библия 2023

Ерусалимӧс лоӧ бурсиӧма

¹ Меным вӧлі Господь Саваофсянь кыв:

² – Господь Саваоф тадзи висьталӧ: Ме вежӧгтӧмӧдз радейта Сионӧс, ёна вежӧгтӧмӧй вӧсна доръя сійӧс, Ме скӧрала сійӧс мустӧмтысьяс вылӧ.

³ Господь тадзи висьталӧ: Ме бӧр локта Сионӧ, бара овмӧдча Ерусалимӧ. Ерусалимӧс шуасны эскана войтырлӧн карӧн, Господь Саваофлысь керӧссӧ – вежа керӧсӧн.

⁴ Господь Саваоф тадзи висьталӧ: Ерусалим изэрдъяс вылын бара пондасны пукавны пӧрысь айулов да аньяс, найӧ локтасны бедь вылӧ мыджсьӧмӧн.

⁵ Изэрдъяс тырасны челядьӧн, найӧ пондасны ворсны ывлаын.

⁶ Господь Саваоф тадзи висьталӧ: коляс войтырлы талун сьӧкыд эскыны, мый тадзи вермас лоны, но Меным абу сьӧкыд тайӧс вӧчны, – висьталӧ Господь Саваоф.

⁷ Господь Саваоф тадзи висьталӧ: Ме мезда Ассьым войтырӧс, вайӧда найӧс асыввыв да рытыввыв муясысь,

⁸ овмӧда найӧс Ерусалимӧ. Найӧ лоӧны Менам войтырӧн, а Ме лоа налӧн Енмӧн – эскана да веськыда вӧчысь Енмӧн.

⁹ Господь Саваоф тадзи висьталӧ: лоӧй зумыдӧсь! Ӧні ті кыланныд сійӧ жӧ кывъяссӧ, мый висьтавлісны пророкъяс Господь Саваофлысь крам подувсӧ пуктігӧн.

¹⁰ Сыӧдз эз вермыны мынтысьны уджалысьлы, нинӧмӧн вӧлі вердны ыж-мӧскӧс. Ме кыпӧді йӧзӧс ӧта-мӧдныслы паныд, дзескӧдӧм вӧсна найӧ полісны петны ывлаӧ.

¹¹ Ӧні тайӧ коляс войтырыслы Ме ог ло сэтшӧмӧн, кутшӧмӧн вӧлі водзынсӧ, – висьталӧ Господь Саваоф. –

¹² Кӧдзӧмаыс быдмас, виноград пу ваяс вотӧс, муыс сетас быдтас, енэжыс юкталас лысваӧн. Ставсӧ тайӧс Ме сета Аслам коляс войтырлы.

¹³ Иуда войтыр да Израиль войтыр, ті вӧлінныд мукӧд войтыръяс пӧвстын ёрӧмӧн, но Ме мезда тіянӧс, и ті лоанныд бурсиӧмӧн. Энӧ полӧй, лоӧй зумыдӧсь!

¹⁴ Господь Саваоф тадзи висьталӧ: кор тіян батьяс скӧрмӧдісны Менӧ, Ме шуи мыждыны тіянӧс и эг веж Ассьым кывйӧс, – висьталӧ Господь Саваоф. –

¹⁵ Но ӧні Ме шуи бурсӧ вӧчны Ерусалимлы да Иуда войтырлы. Энӧ полӧй!

¹⁶ Со мый тіянлы колӧ вӧчны: висьталӧй збыльсӧ ӧта-мӧдныдлы, бурасьӧм могысь веськыда мыждӧй ёрд выланыд.

¹⁷ Энӧ мӧвпалӧй лёксӧ вӧчны ӧта-мӧдныдлы, кыв сетіганыд энӧ пӧръясьӧй, ӧд ставсӧ тайӧс Ме мустӧмта, – висьталӧ Господь.

¹⁸ Меным вӧлі Господь Саваофсянь кыв:

¹⁹ – Господь Саваоф тадзи висьталӧ: нёльӧд, витӧд, сизимӧд да дасӧд тӧлысьясӧ видзалан лунъясыс лоӧны нимкодясян лунъясӧн, шуда гажӧдчан лунъясӧн Иуда войтырлы. Кутчысьӧй збыляс да лӧнь олӧмас!

²⁰ Господь Саваоф тадзи висьталӧ: войтыръяс локтасны, уна карысь локтасны йӧз.

²¹ Ӧти карын олысьяс мунасны мӧд карын олысьяс дорӧ да шуасны: «Мунамӧй кевмысьны Господьлы, юрбитны Господь Саваофлы». Быдӧн та вылӧ горӧдас: «Ме тшӧтш муна».

²² Вына войтыръяс локтасны Ерусалимӧ, медым юрбитны Господь Саваофлы, кевмысьны Господьлы.

²³ Господь Саваоф тадзи висьталӧ: сійӧ лунъясӧ быд иудейлӧн паськӧм бӧждорӧ кутчысясны мукӧд войтыръясысь дас морт, ас кыв вылас найӧ шуасны: «Ми тэкӧд мунам, ӧд ми кывлім, мый тэнад войтыркӧд Ен».